ହର୍ମୁଜ୍ ପ୍ରଣାଳୀରେ ବାଣିଜ୍ୟିକ ଜାହାଜ ଉପରେ ଆକ୍ରମଣ ଘଟଣାକୁ ନେଇ ଭାରତ ଜାତିସଂଘ ସୁରକ୍ଷା ପରିଷଦରେ କଠୋର ମତ ପ୍ରକାଶ କରିଛି। ଭାରତ ଏପରି ଆକ୍ରମଣକୁ ନିନ୍ଦା କରି ମୁକ୍ତ ନୌଚାଳନା ଓ ବାଣିଜ୍ୟିକ ଯାତାୟାତ ପୁନଃସ୍ଥାପନ ପାଇଁ ଆହ୍ୱାନ ଜଣାଇଛି।

ଜାତିସଂଘରେ ଭାରତର ଉପ-ସ୍ଥାୟୀ ପ୍ରତିନିଧି ଯୋଜନା ପଟେଲ କହିଛନ୍ତି ଯେ ବାଣିଜ୍ୟିକ ଜାହାଜକୁ ସାମରିକ ଲକ୍ଷ୍ୟ କରାଯିବା ଅଗ୍ରହଣୀୟ ଏବଂ ଏପରି ପଦକ୍ଷେପ ଅତ୍ୟନ୍ତ ନିନ୍ଦନୀୟ। ସେ କୌଣସି ଦେଶର ନାମ ନେଇନଥିଲେ ମଧ୍ୟ ମାର୍ଚ୍ଚ ୧୧ରେ ଗୃହୀତ ସୁରକ୍ଷା ପରିଷଦ ପ୍ରସ୍ତାବ ୨୮୧୭ର ଉଲ୍ଲେଖ କରି ଇରାନ ପ୍ରତି ପରୋକ୍ଷ ସନ୍ଦେଶ ଦେଇଥିଲେ।

ଭାରତ କହିଛି, ହର୍ମୁଜ୍ ପ୍ରଣାଳୀ କେବଳ ଅଞ୍ଚଳୀୟ ନୁହେଁ, ବରଂ ବିଶ୍ୱ ଶକ୍ତି ସୁରକ୍ଷା ଓ ଅର୍ଥନୈତିକ ସ୍ଥିରତା ପାଇଁ ମୁଖ୍ୟ ସଂଯୋଗ ମାର୍ଗ। ଭାରତର ବାଣିଜ୍ୟ, ତେଲ ଆମଦାନି ଏବଂ ଶକ୍ତି ଯୋଗାଣ ବ୍ୟବସ୍ଥା ଏହି ରୁଟ୍ ସହ ଗଭୀର ଭାବେ ଜଡିତ।

ରିପୋର୍ଟ ଅନୁଯାୟୀ, ଆକ୍ରମଣରେ ଭାରତୀୟ ନାବିକଙ୍କ ମୃତ୍ୟୁ ଘଟିଥିବାରୁ ଭାରତ ଏହି ଘଟଣାକୁ ଗଭୀର ଚିନ୍ତାର ସହ ନେଇଛି। ଉପସାଗରୀୟ ଅଞ୍ଚଳରେ ଥିବା ପ୍ରାୟ ୧୦ ନିୟୁତ ଭାରତୀୟଙ୍କ ସୁରକ୍ଷା ମଧ୍ୟ ଭାରତ ପାଇଁ ବଡ଼ ଚିନ୍ତାର ବିଷୟ ବୋଲି କୁହାଯାଇଛି।

ଭାରତ ଏହି ପରିସ୍ଥିତିରେ ଆଲୋଚନା ଓ କୂଟନୀତି ମାଧ୍ୟମରେ ଉତ୍ତେଜନା କମାଇବାକୁ ଜୋର ଦେଇଛି। ମଧ୍ୟପ୍ରାଚ୍ୟର ସ୍ଥିରତା ଓ ନୌଚାଳନା ସୁରକ୍ଷା ରକ୍ଷାରେ ଭାରତ ନିଜର ଦୃଢ଼ ଭୂମିକା ପୁଣିଥରେ ସ୍ପଷ୍ଟ କରିଛି।