ଭାରତୀୟ ଅର୍ଥନୀତି ପାଇଁ ଆସିଛି ଏକ ସକାରାତ୍ମକ ଖବର। ଆର୍ଥିକ ବର୍ଷ ୨୦୨୬-୨୭ର ପ୍ରଥମ ତ୍ରୈମାସିକ (ଏପ୍ରିଲ-ଜୁନ୍‌)ରେ ଭାରତର ବାସ୍ତବ GDP ୭.୮% ବୃଦ୍ଧି ପାଇଛି। ପରିସଂଖ୍ୟାନ ଓ କାର୍ଯ୍ୟକ୍ରମ ରୂପାୟଣ ମନ୍ତ୍ରଣାଳୟ ପକ୍ଷରୁ ପ୍ରକାଶିତ ସରକାରୀ ତଥ୍ୟରେ ଏହି ବୃଦ୍ଧି ଦର୍ଶାଯାଇଛି।

ଭାରତର ଏହି GDP ବୃଦ୍ଧିକୁ ନେଇ ଆନ୍ତର୍ଜାତୀୟ ମୁଦ୍ରା ପାଣ୍ଠି (IMF) ମଧ୍ୟ ସକାରାତ୍ମକ ମତ ଦେଇଛି। ଗୁରୁବାର IMF କହିଛି ଯେ ଭାରତର ଅର୍ଥନୈତିକ ଅଭିବୃଦ୍ଧି ଆଶାଠାରୁ ଅଧିକ ଭଲ ପ୍ରଦର୍ଶନ କରିଥିବା ସେବା କ୍ଷେତ୍ର ଓ ରପ୍ତାନି ଦ୍ୱାରା ମୁଖ୍ୟତଃ ପ୍ରଭାବିତ ହୋଇଛି।

IMFର ମୁଖପାତ୍ର ଜୁଲି କୋଜାକ୍‌ ଏକ ମିଡିଆ ବ୍ରିଫିଙ୍ଗ୍‌ରେ କହିଛନ୍ତି ଯେ ଏହି GDP ବୃଦ୍ଧି ଇରାନ ଯୁଦ୍ଧ ଯୋଗୁଁ ସୃଷ୍ଟି ହୋଇଥିବା ଏନର୍ଜି ଦର ବୃଦ୍ଧିର ଝଟକା ମଧ୍ୟରେ ଭାରତୀୟ ଅର୍ଥନୀତିର ସ୍ଥିରତା ଓ ଦୃଢ଼ତାକୁ ପ୍ରତିଫଳିତ କରୁଛି।

କୋଜାକ୍‌ ବ୍ୟାଖ୍ୟା କରିଛନ୍ତି ଯେ ଏନର୍ଜି କିମ୍ବା ଅଶୋଧିତ ତୈଳ ଦର ବଢ଼ିଲେ ଏହା ଏନର୍ଜି ଆମଦାନିକାରୀ ଦେଶଗୁଡ଼ିକର Balance of Payments ଉପରେ ଚାପ ସୃଷ୍ଟି କରିଥାଏ। ଏହା ସହିତ ସରକାରଙ୍କ ଆର୍ଥିକ ସ୍ଥିତି ବା fiscal position ମଧ୍ୟ ପ୍ରଭାବିତ ହୋଇପାରେ।

ଏଭଳି ପରିସ୍ଥିତିରେ ଭାରତର GDPରେ ୭.୮% ବୃଦ୍ଧି ଦେଶର ଅର୍ଥନୀତି ଉପରେ ବାହ୍ୟ ଝଟକାର ପ୍ରଭାବକୁ ତୁଳନାମୂଳକ ଭାବେ ସହନ କରିବାର କ୍ଷମତାକୁ ଦର୍ଶାଉଛି ବୋଲି IMFର ମତ।