ଅନେକ ଭାରତୀୟ ସ୍ୱଇଚ୍ଛାରେ ରୁଷ ସେନାରେ ଯୋଗ ଦେଉଛନ୍ତି! ସୁପ୍ରିମକୋର୍ଟରେ କେନ୍ଦ୍ରର ବଡ଼ ବୟାନ

ନୂଆଦିଲ୍ଲୀ: ରୁଷ ସେନାରେ ଭାରତୀୟ ନାଗରିକଙ୍କ ଯୋଗଦାନକୁ ନେଇ ଏକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି। କେତେକ ଭାରତୀୟ ନାଗରିକ ସ୍ୱଇଚ୍ଛାରେ ରୁଷ ସେନାରେ ଯୋଗ ଦେଉଥିବା ବେଳେ, ସରକାରୀ ଉଦ୍ୟମରେ ସେନାରୁ ମୁକ୍ତ ହୋଇ ଭାରତ ଫେରିଥିବା କିଛି ବ୍ୟକ୍ତି ପୁଣି ରୁଷ ସେନାରେ ଯୋଗ ଦେଇଥିବା ଏବଂ ବର୍ତ୍ତମାନ ସେମାନଙ୍କ ସନ୍ଧାନ ମିଳୁନଥିବା କଥା କେନ୍ଦ୍ର ସରକାର ସୁପ୍ରିମକୋର୍ଟଙ୍କୁ ଜଣାଇଛନ୍ତି।

ଅକ୍ଟୋବର ୧୫ରେ ବୈଦେଶିକ ମନ୍ତ୍ରଣାଳୟର ଏକ ସ୍ଥିତି ରିପୋର୍ଟ ସୁପ୍ରିମକୋର୍ଟଙ୍କ ଖଣ୍ଡପୀଠ ସମ୍ମୁଖରେ ଉପସ୍ଥାପନ କରାଯାଇଥିଲା। ଅତିରିକ୍ତ ସଲିସିଟର ଜେନେରାଲ୍ ଐଶ୍ୱର୍ଯ୍ୟା ଭାଟି ସରକାରଙ୍କ ପକ୍ଷ ରଖି ଏହି ସୂଚନା ଦେଇଥିଲେ। ଦ ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁସାରେ, ଏହି ମାମଲାରେ ସରକାର ଭାରତୀୟଙ୍କ ସୁରକ୍ଷା ଓ ସେମାନଙ୍କୁ ଫେରାଇ ଆଣିବାର ଉଦ୍ୟମ ସମ୍ପର୍କରେ ଅଦାଲତଙ୍କୁ ଅବଗତ କରାଇଛନ୍ତି।

ଟଙ୍କା ଓ ଆର୍ଥିକ ସୁବିଧା ପାଇଁ ସେନାରେ ଯୋଗଦାନ

କେନ୍ଦ୍ର ସରକାରଙ୍କ ରିପୋର୍ଟ ଅନୁସାରେ, କିଛି ଭାରତୀୟ ନାଗରିକ ଆର୍ଥିକ ଲାଭ ପାଇବା ଆଶାରେ ରୁଷ ସଶସ୍ତ୍ର ବାହିନୀରେ ଯୋଗଦେବାକୁ ସ୍ୱଇଚ୍ଛାରେ ଆଗ୍ରହ ପ୍ରକାଶ କରୁଛନ୍ତି। ପରେ ଭାରତ ସରକାରଙ୍କ ସହାୟତା ନେଇ ସେନାରୁ ମୁକ୍ତି ପାଇବାର ଆଶା ମଧ୍ୟ କିଛି ଲୋକ ରଖୁଥିବା କଥା ସରକାର କହିଛନ୍ତି।

ବୈଦେଶିକ ମନ୍ତ୍ରଣାଳୟ ଅନୁସାରେ, ପର୍ଯ୍ୟଟକ, ଛାତ୍ର କିମ୍ବା କାର୍ଯ୍ୟଭିତ୍ତିକ ଭିସାରେ ରୁଷ ଯାଉଥିବା କିଛି ଭାରତୀୟ ସେଠାରେ ଅସ୍ଥାୟୀ ଆର୍ଥିକ ସୁବିଧା ପାଇଁ ସେନାରେ ଯୋଗଦେବାକୁ ଆଗ୍ରହ ଦେଖାଉଛନ୍ତି।

