ଜି-୭ ସମ୍ମିଳନୀ ଅବସରରେ ଏଭିଆନରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କାନାଡାର ପ୍ରଧାନମନ୍ତ୍ରୀ ମାର୍କ କାର୍ନିଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ଦ୍ୱିପାକ୍ଷିକ ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ ଚଳିତ ବର୍ଷ ମାର୍ଚ୍ଚ ମାସରେ ପ୍ରଧାନମନ୍ତ୍ରୀ କାର୍ନିଙ୍କ ଭାରତ ଗସ୍ତ ପରଠାରୁ ଦୁଇ ଦେଶ ମଧ୍ୟରେ ସମ୍ପର୍କରେ ହୋଇଥିବା ଅଗ୍ରଗତିର ସମୀକ୍ଷା କରାଯାଇଥିଲା।

କାନାଡା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି ବିବୃତ୍ତି ଅନୁସାରେ, ଉଭୟ ନେତା ଦ୍ୱିପାକ୍ଷିକ ଆର୍ଥିକ ସହଯୋଗର ଅଗ୍ରଗତି ଉପରେ ଆଲୋଚନା କରିଥିଲେ। ଏଥିରେ LNG, LPG ଓ ମେଟାଲର୍ଜିକାଲ୍ କୋଇଲା ସମ୍ବନ୍ଧୀୟ ବାଣିଜ୍ୟିକ ବ୍ୟବସ୍ଥାର ବିକାଶ ସାମିଲ ଥିଲା।

ଦୁଇ ଦେଶ ମଧ୍ୟରେ ଉଚ୍ଚସ୍ତରୀୟ ଗସ୍ତ ବିନିମୟର ଗତିବିଧିକୁ ନେଇ ଉଭୟ ନେତା ସନ୍ତୋଷ ପ୍ରକାଶ କରିଥିଲେ। ସେମାନେ ୨୦୨୬ ମସିହାରେ କାନାଡାର ଆନ୍ତର୍ଜାତିକ ବାଣିଜ୍ୟ ମନ୍ତ୍ରୀ ମନିନ୍ଦର ସିଦ୍ଧୁଙ୍କ ନେତୃତ୍ୱରେ ଭାରତ ଗସ୍ତ କରିବାକୁ ଥିବା ବାଣିଜ୍ୟିକ ପ୍ରତିନିଧି ଦଳକୁ ନେଇ ମଧ୍ୟ ଆଶାବାଦୀ ମନୋଭାବ ପ୍ରକାଶ କରିଥିଲେ।

ବୈଠକରେ ସମଗ୍ର ଆର୍ଥିକ ସହଭାଗିତା ଚୁକ୍ତି (Comprehensive Economic Partnership Agreement - CEPA) ଆଲୋଚନାର ଅଗ୍ରଗତିକୁ ନେଇ ଉଭୟ ପକ୍ଷ ସନ୍ତୋଷ ପ୍ରକାଶ କରିଥିଲେ। ଏହା ସହିତ ୨୦୨୬ ମଧ୍ୟରେ ଆଲୋଚନାକୁ ଚୂଡ଼ାନ୍ତ ରୂପ ଦେବା ଲକ୍ଷ୍ୟକୁ ପୁନଃଦୃଢ଼ କରିଥିଲେ।

ପ୍ରଧାନମନ୍ତ୍ରୀ ମୋଦୀ ୨୦୨୬ରେ କାନାଡା ଗସ୍ତ ପାଇଁ ନିମନ୍ତ୍ରଣ ଦେଇଥିବାରୁ ମାର୍କ କାର୍ନିଙ୍କୁ ଧନ୍ୟବାଦ ଜଣାଇଥିଲେ। ଉଭୟ ଦେଶ କୂଟନୀତିକ ସ୍ତରରେ ଆଲୋଚନା ଜାରି ରଖି ଗସ୍ତ ପାଇଁ ଉପଯୁକ୍ତ ସମୟ ନିର୍ଦ୍ଧାରଣ କରିବାକୁ ସହମତ ହୋଇଥିଲେ।

