ଜାତିସଂଘ ସୁରକ୍ଷା ପରିଷଦ (ୟୁଏନଏସସି)ର ଆରିଆ-ଫର୍ମୁଲା ବୈଠକରେ ଭାରତ ପୁରୁଣା ଜାତିସଂଘ ଢାଞ୍ଚାରେ ସଂସ୍କାର ଆଣିବା ଏବଂ ବର୍ତ୍ତମାନ ବିଶ୍ୱ ବାସ୍ତବତା ସହ ସମନ୍ୱୟ ରଖିବା ପାଇଁ ୟୁଏନଏସସିର ଗଠନ ଓ କାର୍ଯ୍ୟପ୍ରଣାଳୀର ପୁନଃସମୀକ୍ଷା ଉପରେ ଜୋର ଦେଇଛି।

ବୈଠକରେ ଭାରତର ସ୍ଥାୟୀ ପ୍ରତିନିଧି ପି. ହରିଶ ଜାତିସଂଘ ଚାର୍ଟରର ଅଧ୍ୟାୟ-୬ ଏବଂ ଅଧ୍ୟାୟ-୭ର କାର୍ଯ୍ୟକାରିତା ସମ୍ପର୍କରେ ମତ ରଖିଥିଲେ। ସେ କହିଥିଲେ ଯେ ଅଧ୍ୟାୟ-୭ ଅନ୍ତର୍ଗତ ଗ୍ରହଣ କରାଯାଉଥିବା ପଦକ୍ଷେପ ସମୟ, ପରିସ୍ଥିତି ଓ ପ୍ରସଙ୍ଗ ଅନୁଯାୟୀ ହୋଇଥାଏ ଏବଂ ସେଗୁଡ଼ିକୁ ସ୍ଥାୟୀ ବୋଲି ଧରାଯିବା ଉଚିତ୍ ନୁହେଁ। ଏହି ପଦକ୍ଷେପର କାର୍ଯ୍ୟକାରିତାରେ ବିଫଳତା ଆନ୍ତର୍ଜାତୀୟ ଶାନ୍ତି ଓ ସୁରକ୍ଷା ପାଇଁ ଗମ୍ଭୀର ପରିଣାମ ଆଣିପାରେ।

ସେହିପରି ଅଧ୍ୟାୟ-୬ ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ଆଲୋଚନା, ମଧ୍ୟସ୍ଥତା, ସମଝୌତା ଏବଂ ଅନ୍ୟାନ୍ୟ କୂଟନୈତିକ ବିକଳ୍ପ ପ୍ରଦାନ କରିଥାଏ। ପି. ହରିଶ କହିଥିଲେ ଯେ ବଦଳୁଥିବା ବିଶ୍ୱ ପରିସ୍ଥିତି ଅନୁଯାୟୀ ଏହି ବ୍ୟବସ୍ଥାଗୁଡ଼ିକର ମଧ୍ୟ ନିୟମିତ ସମୀକ୍ଷା ଆବଶ୍ୟକ।

ପାଲେଷ୍ଟାଇନ ପ୍ରସଙ୍ଗକୁ ଉଦାହରଣ ଭାବେ ଉଲ୍ଲେଖ କରି ସେ କହିଥିଲେ ଯେ ଭୂମିସ୍ତରର ବଦଳୁଥିବା ବାସ୍ତବତା ଅନୁଯାୟୀ ମଧ୍ୟସ୍ଥତା ଓ ସମାଧାନ ଢାଞ୍ଚାରେ ପରିବର୍ତ୍ତନ ଆଣିବା ଆବଶ୍ୟକ। ଯେପରି ଜାତିସଂଘ ସାଧାରଣ ପରିଷଦର ଆଦେଶଗୁଡ଼ିକର ସମୀକ୍ଷା ହେଉଛି, ସେହିପରି ୟୁଏନଏସସିର ଆଦେଶ ମଧ୍ୟ ସମୀକ୍ଷାରୁ ବାଦ ପଡ଼ିବା ଉଚିତ୍ ନୁହେଁ ବୋଲି ସେ ମତ ରଖିଥିଲେ।

ଏହି ଅବସରରେ ପି. ହରିଶ ପାକିସ୍ତାନର ଜମ୍ମୁ-କାଶ୍ମୀର ସମ୍ପର୍କିତ ମନ୍ତବ୍ୟକୁ ତୀବ୍ର ଭାବେ ଖଣ୍ଡନ କରିଥିଲେ। ସେ କହିଥିଲେ ଯେ ଜମ୍ମୁ-କାଶ୍ମୀର ଭାରତର ଅବିଚ୍ଛେଦ୍ୟ ଅଂଶ ଏବଂ ଏହା ଭାରତର ଆଭ୍ୟନ୍ତରୀଣ ବିଷୟ। ପାକିସ୍ତାନ ଜାତିସଂଘ ମଞ୍ଚକୁ ରାଜନୈତିକ ଉଦ୍ଦେଶ୍ୟରେ ବ୍ୟବହାର କରୁଥିବା ଅଭିଯୋଗ ଆଣି ସେ କହିଥିଲେ ଯେ ଜମ୍ମୁ-କାଶ୍ମୀର ଭାରତର ଥିଲା, ଅଛି ଏବଂ ଭବିଷ୍ୟତରେ ମଧ୍ୟ ଭାରତର ହିଁ ରହିବ।