ପଶ୍ଚିମ ଏସିଆରେ ଯୁଦ୍ଧ ଓ କୂଟନୈତିକ ଟଣାଓଟରା ମଧ୍ୟରେ ପରିସ୍ଥିତି ଆହୁରି ସଙ୍କଟପୂର୍ଣ୍ଣ ହୋଇଯାଇଛି। ବୁଧବାର ସକାଳେ ହର୍ମୁଜ୍ ପ୍ରଣାଳୀରେ ତିନୋଟି ଅନ୍ତର୍ଜାତୀୟ ତୈଳ ଟ୍ୟାଙ୍କରକୁ ଲକ୍ଷ୍ୟ କରି ଜବତ କରାଯାଇଥିବା ଦାବି ସାମ୍ନାକୁ ଆସିଛି। ଏହି ଘଟଣା ବିଶ୍ୱ ତୈଳ ବଜାର ଓ ଅନ୍ତର୍ଜାତୀୟ କୂଟନୀତିରେ ନୂଆ ଚିନ୍ତା ସୃଷ୍ଟି କରିଛି।

ଇରାନର ସରକାରୀ ଗଣମାଧ୍ୟମ ଏବଂ ଇସ୍ଲାମିକ୍ ରିଭୋଲ୍ୟୁସନରୀ ଗାର୍ଡ କର୍ପ୍ସ (IRGC) ପକ୍ଷରୁ କୁହାଯାଇଛି ଯେ, ସମ୍ପୃକ୍ତ ଟ୍ୟାଙ୍କରଗୁଡ଼ିକୁ ବାରମ୍ବାର ସତର୍କ କରାଯାଇଥିଲା। କିନ୍ତୁ ସେମାନେ ସାମୁଦ୍ରିକ ପ୍ରୋଟୋକଲ୍ ଏବଂ ଚେତାବନୀକୁ ଅଣଦେଖା କରିଥିବାରୁ ସମୁଦ୍ର ମଝିରେ ସେମାନଙ୍କୁ ଅଟକାଯାଇଥିବା ଦାବି କରାଯାଇଛି।

ତେବେ ଜବତ ହୋଇଥିବା ତୈଳ ଟ୍ୟାଙ୍କରଗୁଡ଼ିକ କେଉଁ ଦେଶର ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହି ଘଟଣା ପରେ ହର୍ମୁଜ୍ ପ୍ରଣାଳୀ ଏବଂ ଲୋହିତ ସାଗର ଅଞ୍ଚଳରେ ସୁରକ୍ଷା ନେଇ ଚିନ୍ତା ବଢ଼ିଛି।

ଆମେରିକା-ଇରାନ ମଧ୍ୟରେ ବଢ଼ୁଛି ଟଣାଓଟରା

ଖବର ଅନୁଯାୟୀ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମ୍ପ୍ରତିର ବୟାନକୁ ନେଇ ଇରାନ କଠୋର ପ୍ରତିକ୍ରିୟା ଦେଇଛି। ତେହେରାନ ଏହାକୁ ନିଜ ସାର୍ବଭୌମତ୍ୱ ବିରୋଧୀ ପଦକ୍ଷେପ ବୋଲି ବର୍ଣ୍ଣନା କରିଛି।

ଇରାନର ସର୍ବୋଚ୍ଚ ସାମରିକ କମାଣ୍ଡ ଖାତମ ଅଲ-ଆନବିୟାର ମୁଖପାତ୍ର ଇବ୍ରାହିମ ଜୁଲଫିକାରି ସତର୍କ କରି କହିଛନ୍ତି ଯେ, ଯଦି କୌଣସି ଦେଶ କିମ୍ବା କମ୍ପାନୀ ଇରାନର ଜବତ ସମ୍ପତ୍ତିକୁ ବ୍ୟବହାର କରିବାକୁ ଚେଷ୍ଟା କରେ, ତେବେ ସେହି ଦେଶର ଜାହାଜଗୁଡ଼ିକୁ ହର୍ମୁଜ୍ ପ୍ରଣାଳୀ ଦେଇ ଯାତାୟାତ କରିବାକୁ ଦିଆଯିବ ନାହିଁ।

ବିଶ୍ୱ ତୈଳ ବଜାର ଉପରେ ପଡ଼ିପାରେ ପ୍ରଭାବ

ହର୍ମୁଜ୍ ପ୍ରଣାଳୀ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟ ପଥ ମଧ୍ୟରୁ ଗୋଟିଏ। ବିଶ୍ୱର ବହୁ ପରିମାଣର ଅଶୋଧିତ ତୈଳ ଏହି ପଥ ଦେଇ ପରିବହନ କରାଯାଏ। ତେଣୁ ଏହି ଅଞ୍ଚଳରେ ଉତ୍ତେଜନା ବଢ଼ିଲେ ବିଶ୍ୱ ତୈଳ ଯୋଗାଣ ଓ ଦର ଉପରେ ପ୍ରଭାବ ପଡ଼ିପାରେ।

ବିଶେଷଜ୍ଞମାନଙ୍କ ମତରେ, ଯଦି ଏପରି ଘଟଣା ଜାରି ରହେ, ତେବେ ଅଶୋଧିତ ତୈଳ ମୂଲ୍ୟରେ ବୃଦ୍ଧି ହେବା ସହ ଆମେରିକା ଓ ଇରାନ ମଧ୍ୟରେ ଉତ୍ତେଜନା ଆହୁରି ବଢ଼ିପାରେ। ବର୍ତ୍ତମାନ ସମଗ୍ର ଅଞ୍ଚଳର ସୁରକ୍ଷା ପରିସ୍ଥିତି ଉପରେ କଡ଼ା ନଜର ରଖାଯାଉଛି।