ଇରାନର ଆଭ୍ୟନ୍ତରୀଣ ରାଜନୀତିରେ ଏବେ ଏକ ବଡ଼ ଧରଣର ବିବାଦ ଦେଖାଦେଇଛି। ରାଷ୍ଟ୍ରପତିମାସୁଦ ପେଜେସ୍କିଆନଙ୍କ ସରକାର ଏବଂ ସର୍ବୋଚ୍ଚ ନେତାଆୟାତୋଲ୍ଲା ଅଲି ଖାମେନେଇଙ୍କ ନିୟନ୍ତ୍ରଣାଧୀନ ସରକାରୀ ପ୍ରସାରଣ ସଂସ୍ଥାIRIB (Islamic Republic of Iran Broadcasting)ମଧ୍ୟରେ ଚାଲିଥିବା ବିବାଦ ଏବେ ସାର୍ବଜନୀନ ରୂପ ନେଇଛି।

ଏହି ବିବାଦର ମୂଳ କାରଣ ହେଉଛି ରାଷ୍ଟ୍ରପତି ପେଜେସ୍କିଆନଙ୍କ ଭାଷଣର କିଛି ଗୁରୁତ୍ୱପୂର୍ଣ୍ଣ ଅଂଶ ସରକାରୀ ଟେଲିଭିଜନରେ ପ୍ରସାରଣ ନ କରାଯିବା। ସରକାରଙ୍କ ଅଭିଯୋଗ ଅନୁଯାୟୀ, ରାଷ୍ଟ୍ରପତି ନିଜ ଭାଷଣରେ କହିଥିଲେ ଯେ ଆମେରିକା ସହ ଆଲୋଚନା ପାଇଁ ସର୍ବୋଚ୍ଚ ନେତା ବ୍ୟକ୍ତିଗତ ଭାବେ ସମ୍ମତି ଦେଇଥିଲେ। କିନ୍ତୁ ସେହି ଅଂଶକୁ IRIB ପ୍ରସାରଣରୁ ବାଦ୍ ଦେଇଥିଲା।

ସରକାର ପକ୍ଷରୁ ଏହା ମଧ୍ୟ କୁହାଯାଇଛି ଯେ କେବଳ ରାଷ୍ଟ୍ରପତିଙ୍କ ଭାଷଣ ନୁହେଁ, ବରଂ ସଂସଦ ବାଚସ୍ପତି ଓ ନ୍ୟାୟପାଳିକାର ମୁଖ୍ୟଙ୍କ ଭାଷଣର ସେହି ଅଂଶଗୁଡ଼ିକୁ ମଧ୍ୟ ପ୍ରସାରଣ କରାଯାଇନଥିଲା, ଯେଉଁଥିରେ ସେମାନେ ରାଷ୍ଟ୍ରପତିଙ୍କ ମତକୁ ସମର୍ଥନ କରିଥିଲେ।

ଅନ୍ୟପଟେ, IRIB କର୍ତ୍ତୃପକ୍ଷ ଏହି ଅଭିଯୋଗକୁ ଖଣ୍ଡନ କରିଛନ୍ତି। ସେମାନଙ୍କ କହିବା ଅନୁଯାୟୀ, ଦେଶର ଶୀର୍ଷ ନେତୃତ୍ୱ ମଧ୍ୟରେ କୌଣସି ବିଭେଦର ବାର୍ତ୍ତା ନଯାଉ ଏବଂ ଜାତୀୟ ଏକତା ବଜାୟ ରହୁ, ସେଥିପାଇଁ ସମ୍ପାଦକୀୟ ସ୍ତରରେ କିଛି ଅଂଶ ପ୍ରସାରଣ କରାଯାଇନଥିଲା।

ଏହି ବିବାଦରେ ଇରାନର ବୈଦେଶିକ ମନ୍ତ୍ରୀଆବାସ ଆରାଘଚିମଧ୍ୟ ଅସନ୍ତୋଷ ପ୍ରକାଶ କରିଛନ୍ତି। ଆମେରିକୀୟ ଗଣମାଧ୍ୟମକୁ ସେ ଦେଇଥିବା ସାକ୍ଷାତକାରର କିଛି ଅଂଶ ମଧ୍ୟ ସରକାରୀ ଟେଲିଭିଜନ ପ୍ରସାରଣ କରିନଥିବା ସେ ଅଭିଯୋଗ କରିଛନ୍ତି।

ରିପୋର୍ଟ ଅନୁଯାୟୀ, ଏହି ପ୍ରସଙ୍ଗକୁ ନେଇ ରାଷ୍ଟ୍ରପତି ପେଜେସ୍କିଆନ ଏକ କ୍ୟାବିନେଟ ବୈଠକରେ IRIB ମୁଖ୍ୟପେମାନ ଜେବେଲିଙ୍କୁ କଠୋର ସମାଲୋଚନା କରିଥିଲେ। ଏପରିକି ସରକାରୀ ପ୍ରସାରଣ ସଂସ୍ଥାର ବଜେଟ୍ କମାଇବାକୁ ମଧ୍ୟ ସେ ସତର୍କ କରିଥିବା ଚର୍ଚ୍ଚା ହେଉଛି।

ରାଜନୈତିକ ବିଶ୍ଳେଷକଙ୍କ ମତରେ, ଇରାନରେ କଠୋରପନ୍ଥୀ ଶିବିର ଓ ଉଦାରବାଦୀ ସରକାରଙ୍କ ମଧ୍ୟରେ ବଢ଼ୁଥିବା ଏହି ମତଭେଦ ଆଗାମୀ ଦିନରେ ଦେଶର ରାଜନୀତି ଓ ବୈଦେଶିକ ନୀତି ଉପରେ ପ୍ରଭାବ ପକାଇପାରେ।