ଚଣ୍ଡିଗଡ଼/ନୂଆଦିଲ୍ଲୀ: ‘ଭୋଟ୍ ଚୋରି’ ଅଭିଯୋଗ ଏବଂ ନିର୍ବାଚନ କମିଶନଙ୍କ କାର୍ଯ୍ୟପ୍ରଣାଳୀକୁ ନେଇ ବିରୋଧୀ INDIA ମେଣ୍ଟ ପକ୍ଷରୁ ଆୟୋଜିତ ରାଲିକୁ ନେଇ ବିଜେପି ଓ କଂଗ୍ରେସ ମଧ୍ୟରେ ରାଜନୈତିକ ବାକ୍‌ଯୁଦ୍ଧ ତୀବ୍ର ହୋଇଛି। ବିଜେପି ଏହି ରାଲିକୁ ‘ଫ୍ଲପ୍ ଶୋ’ ବୋଲି କହିଥିବା ବେଳେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ କଟାକ୍ଷ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ।

ରବିବାର ଚଣ୍ଡିଗଡ଼ ପୋଲିସର ୬୦ତମ ପ୍ରତିଷ୍ଠା ଦିବସ ଅବସରରେ ଆୟୋଜିତ ସଭାରେ ଯୋଗଦେଇ ଶାହ କହିଥିଲେ ଯେ, ରାହୁଲ ଗାନ୍ଧୀ କେବଳ ମକ୍ ପାର୍ଲାମେଣ୍ଟରେ ହିଁ ପ୍ରଧାନମନ୍ତ୍ରୀ ହେବାର ସ୍ୱପ୍ନ ଦେଖିପାରିବେ। ସେ କଟାକ୍ଷ କରି କହିଥିଲେ, “ଆପଣ ପ୍ରଧାନମନ୍ତ୍ରୀ ହେବାକୁ ଚାହୁଁଛନ୍ତି? ତେବେ ସାରା ଜୀବନ ମକ୍ ପାର୍ଲାମେଣ୍ଟରେ ରୁହନ୍ତୁ। ଆପଣଙ୍କ ପାଳି କେବେ ଆସିବ ନାହିଁ।”

କଂଗ୍ରେସ ପକ୍ଷରୁ ମୁଖ୍ୟ ନିର୍ବାଚନ କମିଶନରଙ୍କୁ ପଦରୁ ହଟାଇବା ପାଇଁ ମକ୍ ଇମ୍ପିଚମେଣ୍ଟ ପ୍ରକ୍ରିୟା ଆରମ୍ଭ କରାଯିବା ପ୍ରସଙ୍ଗକୁ ନେଇ ଶାହ ଏହି ମନ୍ତବ୍ୟ ଦେଇଥିଲେ। ସୋନିଆ ଗାନ୍ଧୀଙ୍କ ପୁଅ ରାହୁଲଙ୍କୁ ପ୍ରଧାନମନ୍ତ୍ରୀ କରିବାର ସ୍ୱପ୍ନ ପୂରଣ ହୋଇନଥିବାରୁ ଏଭଳି ପଦକ୍ଷେପ ନିଆଯାଇଥିବା ଶାହ ଅଭିଯୋଗ କରିଥିଲେ ।

ଅନ୍ୟପଟେ, ନିର୍ବାଚନ କମିଶନ ଏବଂ କେନ୍ଦ୍ର ସରକାରଙ୍କ ବିରୋଧରେ ବିରୋଧୀଙ୍କ ଅଭିଯାନକୁ ଜବାବ ଦେବା ପାଇଁ ବିଜେପି ଦେଶବ୍ୟାପୀ ‘ଗଣତନ୍ତ୍ର ବଞ୍ଚାଅ, ଅରାଜକତା ହଟାଅ’ ନାମରେ ପଦଯାତ୍ରା ଓ କାର୍ଯ୍ୟକ୍ରମ ଆୟୋଜନ କରିଛି। ଏଥିରେ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀଙ୍କ ସମେତ ଦଳର ବହୁ ବରିଷ୍ଠ ନେତା ସାମିଲ ହୋଇଛନ୍ତି ।

