ରୁଷ-ୟୁକ୍ରେନ ଯୁଦ୍ଧ ଚାରି ବର୍ଷରୁ ଅଧିକ ସମୟ ଧରି ଜାରି ରହିଥିବା ବେଳେ ଏହାର ସମାଧାନ ପାଇଁ ବିଭିନ୍ନ ସ୍ତରରେ ଆଲୋଚନା ଚାଲିଛି। ଏହି ପରିପ୍ରେକ୍ଷୀରେ ପ୍ରକାଶିତ ଏକ ନୂତନ ପୁସ୍ତକରେ ଆମେରିକାର ଉପରାଷ୍ଟ୍ରପତି ଜେ.ଡି. ଭାନ୍ସ ୟୁକ୍ରେନରେ ଶାନ୍ତିରକ୍ଷା ବାହିନୀ ଭାବେ ଭାରତ କିମ୍ବା ସାଉଦି ଆରବର ସୈନ୍ୟ ମୁତୟନ କରିବାକୁ ପରାମର୍ଶ ଦେଇଥିବା ଦାବି କରାଯାଇଛି।

ନ୍ୟୁୟର୍କ ଟାଇମ୍ସର ସାମ୍ବାଦିକ ମ୍ୟାଗି ହାବରମ୍ୟାନ୍ ଏବଂ ଜୋନାଥନ୍ ସ୍ୱାନ୍ ଲେଖିଥିବା‘Regime Change: Inside the Imperial Presidency of Donald Trump’ପୁସ୍ତକରେ ଏହି ଦାବି କରାଯାଇଛି। ପୁସ୍ତକ ଅନୁଯାୟୀ, ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳ ଆରମ୍ଭ ହେବାର କିଛି ଦିନ ପରେ ହ୍ୱାଇଟ୍ ହାଉସ୍ର ଓଭାଲ୍ ଅଫିସରେ ୟୁକ୍ରେନ ଯୁଦ୍ଧ ନେଇ ଏକ ଉଚ୍ଚସ୍ତରୀୟ ବୈଠକ ହୋଇଥିଲା।

ବୈଠକରେ ଅବସରପ୍ରାପ୍ତ ଲେଫ୍ଟନାଣ୍ଟ ଜେନେରାଲ୍ କିଥ୍ କେଲୋଗ୍ ରୁଷ-ୟୁକ୍ରେନ ଯୁଦ୍ଧ ପାଇଁ ଏକ ଶାନ୍ତି ପ୍ରସ୍ତାବ ଉପସ୍ଥାପନ କରିଥିଲେ। ଏହି ପ୍ରସ୍ତାବରେ ରୁଷ ଅଧିକୃତ ଅଞ୍ଚଳଗୁଡ଼ିକୁ ଆମେରିକା ଆନୁଷ୍ଠାନିକ ଭାବେ ସ୍ୱୀକୃତି ନ ଦେବା ସହ ୟୁକ୍ରେନ ବଳପ୍ରୟୋଗ କରି ସେହି ଅଞ୍ଚଳ ଫେରାଇ ନେବାକୁ ଚେଷ୍ଟା ନ କରିବା ନେଇ ଆଲୋଚନା ହୋଇଥିଲା।

ପୁସ୍ତକରେ ଉଲ୍ଲେଖ ଅନୁସାରେ, ଏହି ଆଲୋଚନା ବେଳେ ଜେ.ଡି. ଭାନ୍ସ ଏକ ଅଣ-ନାଟୋ ଶାନ୍ତିରକ୍ଷା ବାହିନୀ ଗଠନ ପ୍ରସଙ୍ଗ ଉଠାଇଥିଲେ। ସେ ପଚାରିଥିଲେ ଯେ, ଏହି ଦାୟିତ୍ୱ ପାଇଁ ଅନ୍ୟ ଦେଶର ସୈନ୍ୟଙ୍କୁ ନିୟୋଜିତ କରାଯାଇପାରିବ କି? ଏହା ସହ ସେ ଭାରତ କିମ୍ବା ସାଉଦି ଆରବର ସୈନ୍ୟଙ୍କୁ ଶାନ୍ତିସେନା ଭାବେ ପଠାଇବା ପାଇଁ ପରାମର୍ଶ ଦେଇଥିବା ଦାବି କରାଯାଇଛି।

ପୁସ୍ତକରେ ଟ୍ରମ୍ପଙ୍କ ଏକ ପ୍ରତିକ୍ରିୟା ମଧ୍ୟ ଉଦ୍ଧୃତ କରାଯାଇଛି। ଦାବି ଅନୁସାରେ, ଟ୍ରମ୍ପ ମଜାକିଆ ଢଙ୍ଗରେ କହିଥିଲେ ଯେ ଭାରତ ଏଭଳି ପଦକ୍ଷେପ ନେବ ନାହିଁ। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ନିଜର ଭଲ ସମ୍ପର୍କ ଥିବା କଥା ମଧ୍ୟ ଉଲ୍ଲେଖ କରିଥିଲେ।

ପୁସ୍ତକର ଅନ୍ୟ ଏକ ଅଧ୍ୟାୟରେ ଆମେରିକାର ଶୁଳ୍କ ନୀତି ଏବଂ ବାଣିଜ୍ୟ ନେଇ ହୋଇଥିବା ଆଲୋଚନାର ବିବରଣୀ ମଧ୍ୟ ରହିଛି। ସେଠାରେ ଟ୍ରମ୍ପ ଭାରତ ଏବଂ ଚୀନ୍ ଆମେରିକୀୟ ସାମଗ୍ରୀ ଉପରେ ଉଚ୍ଚ ଶୁଳ୍କ ଲଗାଉଥିବା ଅଭିଯୋଗ କରିଥିବା ଦାବି କରାଯାଇଛି। ସେ ଆମେରିକାରେ ଉତ୍ପାଦନ ନ କରୁଥିବା କମ୍ପାନୀମାନଙ୍କ ଉପରେ ଅଧିକ ଶୁଳ୍କ ଲାଗୁ କରିବା ସପକ୍ଷରେ ମତ ଦେଇଥିବା ପୁସ୍ତକରେ ଉଲ୍ଲେଖ ରହିଛି।

ତେବେ ଏହି ସମସ୍ତ ତଥ୍ୟ ପୁସ୍ତକରେ ଥିବା ଦାବି ଉପରେ ଆଧାରିତ ଏବଂ ଏନେଇ ହ୍ୱାଇଟ୍ ହାଉସ୍ କିମ୍ବା ସମ୍ପୃକ୍ତ ପକ୍ଷରୁ ସ୍ୱତନ୍ତ୍ର ଆଧିକାରିକ ପୁଷ୍ଟି ମିଳିନାହିଁ।