ଆମେରିକାର ଜର୍ଜିଆ ରାଜ୍ୟରେ ଏକ ଚାଞ୍ଚଲ୍ୟକର ଗୁଳିକାଣ୍ଡ ଘଟଣା ସାମ୍ନାକୁ ଆସିଛି। ଭାରତୀୟ ମୂଳର ୫୭ ବର୍ଷୀୟା ଶୀତଲ ୱ୍ରେଜିଏନ୍, ଯିଏ ଗୁଗୁଲ୍ରେ ବରିଷ୍ଠ ଇଞ୍ଜିନିୟର ଭାବେ କାର୍ଯ୍ୟରତ ଥିଲେ, ଗୁଳିକାଣ୍ଡରେ ପ୍ରାଣ ହରାଇଛନ୍ତି।

ପୋଲିସ ସୂଚନା ଅନୁସାରେ, କବ୍ କାଉଣ୍ଟିସ୍ଥିତ ତାଙ୍କ ଘରେ ମଙ୍ଗଳବାର ରାତିରେ ଗୁଳିଚାଳନା ହୋଇଥିଲା। ଘଟଣାସ୍ଥଳରେ ପହଞ୍ଚି ପୋଲିସ ଘର ବାହାରୁ ଶୀତଲଙ୍କ ପୁଅ ଜେସନ୍ ୱ୍ରେଜିଏନ୍ଙ୍କୁ ଗୁଳିବିଦ୍ଧ ଅବସ୍ଥାରେ ଉଦ୍ଧାର କରିଥିଲା। ତାଙ୍କୁ ତୁରନ୍ତ ହସ୍ପିଟାଲ ପଠାଯାଇଥିଲା। ଘର ଭିତରୁ ଶୀତଲଙ୍କ ମୃତଦେହ ମିଳିଥିଲା ଏବଂ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ଘଟଣା ପରେ ପୋଲିସ ଶୀତଲଙ୍କ ସ୍ୱାମୀ କିର୍କ ବି. ୱ୍ରେଜିଏନ୍ଙ୍କୁ ଗିରଫ କରିଛି। ତାଙ୍କ ବିରୋଧରେ ହତ୍ୟା, ଦୁଇଟି ଗୁରୁତର ଆକ୍ରମଣ ଏବଂ ଅପରାଧ ସମୟରେ ବେଆଇନ ଅସ୍ତ୍ର ରଖିବା ଭଳି ଅଭିଯୋଗ ଲାଗିଛି। ବର୍ତ୍ତମାନ ସେ କବ୍ କାଉଣ୍ଟି ଡିଟେନ୍ସନ୍ ସେଣ୍ଟରରେ ଜାମିନ ବିନା ଅଟକ ଅଛନ୍ତି।

ପ୍ରାଥମିକ ତଦନ୍ତରୁ ପାରିବାରିକ ବିବାଦ କାରଣରୁ ଏହି ଗୁଳିକାଣ୍ଡ ଘଟିଥିବା ପୋଲିସ ଅନୁମାନ କରୁଛି। ତେବେ ହତ୍ୟାର ପ୍ରକୃତ କାରଣ ଜାଣିବା ପାଇଁ ତଦନ୍ତ ଜାରି ରହିଛି।

ଶୀତଲ ୱ୍ରେଜିଏନ୍ ଟେକ୍ନୋଲୋଜି କ୍ଷେତ୍ରରେ ୨୦ ବର୍ଷରୁ ଅଧିକ ଅନୁଭବ ଥିବା ଜଣେ ପ୍ରତିଷ୍ଠିତ ଇଞ୍ଜିନିୟର ଥିଲେ। ଗୁଗୁଲ୍ରେ ଯୋଗଦେବା ପୂର୍ବରୁ ସେ ହୋମ୍ ଡିପୋର ଇ-କମର୍ସ ବ୍ୟବସାୟରେ ଡିଜିଟାଲ୍ ପରିବର୍ତ୍ତନ ପ୍ରକଳ୍ପର ନେତୃତ୍ୱ ନେଇଥିଲେ।

ଭାରତ, ଇଂଲଣ୍ଡ ଓ ଘାନାରେ ବଢ଼ିଥିବା ଶୀତଲ ପରେ ଆମେରିକା ଯାଇ ଜର୍ଜିଆ ଇନଷ୍ଟିଟ୍ୟୁଟ୍ ଅଫ୍ ଟେକ୍ନୋଲୋଜିରୁ କମ୍ପ୍ୟୁଟର ସାଇନ୍ସରେ ଡିଗ୍ରୀ ହାସଲ କରିଥିଲେ। STEM କ୍ଷେତ୍ରରେ ମହିଳାଙ୍କୁ ଉତ୍ସାହିତ କରିବାରେ ସେ ଜଣେ ପ୍ରେରଣାଦାୟକ ମେଣ୍ଟର ଭାବେ ମଧ୍ୟ ପରିଚିତ ଥିଲେ।