ଦୁଇ ନେତା ଦୁଇ ଦେଶର ସରକାରୀ ସଂସ୍ଥାଗୁଡ଼ିକ ମଧ୍ୟରେ ସମ୍ପର୍କ ମଜବୁତ ହେଉଥିବାକୁ ସ୍ୱାଗତ କରିଥିଲେ। ସମ୍ପ୍ରତି ଆୟୋଜିତ ଯୁଗ୍ମ ବିଜ୍ଞାନ ଓ ପ୍ରଯୁକ୍ତି ସହଯୋଗ କମିଟି ବୈଠକ ଏବଂ କନସୁଲାର ଡାଏଲଗ୍ର ଉଲ୍ଲେଖ କରାଯାଇଥିଲା। ଆଗାମୀ ଦିନରେ ରକ୍ଷା, ଅର୍ଥନୀତି ଏବଂ ପ୍ରବାସନ କ୍ଷେତ୍ରରେ ମଧ୍ୟ ଆଲୋଚନା ବୃଦ୍ଧି କରାଯିବ ବୋଲି ଜଣାପଡ଼ିଛି।

ରକ୍ଷା ଓ ସୁରକ୍ଷା ସହଯୋଗକୁ ଆହୁରି ସୁଦୃଢ଼ କରିବା ପାଇଁ ‘ଜେନେରାଲ୍ ସିକ୍ୟୁରିଟି ଅଫ୍ ଇନଫର୍ମେସନ୍ ଏଗ୍ରିମେଣ୍ଟ’ (GSOIA) ଉପରେ ଆଲୋଚନା ଆରମ୍ଭ କରିବାକୁ ମଧ୍ୟ ଉଭୟ ଦେଶ ସହମତ ହୋଇଛନ୍ତି। ଭାରତର ନ୍ୟାସନାଲ୍ ଡିଫେନ୍ସ କଲେଜ୍ର କାନାଡା ଗସ୍ତ ସମେତ ବିଭିନ୍ନ ରକ୍ଷା ସଂସ୍ଥା ମଧ୍ୟରେ ସମ୍ପ୍ରତି ହୋଇଥିବା ବିନିମୟକୁ ମଧ୍ୟ ସ୍ୱାଗତ କରାଯାଇଛି।

ଉଭୟ ନେତା କାନାଡା-ଭାରତ ଟ୍ୟାଲେଣ୍ଟ ଆଣ୍ଡ ଇନୋଭେସନ୍ ଷ୍ଟ୍ରାଟେଜି ଅଧୀନରେ ଚାଲିଥିବା ସହଯୋଗ ଉପରେ ମଧ୍ୟ ଆଲୋଚନା କରିଥିଲେ। ଏହା ମାଧ୍ୟମରେ କୌଶଳ ବିକାଶ, ନବସୃଜନ ସହଯୋଗ ଏବଂ ଶିକ୍ଷାନୁଷ୍ଠାନଗୁଡ଼ିକ ମଧ୍ୟରେ ସମ୍ପର୍କକୁ ଆହୁରି ମଜବୁତ କରାଯିବ।

ପ୍ରଧାନମନ୍ତ୍ରୀ ମୋଦୀ ଭାରତ ମହାସାଗର ରିମ୍ ଆସୋସିଏସନ୍ (IORA)ରେ କାନାଡାକୁ ଡାଏଲଗ୍ ପାର୍ଟନର ଭାବେ ସାମିଲ କରିବା ପ୍ରତି ଭାରତର ସମର୍ଥନ ମଧ୍ୟ ବ୍ୟକ୍ତ କରିଥିଲେ।

ଏହି ଅବସରରେ ‘ରାଇସିନା ଆମେରିକାସ୍’ ନାମକ ଏକ ନୂତନ ପ୍ଲାଟଫର୍ମ ଗଠନ ଘୋଷଣା କରାଯାଇଥିଲା, ଯାହା ଦୁଇ ଦେଶ ମଧ୍ୟରେ ସଂଳାପ, ସହଯୋଗ ଓ ଆଦାନ-ପ୍ରଦାନକୁ ଆହୁରି ସୁଦୃଢ଼ କରିବ।

ଉଭୟ ନେତା ଏକ ଦୂରଦର୍ଶୀ ରଣନୀତିକ ସହଭାଗିତା ଗଠନ ପାଇଁ ନିଜର ପ୍ରତିବଦ୍ଧତା ଦୋହରାଇବା ସହ ବିଶ୍ୱ ଖାଦ୍ୟ ଓ ଉର୍ଜା ସୁରକ୍ଷା ପାଇଁ ଦୃଢ଼ ଏବଂ ବିଶ୍ୱସନୀୟ ଯୋଗାଣ ଶୃଙ୍ଖଳର ଗୁରୁତ୍ୱ ଉପରେ ଜୋର ଦେଇଥିଲେ।