ଭୁବନେଶ୍ୱର: ବଙ୍ଗୋପସାଗରରେ ପୁଣି ଏକ ନୂଆ ପାଣିପାଗ ପ୍ରଣାଳୀକୁ ନେଇ ବଢ଼ିଛି ଚର୍ଚ୍ଚା। ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଧୀରେ ଧୀରେ ଘନୀଭୂତ ହେଉଛି। ଏହା ଆଗକୁ ଅବପାତର ରୂପ ନେବା ସହ ବାତ୍ୟାରେ ପରିଣତ ହେବ କି ନାହିଁ, ତାହାକୁ ନେଇ ପାଣିପାଗ ବିଶେଷଜ୍ଞମାନେ ନଜର ରଖିଛନ୍ତି।

୧୫ ତାରିଖରେ ଅବପାତର ରୂପ ନେଇପାରେ

ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁସାରେ, ଦକ୍ଷିଣ ଆଣ୍ଡାମାନ ସାଗର ଓ ନିକଟବର୍ତ୍ତୀ ଅଞ୍ଚଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ପ୍ରଭାବରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇଛି।

ଏହି ପାଣିପାଗ ପ୍ରଣାଳୀ ଉତ୍ତର-ପଶ୍ଚିମ ଦିଗକୁ ଗତି କରିବା ସହ ନଭେମ୍ବର ୧୪ ତାରିଖ ବେଳକୁ ସୁସ୍ପଷ୍ଟ ଲଘୁଚାପ ଏବଂ ୧୫ ତାରିଖ ବେଳକୁ ଅବପାତରେ ପରିଣତ ହେବାର ସମ୍ଭାବନା ରହିଛି।

ବାତ୍ୟାର ରୂପ ନେବ କି ଲଘୁଚାପ?

ଅବପାତରେ ପରିଣତ ହେବା ପରେ ଏହି ପ୍ରଣାଳୀ ଆହୁରି ଶକ୍ତିଶାଳୀ ହୋଇପାରେ। IMDର ବିସ୍ତାରିତ ପାଣିପାଗ ପୂର୍ବାନୁମାନରେ ନଭେମ୍ବର ୧୯ରୁ ୨୫ ମଧ୍ୟରେ ଦକ୍ଷିଣ ବଙ୍ଗୋପସାଗରର କେନ୍ଦ୍ରୀୟ ଭାଗରେ ବାତ୍ୟା ସୃଷ୍ଟି ଓ ତୀବ୍ରତା ବୃଦ୍ଧିର ସମ୍ଭାବନା ନେଇ ବିଭିନ୍ନ ମଡେଲ୍‌ରେ ସହମତି ଥିବା ଉଲ୍ଲେଖ ରହିଛି।

ତେବେ ଏହାର ଗତିପଥ ଓ ସମ୍ଭାବ୍ୟ ସ୍ଥଳଭାଗ ଛୁଇଁବା ସ୍ଥାନକୁ ନେଇ ବିଭିନ୍ନ ପାଣିପାଗ ମଡେଲ୍‌ ମଧ୍ୟରେ ମତଭେଦ ରହିଛି। ତେଣୁ ଏବେଠାରୁ ବାତ୍ୟା ନିଶ୍ଚିତ ବୋଲି କହିବା ଠିକ୍ ହେବ ନାହିଁ।

୧୭ ତାରିଖରୁ ଓଡ଼ିଶାରେ ବର୍ଷା ସମ୍ଭାବନା

ଏହି ପାଣିପାଗ ପ୍ରଣାଳୀର ପ୍ରଭାବରେ ନଭେମ୍ବର ୧୭ ତାରିଖରୁ ଓଡ଼ିଶାରେ ବର୍ଷା ହେବାର ସମ୍ଭାବନା ନେଇ ପୂର୍ବାନୁମାନ କରାଯାଇଛି। ତେବେ କେଉଁ ଜିଲ୍ଲାରେ କେତେ ପରିମାଣର ବର୍ଷା ହେବ, ସେନେଇ ବିସ୍ତୃତ ଆକଳନକୁ ଅପେକ୍ଷା କରାଯାଇଛି।

ପାଣିପାଗର ଏହି ପରିବର୍ତ୍ତନକୁ ନେଇ ଚାଷୀଙ୍କ ଚିନ୍ତା ବଢ଼ିଛି। ରାଜ୍ୟର ଅନେକ ଅଞ୍ଚଳରେ ଧାନ ଅମଳ ସମୟ ପାଖେଇ ଆସୁଥିବାରୁ ବର୍ଷା ହେଲେ ଫସଲ ଅମଳ ଓ ସଂରକ୍ଷଣ ପ୍ରଭାବିତ ହେବାର ଆଶଙ୍କା ରହିଛି।

ମତ୍ସ୍ୟଜୀବୀଙ୍କ ପାଇଁ ସତର୍କତା

ବଙ୍ଗୋପସାଗର ଓ ଆଣ୍ଡାମାନ ସାଗରରେ ପବନର ବେଗ ବୃଦ୍ଧି ସହ ଅଶାନ୍ତ ସମୁଦ୍ର ସ୍ଥିତି ରହିବାର ପୂର୍ବାନୁମାନ ରହିଛି। କେତେକ ଅଞ୍ଚଳରେ ପବନର ବେଗ ଝଟକା ସହ ଘଣ୍ଟାପ୍ରତି ୬୫ କିଲୋମିଟର ପର୍ଯ୍ୟନ୍ତ ପହଞ୍ଚିପାରେ।

ତେଣୁ ମତ୍ସ୍ୟଜୀବୀମାନେ ପାଣିପାଗ ବିଭାଗର ସତର୍କ ସୂଚନା ଓ ସମୁଦ୍ରକୁ ଯିବା ସମ୍ପର୍କିତ ପରାମର୍ଶ ମାନିବା ଜରୁରୀ। ଆଗାମୀ ଦିନରେ ଏହି ପାଣିପାଗ ପ୍ରଣାଳୀର ଗତିପଥ ଓ ତୀବ୍ରତା ସମ୍ପର୍କରେ ଅଧିକ ସ୍ପଷ୍ଟ ଚିତ୍ର ମିଳିବ।