ଭାରତରେ ଫ୍ଲୁ ଓ ମଶାବାହିତ ରୋଗକୁ ନେଇ ସ୍ୱାସ୍ଥ୍ୟ ଚିନ୍ତା ବଢ଼ିଛି। WHOର ସଦ୍ୟତମ ସର୍ଭେଲାନ୍ସ ତଥ୍ୟ ଅନୁସାରେ, ଭାରତରେ ଚିହ୍ନଟ ହେଉଥିବା ଇନ୍ଫ୍ଲୁଏଞ୍ଜା ମଧ୍ୟରେ H1N1 ପ୍ରମୁଖ ଷ୍ଟ୍ରେନ୍ ଭାବେ ଉଭା ହୋଇଛି। ସେପ୍ଟେମ୍ବର ୧ରୁ ୧୪ ପର୍ଯ୍ୟନ୍ତର ତଥ୍ୟକୁ ଆଧାର କରି WHO ରିପୋର୍ଟ ପ୍ରସ୍ତୁତ କରିଥିଲା ଏବଂ ସେପ୍ଟେମ୍ବର ୨୧ରେ ଏହା ଅପଡେଟ୍ ହୋଇଥିଲା।

ତଥ୍ୟ ଅନୁସାରେ, ଭାରତରେ ଇନ୍ଫ୍ଲୁଏଞ୍ଜା ପଜିଟିଭ୍ ନମୁନାର ପ୍ରାୟ୭୫%ରେ A(H1N1)pdm09ଚିହ୍ନଟ ହୋଇଛି। ଦକ୍ଷିଣ-ପୂର୍ବ ଏସିଆ ଅଞ୍ଚଳରେ ଏହି ହାର ପ୍ରାୟ ୫୦% ଥିବାରୁ ଭାରତରେ H1N1ର ପ୍ରାଧାନ୍ୟ ଅଧିକ ଦେଖାଯାଇଛି।

WHO ତଥ୍ୟରେ ଭାରତ ବ୍ୟତୀତ ଭୁଟାନ ଓ ଥାଇଲାଣ୍ଡରେ ମଧ୍ୟ H1N1 ପ୍ରମୁଖ ଇନ୍ଫ୍ଲୁଏଞ୍ଜା ଷ୍ଟ୍ରେନ୍ ଭାବେ ଚିହ୍ନଟ ହୋଇଛି। ଭୁଟାନରେ ପଜିଟିଭ୍ ନମୁନାର ୯୭% ଏବଂ ଥାଇଲାଣ୍ଡରେ ୭୪% ନମୁନାରେ ଏହି ଷ୍ଟ୍ରେନ୍ ମିଳିଥିଲା।

ବିଶେଷଜ୍ଞମାନଙ୍କ ଅନୁସାରେ, ବୟସ୍କ ବ୍ୟକ୍ତି, ଛୋଟ ପିଲା, ଗର୍ଭବତୀ ମହିଳା ଏବଂ ପୂର୍ବରୁ ଅନ୍ୟ ରୋଗରେ ପୀଡ଼ିତ ଲୋକଙ୍କ କ୍ଷେତ୍ରରେ ଫ୍ଲୁ ଜଟିଳତାର ଆଶଙ୍କା ଅଧିକ ରହିପାରେ। ଫ୍ଲୁ ଟିକାକରଣ, ହାତ ସଫା ରଖିବା ଓ ଶ୍ୱାସକ୍ରିୟା ସମ୍ବନ୍ଧୀୟ ସ୍ୱଚ୍ଛତା ପାଳନ ଉପରେ ଗୁରୁତ୍ୱ ଦିଆଯାଇଛି।

ଏହା ସହିତ ମୌସୁମୀ ପରିବର୍ତ୍ତନ ଓ ବର୍ଷା ପରେ ଡେଙ୍ଗୁ ଭଳି ମଶାବାହିତ ରୋଗ ମଧ୍ୟ ଚିନ୍ତାର କାରଣ ହୋଇଛି। ଦିଲ୍ଲୀ ସମେତ ଦେଶର ବିଭିନ୍ନ ଅଞ୍ଚଳରେ H1N1 ଓ ଅନ୍ୟାନ୍ୟ ଫ୍ଲୁ ସଂକ୍ରମଣ ବଢ଼ିଥିବା ରିପୋର୍ଟ ଆସିଛି।

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ମଧ୍ୟ H1N1 ପରିସ୍ଥିତି ଉପରେ ନଜର ରଖିବା, ମଜବୁତ ସର୍ଭେଲାନ୍ସ ଓ ହସ୍ପିଟାଲ୍ଗୁଡ଼ିକର ପ୍ରସ୍ତୁତି ବଜାୟ ରଖିବା ଉପରେ ଜୋର ଦେଇଛି।