ଶନିବାର ଅଷ୍ଟ୍ରେଲିଆ ଏବଂ ଜାପାନ ମଧ୍ୟରେ ଏକ ବିଶାଳ ପ୍ରତିରକ୍ଷା ଚୁକ୍ତିନାମା ସ୍ୱାକ୍ଷର ହୋଇଛି, ଯାହାକୁ ଜାପାନର ସର୍ବବୃହତ ସାମରିକ ରପ୍ତାନି ଚୁକ୍ତି ଭାବେ ଦେଖାଯାଉଛି। ଏହି ଚୁକ୍ତିର ମୂଲ୍ୟ ପ୍ରାୟ ୧୦ ବିଲିୟନ ଅଷ୍ଟ୍ରେଲିୟ ଡଲାର (ଅନୁମାନିତ ୫୮,୫୦୦ କୋଟି ଭାରତୀୟ ଟଙ୍କା) ଅଟେ।

ଏହି ଚୁକ୍ତିନାମାରେ ଅଷ୍ଟ୍ରେଲିଆର ପ୍ରତିରକ୍ଷା ମନ୍ତ୍ରୀ ରିଚାର୍ଡ ମାର୍ଲେସ୍ ଏବଂ ଜାପାନର ପ୍ରତିରକ୍ଷା ମନ୍ତ୍ରୀ ସିଞ୍ଜିରୋ କୋଇଜୁମି ସ୍ୱାକ୍ଷର କରିଛନ୍ତି। ଉଭୟ ଦେଶ କହିଛନ୍ତି ଯେ, ଏହି ପ୍ରକଳ୍ପ ଦ୍ୱାରା ଦୁଇ ଦେଶର ପ୍ରତିରକ୍ଷା ସମ୍ପର୍କ ଆହୁରି ମଜବୁତ ହେବ।

ଚୁକ୍ତି ଅନୁଯାୟୀ, ଜାପାନୀ କମ୍ପାନୀମିତ୍ସୁବିସି ହେଭି ଇଣ୍ଡଷ୍ଟ୍ରିଜ୍ରୟାଲ୍ ଅଷ୍ଟ୍ରେଲିଆ ନେଭୀକୁ ମୋଟ ୧୧ଟି ଆଧୁନିକ ମୋଗାମି-କ୍ଲାସ୍ ମଲ୍ଟି-ରୋଲ୍ ଫ୍ରିଗେଟ୍ ଯୋଗାଇବ। ଏହି ଯୁଦ୍ଧଜାହାଜଗୁଡ଼ିକ ଶତ୍ରୁ ବୁଡ଼ାଜାହାଜ ଚିହ୍ନଟ କରିବା, ସମୁଦ୍ରରେ ଆକ୍ରମଣ କରିବା ଏବଂ ବାୟୁ ଆକ୍ରମଣରୁ ସୁରକ୍ଷା ଦେବାରେ ସକ୍ଷମ ହେବ।

ପ୍ରଥମେ ୩ଟି ଜାହାଜ ଜାପାନରେ ନିର୍ମିତ ହେବ ଏବଂ ୨୦୨୯ ରୁ ଏହାର ଡିଲିଭରି ଆରମ୍ଭ ହେବ। ପରବର୍ତ୍ତୀ ୮ଟି ଜାହାଜ ଅଷ୍ଟ୍ରେଲିଆର ପର୍ଥ ନିକଟରେ ଥିବା ହେଣ୍ଡରସନ୍ ସିପୟାର୍ଡରେ ନିର୍ମାଣ କରାଯିବ।

ଅଷ୍ଟ୍ରେଲିଆ ଏହି ଯୁଦ୍ଧଜାହାଜଗୁଡ଼ିକୁ ଭାରତ ମହାସାଗର ଓ ପ୍ରଶାନ୍ତ ମହାସାଗରରେ ମୁତୟନ କରି ସମୁଦ୍ର ବାଣିଜ୍ୟ ମାର୍ଗ ଏବଂ ଉତ୍ତର ଅଞ୍ଚଳର ସୁରକ୍ଷା ବଢ଼ାଇବ।

ଏହି ଚୁକ୍ତି ଏକ ଏପରି ସମୟରେ ହୋଇଛି, ଯେତେବେଳେ ଚୀନ୍ ଏହି ଅଞ୍ଚଳରେ ନିଜର ସାମରିକ ପ୍ରଭାବ ବଢ଼ାଇବାରେ ଲାଗିଛି। ଏହାକୁ ଚୀନ୍ ବିରୋଧରେ ଏକ କୌଶଳିକ ପଦକ୍ଷେପ ଭାବେ ମଧ୍ୟ ଦେଖାଯାଉଛି।

ଜାପାନ ନିଜର ପୁରୁଣା ଶାନ୍ତିବାଦୀ ନୀତିରୁ ବାହାରି ଆସି ବର୍ତ୍ତମାନ ଆନ୍ତର୍ଜାତୀୟ ସୁରକ୍ଷା ସହଯୋଗକୁ ବଢ଼ାଇବାରେ ଝୁକିଛି। ଏହି ପଦକ୍ଷେପ ଦୁଇ ଦେଶର ମଧ୍ୟରେ ସାମରିକ ସହଯୋଗକୁ ନୂତନ ମାନଦଣ୍ଡ ଦେଇଛି।