ନୂଆଦିଲ୍ଲୀ: ଭାରତରେ ଇଲେକ୍ଟ୍ରିକ୍ ଯାନ ବିକ୍ରି ବଢ଼ିବା ନେଇ ଉତ୍ସାହ ମଧ୍ୟରେ ଚୀନ୍‌ରୁ ବ୍ୟାଟେରୀ ଆମଦାନି ମଧ୍ୟ ବଢ଼ିଚାଲିଛି। ବିଶ୍ୱ ବ୍ୟାଟେରୀ ବଜାରରେ ଚୀନ୍‌ର ପ୍ରଭାବଶାଳୀ ସ୍ଥାନ ଥିବାରୁ ଭାରତର EV ବଜାର ବୃଦ୍ଧି ସହ ଚୀନ୍‌ରୁ ବ୍ୟାଟେରୀ ଆମଦାନିର ନିର୍ଭରତା ମଧ୍ୟ ବଢ଼ୁଛି। 

ସରକାରୀ ବାଣିଜ୍ୟ ତଥ୍ୟ ଅନୁସାରେ, ଏପ୍ରିଲ-ଅଗଷ୍ଟ ମଧ୍ୟରେ ଚୀନ୍‌ରୁ ଭାରତର ବ୍ୟାଟେରୀ ଆମଦାନି ପ୍ରାୟ ଦୁଇଗୁଣ ବଢ଼ି ୨.୯ ବିଲିୟନ ଡଲାର ହୋଇଛି। ଏହା ଚଳିତ ବର୍ଷ ଚୀନ୍‌ରୁ ଭାରତର ଷଷ୍ଠ ସର୍ବାଧିକ ଆମଦାନି ଶ୍ରେଣୀରେ ପହଞ୍ଚିଛି। ଅଧିକ ଆମଦାନି ଯୋଗୁଁ ବ୍ୟାଟେରୀ ଇଲେକ୍ଟ୍ରୋନିକ୍ ଯନ୍ତ୍ରପାତି, ବିଦ୍ୟୁତ୍ ମେସିନାରୀ, ପ୍ଲାଷ୍ଟିକ୍ କଞ୍ଚାମାଲ ଏବଂ କିଛି ରାସାୟନିକ ସାମଗ୍ରୀକୁ ମଧ୍ୟ ପଛରେ ପକାଇଛି। 

ଭାରତରେ ଅଳ୍ପ କିଛି ବ୍ୟାଟେରୀ ନିର୍ମାତା ଉତ୍ପାଦନ ଆରମ୍ଭ କରିଥିଲେ ମଧ୍ୟ ଚୀନ୍‌ରୁ ଆମଦାନି ହେଉଥିବା ସେଲ୍‌କୁ ପ୍ୟାକ୍ କରିବା ଉପରେ ଅନେକ କମ୍ପାନୀ ନିର୍ଭର କରୁଛନ୍ତି। ଦେଶୀୟ ବ୍ୟାଟେରୀ ନିର୍ମାଣରେ ବଡ଼ ପ୍ରଯୁକ୍ତିଗତ ଅଗ୍ରଗତି ନ ହେଲେ ଚୀନ୍‌ରୁ ଆମଦାନି ଆଗକୁ ଆହୁରି ବଢ଼ିପାରେ। 

କେବଳ ବ୍ୟାଟେରୀ ନୁହେଁ, ଦୁଇ ଓ ତିନିଚକିଆ ଯାନର ଆମଦାନି ମଧ୍ୟ ବହୁତ ବଢ଼ିଛି। ଏପ୍ରିଲ-ଅଗଷ୍ଟ ମଧ୍ୟରେ ଏହି ଯାନଗୁଡ଼ିକର ଚୀନ୍‌ରୁ ଆମଦାନି ୧୦୭ ମିଲିୟନ ଡଲାରରେ ପହଞ୍ଚିଛି, ଯାହା ଗତବର୍ଷ ସମାନ ସମୟରେ ମାତ୍ର ୨ ମିଲିୟନ ଡଲାର ଥିଲା। 

