ଓଡ଼ିଶା ଉପକୂଳରେ ଭାରତ ଏକ ଶକ୍ତିଶାଳୀ ଇଣ୍ଟରକଣ୍ଟିନେଣ୍ଟାଲ୍ ବାଲିଷ୍ଟିକ୍ ମିସାଇଲ୍ (ICBM) ପରୀକ୍ଷା କରିଥିବା ନେଇ ଚର୍ଚ୍ଚା ଜୋର ଧରିଛି। ଡିଆରଡିଓ (DRDO) ପକ୍ଷରୁ ଏନେଇ ସ୍ପଷ୍ଟ ସୂଚନା ଦିଆଯାଇନଥିଲେ ମଧ୍ୟ, ବେ ଅଫ୍ ବେଙ୍ଗଲରେ ଜାରି ହୋଇଥିବା ବିଶାଳ NOTAM ଏବଂ ଆକାଶରେ ଦେଖାଯାଇଥିବା ଉଜ୍ଜ୍ୱଳ ଟ୍ରେଲ୍କୁ ନେଇ ଏହାକୁ ଏକ ଦୀର୍ଘ ପରିସରର ମିସାଇଲ୍ ପରୀକ୍ଷା ବୋଲି କୁହାଯାଉଛି।

ଏହି ପରୀକ୍ଷାକୁ ଅଗ୍ନି-୬ ମିସାଇଲ୍ ସହ ଯୋଡ଼ାଯାଉଥିଲେ ମଧ୍ୟ, ପ୍ରତିରକ୍ଷା ସୂତ୍ରରୁ ମିଳିଥିବା ସୂଚନା ଅନୁସାରେ ଏହା ସମ୍ପୂର୍ଣ୍ଣ ଭାବେ ଅଗ୍ନି-୬ ନୁହେଁ। ତେବେ ଏହା ICBM ଶ୍ରେଣୀର ଏକ ମିସାଇଲ୍ ବୋଲି ଆଲୋଚନା ହେଉଛି। କିଛି ବିଶେଷଜ୍ଞଙ୍କ ମତରେ ଏହା ଅଗ୍ନି-୫ ର ଅପଗ୍ରେଡେଡ୍ ଭାର୍ସନ୍ କିମ୍ବା ନୂତନ ପ୍ରଯୁକ୍ତିର ଡେମୋ ହୋଇପାରେ।

ରିପୋର୍ଟ ଅନୁସାରେ, ମିସାଇଲ୍ଟି ଓଡ଼ିଶାର ଅବଦୁଲ କଲାମ ଦ୍ୱୀପ ନିକଟସ୍ଥ ଇଣ୍ଟିଗ୍ରେଟେଡ୍ ଟେଷ୍ଟ ରେଞ୍ଜରୁ ପରୀକ୍ଷା କରାଯାଇଥିଲା। ବେ ଅଫ୍ ବେଙ୍ଗଲରେ ପ୍ରାୟ ୩୫୦୦ କିଲୋମିଟର ଅଞ୍ଚଳକୁ ନୋ-ଫ୍ଲାଇ ଜୋନ୍ କରାଯାଇଥିଲା। ଏହାକୁ ଭାରତର ସାମରିକ କ୍ଷମତାରେ ବଡ଼ ସଫଳତା ବୋଲି ଦେଖାଯାଉଛି।

ଅଗ୍ନି-୬ ମିସାଇଲ୍କୁ ଭାରତର ସବୁଠାରୁ ଆଧୁନିକ ଦୀର୍ଘ ପରିସରର ମିସାଇଲ୍ ବୋଲି ଧରାଯାଉଛି, ଯାହାର ରେଞ୍ଜ ୧୦,୦୦୦ କିଲୋମିଟରରୁ ଅଧିକ ହୋଇପାରେ। ଏହା MIRV ପ୍ରଯୁକ୍ତି ସହିତ ଏକାଧିକ ଟାର୍ଗେଟକୁ ଆକ୍ରମଣ କରିପାରିବ ବୋଲି କୁହାଯାଉଛି।