ଏହା ବ୍ୟତୀତ, କିଛି ବ୍ୟକ୍ତି ଭାରତୀୟ ନାଗରିକତା ଛାଡ଼ି ରୁଷର ପାସପୋର୍ଟ ନେବା ଏବଂ ପରେ ରୁଷ ସେନାରେ ନିଯୁକ୍ତି ପାଇବା ପାଇଁ ଭାରତୀୟ କର୍ତ୍ତୃପକ୍ଷଙ୍କ ନିକଟରେ ଆବେଦନ କରିଥିବା ଘଟଣା ମଧ୍ୟ ସାମ୍ନାକୁ ଆସିଛି ବୋଲି ରିପୋର୍ଟରେ ଉଲ୍ଲେଖ ରହିଛି।

ମୁକ୍ତ ହେବା ପରେ ପୁଣି ରୁଷ ସେନାରେ ଯୋଗଦାନ

ଏହି ମାମଲାର ସବୁଠାରୁ ଚିନ୍ତାଜନକ ଦିଗ ହେଉଛି, ଭାରତ ସରକାର ଓ ଭାରତୀୟ ଦୂତାବାସର କୂଟନୈତିକ ଉଦ୍ୟମ ପରେ ରୁଷ ସେନାରୁ ମୁକ୍ତ ହୋଇ ଭାରତ ଫେରିଥିବା କିଛି ବ୍ୟକ୍ତି ପୁଣି ରୁଷ ସେନାରେ ଯୋଗ ଦେଇଥିବା ଅଭିଯୋଗ ରହିଛି। ସେମାନଙ୍କ ମଧ୍ୟରୁ କିଛି ଲୋକଙ୍କ ସହ ଆଉ ଯୋଗାଯୋଗ କରିହେଉନାହିଁ ବୋଲି ସରକାର ସୁପ୍ରିମକୋର୍ଟଙ୍କୁ ଜଣାଇଛନ୍ତି।

ଏହି ଘଟଣା ରୁଷ-ୟୁକ୍ରେନ୍ ଯୁଦ୍ଧ ପରିପ୍ରେକ୍ଷୀରେ ବିଦେଶୀ ସେନାରେ ଭାରତୀୟଙ୍କ ନିଯୁକ୍ତି, ସେମାନଙ୍କ ସୁରକ୍ଷା ଏବଂ ଫେରାଇ ଆଣିବା ପ୍ରକ୍ରିୟାକୁ ନେଇ ନୂଆ ଚିନ୍ତା ସୃଷ୍ଟି କରିଛି।

ଭାରତ ସରକାରଙ୍କ ପକ୍ଷରୁ ପୂର୍ବରୁ ମଧ୍ୟ ଚେତାବନୀ

ରୁଷ ସେନାରେ ଯୋଗଦେବା ପାଇଁ ଅଜଣା ଏଜେଣ୍ଟ କିମ୍ବା ଅବିଶ୍ୱସନୀୟ ଚାକିରି ପ୍ରସ୍ତାବର ପ୍ରଲୋଭନରେ ନ ପଡ଼ିବାକୁ ଭାରତର ବୈଦେଶିକ ମନ୍ତ୍ରଣାଳୟ ପୂର୍ବରୁ ଭାରତୀୟ ନାଗରିକଙ୍କୁ ସତର୍କ କରିଛି।

ସେପ୍ଟେମ୍ବର ୩୦ରେ ଜାରି ଏକ ପରାମର୍ଶରେ ମନ୍ତ୍ରଣାଳୟ ଏହି ପଥକୁ ବିପଜ୍ଜନକ ବୋଲି କହିବା ସହ ଏଭଳି ନିଯୁକ୍ତିରୁ ଦୂରେଇ ରହିବାକୁ ଜୋର ଦେଇଥିଲା। ଯୁଦ୍ଧକ୍ଷେତ୍ରରେ ଜୀବନ ପ୍ରତି ଗୁରୁତର ବିପଦ ରହିଥିବାରୁ ଯେକୌଣସି ବିଦେଶୀ ଚାକିରି ପ୍ରସ୍ତାବ ଗ୍ରହଣ କରିବା ପୂର୍ବରୁ ତାହାର ସତ୍ୟତା ଯାଞ୍ଚ କରିବାକୁ ମନ୍ତ୍ରଣାଳୟ ପରାମର୍ଶ ଦେଇଛି।

ସରକାର କହିଛନ୍ତି ଯେ, ରୁଷ କର୍ତ୍ତୃପକ୍ଷଙ୍କ ସହ ଆଲୋଚନା ଜାରି ରହିଛି। ରୁଷ ସେନାରେ ଥିବା ଭାରତୀୟ ନାଗରିକଙ୍କ ସୁରକ୍ଷା, ମୁକ୍ତି ଏବଂ ଭାରତକୁ ଫେରାଇ ଆଣିବା ପାଇଁ କୂଟନୈତିକ ସ୍ତରରେ ଉଦ୍ୟମ କରାଯାଉଛି।