JEE Main 2027 ପରୀକ୍ଷା ପାଇଁ ଆବେଦନ କରୁଥିବା ଛାତ୍ରଛାତ୍ରୀଙ୍କୁ କ୍ୟାଟେଗୋରୀ ଚୟନ ସମୟରେ ଯେପରି କୌଣସି ଦ୍ୱନ୍ଦ୍ୱ ନ ହୁଏ, ସେଥିପାଇଁ ନୂଆ ସ୍ପଷ୍ଟୀକରଣ ଜାରି କରିଛି ନ୍ୟାସନାଲ ଟେଷ୍ଟିଂ ଏଜେନ୍ସି (NTA)। ପ୍ରାର୍ଥୀଙ୍କ ନାଗରିକତା ଏବଂ ଆଧାର କାର୍ଡ ଉପଲବ୍ଧତା ଅନୁସାରେ କେଉଁ କ୍ୟାଟେଗୋରୀ ବାଛିବାକୁ ହେବ, ସେନେଇ ଏଜେନ୍ସି ସ୍ପଷ୍ଟ କରିଛି।

NTAର ଏହି ନିର୍ଦ୍ଦେଶ ଭାରତୀୟ ନାଗରିକ, ବିଦେଶୀ ନାଗରିକ, ଓଭରସିଜ୍ ସିଟିଜେନ୍ ଅଫ୍ ଇଣ୍ଡିଆ (OCI) କାର୍ଡଧାରୀ ଏବଂ NRI ପ୍ରାର୍ଥୀଙ୍କ ପାଇଁ ବିଶେଷ ଗୁରୁତ୍ୱପୂର୍ଣ୍ଣ। ଆବେଦନ ଫର୍ମରେ ଭୁଲ୍ କ୍ୟାଟେଗୋରୀ ଚୟନ କଲେ ପରବର୍ତ୍ତୀ ସମୟରେ ଯାଞ୍ଚ ପ୍ରକ୍ରିୟାରେ ସମସ୍ୟା ହୋଇପାରେ। ତେଣୁ ଫର୍ମ ପୂରଣ ପୂର୍ବରୁ ନିଜର ନାଗରିକତା ଓ ପରିଚୟପତ୍ର ସମ୍ପର୍କିତ ତଥ୍ୟ ଯାଞ୍ଚ କରିବାକୁ ପରାମର୍ଶ ଦିଆଯାଇଛି।

କେଉଁ ପ୍ରାର୍ଥୀ କେଉଁ କ୍ୟାଟେଗୋରୀ ବାଛିବେ?

NTA ପକ୍ଷରୁ ତିନୋଟି କ୍ୟାଟେଗୋରୀ ସମ୍ପର୍କରେ ସ୍ପଷ୍ଟ କରାଯାଇଛି।

୧. Indian Nationals:ଭାରତୀୟ ନାଗରିକମାନେ ଏହି କ୍ୟାଟେଗୋରୀ ବାଛିବେ। ଏଥିରେ ଆଧାର କାର୍ଡ ଥିବା NRI ପ୍ରାର୍ଥୀମାନେ ମଧ୍ୟ ସାମିଲ ହେବେ।

୨. Foreign Nationals:ଯେଉଁ ପ୍ରାର୍ଥୀମାନଙ୍କ ପାଖରେ ବିଦେଶୀ ନାଗରିକତା ରହିଛି, ସେମାନେ ଏହି ବିକଳ୍ପ ବାଛିବେ। OCI କାର୍ଡଧାରୀମାନଙ୍କୁ ମଧ୍ୟ ଏହି କ୍ୟାଟେଗୋରୀରେ ଆବେଦନ କରିବାକୁ ପଡ଼ିବ।

୩. NRIs Having No Aadhaar:ଯେଉଁ NRI ପ୍ରାର୍ଥୀଙ୍କ ପାଖରେ ଭାରତୀୟ ପାସପୋର୍ଟ ଅଛି, କିନ୍ତୁ ଆଧାର କାର୍ଡ ନାହିଁ, ସେମାନେ ଏହି ସ୍ୱତନ୍ତ୍ର କ୍ୟାଟେଗୋରୀ ବାଛିବେ।

