ନ୍ୟୁୟର୍କ: ଜାତିସଂଘ ମହାସଭାରେ ଭାରତ ଆତଙ୍କବାଦ ପ୍ରସଙ୍ଗରେ ନିଜର ଦୃଢ଼ ଆଭିମୁଖ୍ୟ ପୁଣିଥରେ ରଖିଛି। ୮୧ତମ UN General Assembly ଅଧିବେଶନରେ ଭାରତର ଜାତୀୟ ବକ୍ତବ୍ୟ ରଖି ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି ଯେ ଆତଙ୍କବାଦ ବିରୋଧରେ ଭାରତର ଆଭିମୁଖ୍ୟରେ କୌଣସି କୋହଳତା ରହିବ ନାହିଁ।

ଜୟଶଙ୍କର ପାକିସ୍ତାନର ନାଁ ସିଧାସଳଖ ଉଲ୍ଲେଖ ନକରି ଏକ ଦେଶକୁ ଆତଙ୍କବାଦର “serial practitioner” ବୋଲି ଉଲ୍ଲେଖ କରିଥିଲେ। ତାଙ୍କ କହିବା ଅନୁସାରେ, ଜାତିସଂଘରେ ଆତଙ୍କବାଦକୁ ସାଧାରଣ କରି ଦେଖାଇବା ଏବଂ ଏହାର ପରିଣାମରୁ ମୁକ୍ତି ଦାବି କରିବାର ପ୍ରୟାସ ଗ୍ରହଣ କରାଯିବ ନାହିଁ।

ସେ ଆହୁରି କହିଛନ୍ତି ଯେଆତଙ୍କବାଦ ବିରୋଧରେ ଆତ୍ମରକ୍ଷା ପାଇଁ ଭାରତ ନିଜ ଅଧିକାର ପ୍ରୟୋଗ କରିବ। ତାଙ୍କ ମତରେ, ଆତଙ୍କବାଦ ଏକ ଦୀର୍ଘସ୍ଥାୟୀ ଶାନ୍ତି ପାଇଁ ବିପଦ ଏବଂ ସୀମାପାର ଆତଙ୍କବାଦକୁ ରାଷ୍ଟ୍ରୀୟ ସମର୍ଥନ ମିଳିଲେ ଏହା ବିଶ୍ୱ ବ୍ୟବସ୍ଥା ପାଇଁ ଅଧିକ ଗମ୍ଭୀର ଚ୍ୟାଲେଞ୍ଜ ହୋଇଥାଏ।

ଜୟଶଙ୍କର ସ୍ପଷ୍ଟ କରିଛନ୍ତି ଯେ“ବନ୍ଧୁତା ଓ ସଦ୍ଭାବ ଆତଙ୍କବାଦ ସହିତ ଏକାଠି ଚାଲିପାରିବ ନାହିଁ”। ଏହାସହ ଆତଙ୍କବାଦକୁ ସମର୍ଥନ, ଆର୍ଥିକ ସହାୟତା କିମ୍ବା ସୀମାପାର ଆକ୍ରମଣରେ ସହଯୋଗ କରୁଥିବା ସରକାରଗୁଡ଼ିକୁ ଦାୟୀ କରିବା ଆବଶ୍ୟକ ବୋଲି ସେ କହିଛନ୍ତି।

ଜୟଶଙ୍କରଙ୍କ ଏହି ବକ୍ତବ୍ୟ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫଙ୍କ UNGA ଭାଷଣର ଗୋଟିଏ ଦିନ ପରେ ଆସିଛି। ଶରିଫ ତାଙ୍କ ଭାଷଣରେ କାଶ୍ମୀର ଏବଂ ୨୦୨୫ର ଭାରତ-ପାକିସ୍ତାନ ସଂଘର୍ଷ ପ୍ରସଙ୍ଗ ଉଠାଇଥିଲେ।