ବିଜେପି ଅଧ୍ୟକ୍ଷ ନୀତିନ ନବୀନ ହରିୟାଣାର ରୋହତକ ଗସ୍ତ କରି କଂଗ୍ରେସକୁ ଟାର୍ଗେଟ୍ କରିଥିଲେ। ସାମ୍ବିଧାନିକ ସଂସ୍ଥାଗୁଡ଼ିକର ବିଶ୍ୱସନୀୟତାକୁ ନଷ୍ଟ କରି ଦେଶରେ ଅରାଜକତା ସୃଷ୍ଟି କରିବା ରାହୁଲ ଗାନ୍ଧୀଙ୍କ ଯୋଜନା ବୋଲି ସେ ଅଭିଯୋଗ କରିଥିଲେ ।

ବିଜେପି ନେତା ତଥା କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି. ନଡ୍ଡା ମଧ୍ୟ ରାମଲୀଳା ମୈଦାନରେ ହୋଇଥିବା ରାଲିକୁ ‘ସୁପର ଫ୍ଲପ୍ ଶୋ’ ବୋଲି କହି ଦଳର ପ୍ରତିକ୍ରିୟା ଜଣାଇଥିଲେ ।

ଏହା ସହିତ ରାଲି ଆୟୋଜନ ପାଇଁ ବଛାଯାଇଥିବା ତାରିଖକୁ ନେଇ ମଧ୍ୟ ବିଜେପି କଂଗ୍ରେସକୁ ଘେରିଛି । ୧୯୮୪ ମସିହାର ଶିଖ୍ ବିରୋଧୀ ଦଙ୍ଗାର ବାର୍ଷିକୀ ଅବସରରେ ରାଲି ଆୟୋଜନ କରିବାକୁ ନେଇ ଶାହ ଆପତ୍ତି ଉଠାଇଥିଲେ। ତାଙ୍କ କହିବା ଅନୁସାରେ, ୧୯୮୪ ମସିହାର ଦଙ୍ଗାରେ ପ୍ରାଣ ହରାଇଥିବା ଶିଖ୍ ସମ୍ପ୍ରଦାୟର ଲୋକଙ୍କ ସ୍ମୃତି ପ୍ରତି ଏହା ଅସମ୍ମାନ ।

ଶାହ ରାଜୀବ ଗାନ୍ଧୀଙ୍କ ବିବାଦୀୟ ‘ଏକ ବଡ଼ ଗଛ ପଡ଼ିଲେ ପୃଥିବୀ ଥରିଉଠେ’ ମନ୍ତବ୍ୟକୁ ମଧ୍ୟ ମନେ ପକାଇଥିଲେ। ୧୯୮୪ ମସିହାର ଦଙ୍ଗା ସହ ଜଡ଼ିତ ଦୁଃଖଦ ଘଟଣାକୁ ଦୃଷ୍ଟିରେ ରଖି ନଭେମ୍ବର ୧ରୁ ୩ ମଧ୍ୟରେ ରାଲି ନକରିବାକୁ ବିଜେପି କଂଗ୍ରେସକୁ ଅନୁରୋଧ କରିଥିଲା ବୋଲି ଶାହ କହିଛନ୍ତି ।

ଏହି ପ୍ରସଙ୍ଗକୁ ନେଇ ଦେଶର ରାଜନୈତିକ ମାହୋଲ ଆହୁରି ସରଗରମ ହୋଇଥିବା ବେଳେ ବିଜେପି ଓ ବିରୋଧୀ ଦଳ ମଧ୍ୟରେ ଆରୋପ-ପ୍ରତ୍ୟାରୋପ ଜାରି ରହିଛି ।