ହର୍ମୁଜ୍ ପ୍ରଣାଳୀରେ ଇରାନର ପ୍ରଭାବ କ୍ରମଶଃ ବଢ଼ୁଥିବା ନେଇ ନୂଆ ସାମୁଦ୍ରିକ ତଥ୍ୟ ସାମ୍ନାକୁ ଆସିଛି। ଗତ ତିନି ଦିନର ମେରିଟାଇମ୍ ଟ୍ରାଫିକ୍ ବିଶ୍ଳେଷଣରୁ ଜଣାପଡ଼ିଛି ଯେ, ହର୍ମୁଜ୍ ପ୍ରଣାଳୀ ଦେଇ ଯାତାୟାତ କରୁଥିବା ଅଧିକାଂଶ ବାଣିଜ୍ୟିକ ଜାହାଜ ତେହେରାନ ନିର୍ଦ୍ଧାରିତ ମାର୍ଗ ବ୍ୟବହାର କରୁଛନ୍ତି।

ମେରିଟାଇମ୍ ଇଣ୍ଟେଲିଜେନ୍ସ ସଂସ୍ଥା ମାରିସ୍କ (Marisks) ପକ୍ଷରୁ ପ୍ରକାଶିତ ତଥ୍ୟ ଅନୁଯାୟୀ, ଏହି ସମୟ ମଧ୍ୟରେ ଗୋଟିଏ ବି ଜାହାଜ ଓମାନ ଉପକୂଳ ଦେଇ ଆମେରିକା ପରାମର୍ଶ ଦେଇଥିବା ବିକଳ୍ପ ମାର୍ଗ ବ୍ୟବହାର କରିନାହିଁ।

ଆମେରିକୀୟ ସମ୍ବାଦମାଧ୍ୟମ CNNର ରିପୋର୍ଟ ଅନୁସାରେ, ଶନିବାରରୁ ସୋମବାର ମଧ୍ୟରେ ୭୮ଟି ଜାହାଜ ହର୍ମୁଜ୍ ପ୍ରଣାଳୀ ଦେଇ ଯାତାୟାତ କରିଥିଲା। ସେଥିରୁ ୨୦ଟି ଇରାନୀ ପତାକା ବିଶିଷ୍ଟ ଜାହାଜ ଥିବା ବେଳେ, ବାକି ୫୮ଟି ବିଦେଶୀ ଜାହାଜ ମଧ୍ୟ ଇରାନ ନିର୍ଦ୍ଧାରିତ କରିଡର ଦେଇ ଯାତ୍ରା କରିଥିଲେ।

ରିପୋର୍ଟରେ ଆହୁରି କୁହାଯାଇଛି ଯେ, ଆମେରିକୀୟ ସେନା ପରାମର୍ଶ ଦେଇଥିବା ଦକ୍ଷିଣ ରୁଟ୍ ବ୍ୟବହାର କରି କୌଣସି ଜାହାଜ ଓମାନ ଉପକୂଳ ଦେଇ ଯାଇନଥିଲା। ଏହା ଇରାନର ସାମୁଦ୍ରିକ ପ୍ରଭାବ ବୃଦ୍ଧି ପାଉଥିବାର ସଙ୍କେତ ବୋଲି ଚର୍ଚ୍ଚା ହେଉଛି।

ସର୍ବଶେଷ ସ୍ୱୟଂଚାଳିତ ଜାହାଜ ଚିହ୍ନଟ (AIS) ତଥ୍ୟ ମଧ୍ୟ ଦର୍ଶାଉଛି ଯେ, ପ୍ରତିବନ୍ଧକ ସତ୍ତ୍ୱେ ଅଣ-ଇରାନୀ ବାଣିଜ୍ୟିକ ଜାହାଜ ଇରାନ ନିୟନ୍ତ୍ରିତ ଉତ୍ତର ରୁଟ୍ ଦେଇ ଯାତ୍ରା ଜାରି ରଖିଛନ୍ତି।

ଅନ୍ୟପଟେ, ସାମୁଦ୍ରିକ ବିଶ୍ଳେଷଣ ସଂସ୍ଥା ୱିଣ୍ଡୱାର୍ଡ (Windward) ମଧ୍ୟ କହିଛି ଯେ ରବିବାର ଅନେକ ଜାହାଜ ଇରାନ ନିୟନ୍ତ୍ରିତ ରୁଟ୍ ବ୍ୟବହାର କରିଥିଲେ। ଇରାନର ସରକାରୀ ଟିଭି IRIB ଦାବି କରିଛି ଯେ, ଦକ୍ଷିଣ ମାର୍ଗରେ ଯିବାକୁ ଚେଷ୍ଟା କରୁଥିବା କିଛି ଜାହାଜର ଗତିପଥ ଇରାନୀ ସେନା ପରିବର୍ତ୍ତନ କରିଥିଲା।

ଏହାସହିତ ଆମେରିକାର ପ୍ରତିବନ୍ଧକ ସତ୍ତ୍ୱେ ଇରାନର ତେଲ ରପ୍ତାନି ଜାରି ରହିଥିବା ଜଣାପଡ଼ିଛି। ୱିଣ୍ଡୱାର୍ଡର ତଥ୍ୟ ଅନୁଯାୟୀ, ଇରାନର ଖାର୍ଗ ଦ୍ୱୀପ ତେଲ ଟର୍ମିନାଲରେ ରବିବାର ୨୪ଟି ତେଲ ଟ୍ୟାଙ୍କର ଲୋଡିଂ ପାଇଁ ଅପେକ୍ଷା କରୁଥିଲା, ଯାହା ପୂର୍ବ ଦିନ ତୁଳନାରେ ଅଧିକ।