ସେହିପରି, ଚଳିତ ଆର୍ଥିକ ବର୍ଷର ପ୍ରଥମ ପାଞ୍ଚ ମାସରେ ଚୀନ୍‌ରୁ କାର୍ ଆମଦାନି ୨.୬ ଗୁଣ ବଢ଼ି ୨୨୬ ମିଲିୟନ ଡଲାର ହୋଇଛି। ଗତବର୍ଷ ସମାନ ସମୟରେ ଏହା ୮୭ ମିଲିୟନ ଡଲାର ଥିଲା। ଏହି ବୃଦ୍ଧିରେ BYD ଭଳି କମ୍ପାନୀର ଭୂମିକା ଥାଇପାରେ ବୋଲି ରିପୋର୍ଟରେ ଉଲ୍ଲେଖ ହୋଇଛି। 

ଏହା ବ୍ୟତୀତ ଚୀନ୍‌ରୁ ତେଲ ଉତ୍ପାଦ, ଡାଇ ଇଣ୍ଟରମିଡିଏଟ୍ ଏବଂ ବଲ୍କ ମିନେରାଲ୍ସର ଆମଦାନି ମଧ୍ୟ ବଢ଼ିଛି। ତେବେ ଇଲେକ୍ଟ୍ରୋନିକ୍ସ, ମେସିନାରୀ, କେମିକାଲ୍ସ ଏବଂ ପ୍ଲାଷ୍ଟିକ୍ ଭଳି କ୍ଷେତ୍ର ଚୀନ୍‌ରୁ ହେଉଥିବା ଭାରତର ମୋଟ ଆମଦାନିର ପ୍ରାୟ ତିନି-ଚତୁର୍ଥାଂଶ ଅଂଶ ଗଠନ କରୁଛି। 

ଚୀନ୍‌ରୁ ମୋବାଇଲ୍, ଟେଲିକମ୍ ଉପକରଣ ଓ ଇଲେକ୍ଟ୍ରୋନିକ୍ କମ୍ପୋନେଣ୍ଟ ଆମଦାନି ମଧ୍ୟ ବଢ଼ିଛି। ପ୍ରଥମ ପାଞ୍ଚ ମାସରେ ଟେଲିକମ୍ ଉପକରଣ ଏବଂ ଇଲେକ୍ଟ୍ରୋନିକ୍ କମ୍ପୋନେଣ୍ଟ ଆମଦାନିରେ ୪୦%ରୁ ଅଧିକ ବୃଦ୍ଧି ହୋଇଛି। ଏହାର ପ୍ରଭାବରେ ଚୀନ୍ ସହ ଭାରତର ବାଣିଜ୍ୟ ନିଅଣ୍ଟ ପ୍ରାୟ ୫୬ ବିଲିୟନ ଡଲାରକୁ ବଢ଼ିଛି, ଯାହା ଗତବର୍ଷ ଏହି ସମୟରେ ୪୪.୭ ବିଲିୟନ ଡଲାର ଥିଲା। 

ଭାରତ ଚୀନ୍‌ରୁ ଆସୁଥିବା ସାମଗ୍ରୀର ବିକଳ୍ପ ଦେଶ ଭିତରେ ତିଆରି କରିବାକୁ ଚାହୁଁଥିଲେ ମଧ୍ୟ ଚୀନ୍‌ର ବଡ଼ ପରିମାଣର ଉତ୍ପାଦନ ଯୋଗୁଁ ମିଳୁଥିବା ଖର୍ଚ୍ଚ ସୁବିଧା ଏବଂ ସରକାରୀ ସବସିଡି ଯୋଗୁଁ ଏହା ସହଜ ନୁହେଁ। ଅର୍ଥନୀତି ବିଶେଷଜ୍ଞ ଓ ବାଣିଜ୍ୟ ବିଶେଷଜ୍ଞମାନେ ଦେଶରେ ବିଭିନ୍ନ ଶିଳ୍ପର ଘରୋଇ ଉତ୍ପାଦନ କ୍ଷମତା ବଢ଼ାଇବା ଏବଂ local manufacturingକୁ ଆହୁରି ଗଭୀର କରିବାର ଆବଶ୍ୟକତା ଉପରେ ଜୋର ଦେଇଛନ୍ତି।