JEE Main 2027 ଆବେଦନର ଗୁରୁତ୍ୱପୂର୍ଣ୍ଣ ତାରିଖ

JEE Main 2027ର ପ୍ରଥମ ସେସନ୍ ପାଇଁ ଅକ୍ଟୋବର ୨୪ ତାରିଖରୁ ଅନଲାଇନ୍ ଆବେଦନ ଆରମ୍ଭ ହୋଇଛି। ପ୍ରାର୍ଥୀମାନେ ନିମ୍ନଲିଖିତ ତାରିଖଗୁଡ଼ିକ ଉପରେ ଧ୍ୟାନ ଦେବା ଆବଶ୍ୟକ।

• ବିନା ଲେଟ୍ ଫି’ରେ ଆବେଦନର ଶେଷ ତାରିଖ:୨୨ ନଭେମ୍ବର ୨୦୨୬

• ଲେଟ୍ ଫି’ ସହ ଆବେଦନ:୨୩ରୁ ୨୬ ନଭେମ୍ବର ୨୦୨୬

• ଆବେଦନ ସଂଶୋଧନ ସୁଯୋଗ:୨୭ରୁ ୨୯ ନଭେମ୍ବର ୨୦୨୬

• ପରୀକ୍ଷା ସହର ସୂଚନା:୩୦ ଡିସେମ୍ବର ୨୦୨୬

• ଆଡମିଟ୍ କାର୍ଡ:୧୩ ଜାନୁଆରୀ ୨୦୨୭

• ପ୍ରଥମ ସେସନ୍ ପରୀକ୍ଷା:୨୦, ୨୧, ୨୨, ୨୩, ୨୪ ଓ ୨୮ ଜାନୁଆରୀ ୨୦୨୭

ପରୀକ୍ଷା ଦୁଇଟି ସିଫ୍ଟରେ ଅନୁଷ୍ଠିତ ହେବ। ପ୍ରଥମ ସିଫ୍ଟ ସକାଳ ୯ଟାରୁ ମଧ୍ୟାହ୍ନ ୧୨ଟା ଏବଂ ଦ୍ୱିତୀୟ ସିଫ୍ଟ ଅପରାହ୍ନ ୩ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ହେବ।

ଆବେଦନ ପୂର୍ବରୁ ଏହି ନିର୍ଦ୍ଦେଶ ମାନନ୍ତୁ

NTA ପ୍ରାର୍ଥୀମାନଙ୍କୁ ନିଜସ୍ୱ DigiLocker, JanParichay କିମ୍ବା e-Pramaan ଆକାଉଣ୍ଟ ବ୍ୟବହାର କରି ଲଗ୍ଇନ୍ କରିବାକୁ ପରାମର୍ଶ ଦେଇଛି। ଆବଶ୍ୟକ ହେଲେ DigiLockerରେ Re-KYC ମଧ୍ୟ ସମ୍ପୂର୍ଣ୍ଣ କରିବାକୁ କୁହାଯାଇଛି।

ଏହା ସହିତ ଆବେଦନ ଫର୍ମରେ ଦିଆଯାଇଥିବା ପ୍ରାର୍ଥୀଙ୍କ ନାମ ଏବଂ ଜନ୍ମତାରିଖ ଦଶମ ଶ୍ରେଣୀ ସାର୍ଟିଫିକେଟ୍ କିମ୍ବା ମାର୍କସିଟ୍ରେ ଥିବା ତଥ୍ୟ ସହ ମେଳ ଖାଇବା ଆବଶ୍ୟକ। ଫର୍ମ ଦାଖଲ କରିବା ପୂର୍ବରୁ ସମସ୍ତ ବ୍ୟକ୍ତିଗତ ଓ ଶିକ୍ଷାଗତ ତଥ୍ୟ ଭଲ ଭାବରେ ଯାଞ୍ଚ କରିବାକୁ NTA ପରାମର୍ଶ ଦେଇଛି।

JEE Main 2027 ପାଇଁ ଆବେଦନ କରିବାକୁ ପ୍ରାର୍ଥୀମାନେ NTAର ଅଫିସିଆଲ୍ ୱେବସାଇଟ୍jeemain.nta.nic.inଭିଜିଟ୍ କରିପାରିବେ। ଶେଷ ତାରିଖ ପୂର୍ବରୁ ଠିକ୍ କ୍ୟାଟେଗୋରୀ ବାଛି ଆବେଦନ ପ୍ରକ୍ରିୟା ସମ୍ପୂର୍ଣ୍ଣ କରିବା ଜରୁରୀ।