ମୁମ୍ବାଇ: ଟାଟା ଟ୍ରଷ୍ଟକୁ ନେଇ ଚାଲିଥିବା ଆଭ୍ୟନ୍ତରୀଣ ମତଭେଦ ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି। ନୋଏଲ୍ ଟାଟାଙ୍କ ନିକଟତମ ସହଯୋଗୀ ଡାରିଅସ୍ ଖମ୍ବାଟା ନଭେମ୍ବର ୮ରେ ସାର୍ ଦୋରାବଜୀ ଟାଟା ଟ୍ରଷ୍ଟ (SDTT) ଏବଂ ସାର୍ ରତନ ଟାଟା ଟ୍ରଷ୍ଟ (SRTT)ରୁ ଓହରିବେ। ତାଙ୍କ କାର୍ଯ୍ୟକାଳ ଶେଷ ହେବା ପରେ ସେ ଆଉ ଏକ କାର୍ଯ୍ୟକାଳ ପାଇଁ ନିଯୁକ୍ତି ନେବାକୁ ଚାହୁଁନାହାନ୍ତି ।

ନଭେମ୍ବର ୨ ତାରିଖରେ ଲେଖିଥିବା ଚାରି ପୃଷ୍ଠାର ଚିଠିରେ ଖମ୍ବାଟା ଟ୍ରଷ୍ଟର ଅଧ୍ୟକ୍ଷ ନୋଏଲ୍ ଟାଟା ଏବଂ CEO ସିଦ୍ଧାର୍ଥ ଶର୍ମାଙ୍କୁ ଏହି ନିଷ୍ପତ୍ତି ବିଷୟରେ ଜଣାଇଛନ୍ତି। ଉଭୟ ତାଙ୍କୁ ପଦରେ ରହିବାକୁ ଚାହୁଁଥିଲେ ମଧ୍ୟ ସେ ପୁନଃନିଯୁକ୍ତି ପାଇଁ ଆଗ୍ରହୀ ନୁହନ୍ତି । ଚିଠିରେ ସେ ଲେଖିଛନ୍ତି, “ସ୍ୱାଧୀନତାର ମୂଲ୍ୟ ଦେବାକୁ ପଡ଼େ।”

ନୋଏଲ୍ ଟାଟା ଓ ଚନ୍ଦ୍ରଶେଖରନଙ୍କ ମଧ୍ୟରେ ମତଭେଦକୁ ନେଇ ଚିନ୍ତା

ଖମ୍ବାଟା ନୋଏଲ୍ ଟାଟା ଏବଂ ଟାଟା ସନ୍ସର ଅଧ୍ୟକ୍ଷ ଏନ୍. ଚନ୍ଦ୍ରଶେଖରନଙ୍କ ମଧ୍ୟରେ ବଢ଼ୁଥିବା ମତଭେଦକୁ ନେଇ ଦୁଃଖ ପ୍ରକାଶ କରିଛନ୍ତି। ଟାଟା ଟ୍ରଷ୍ଟଗୁଡ଼ିକ ଟାଟା ସନ୍ସରେ ଅଧିକାଂଶ ଅଂଶଧନ ରଖିଥିବାରୁ ଏହି ମତଭେଦ ଗୋଷ୍ଠୀର ପରିଚାଳନା ଓ ଭବିଷ୍ୟତ ନିଷ୍ପତ୍ତି ଉପରେ ପ୍ରଭାବ ପକାଇପାରେ ।

ଟାଟା ସନ୍ସର ଷ୍ଟକ୍ ମାର୍କେଟ୍‌ରେ ତାଲିକାଭୁକ୍ତ ହେବା ପ୍ରସଙ୍ଗରେ ମଧ୍ୟ ଖମ୍ବାଟା ନିଜର ମତ ରଖିଥିଲେ। ସେ କହିଥିଲେ ଯେ ଟାଟା ସନ୍ସର ଲିଷ୍ଟିଂ ଟ୍ରଷ୍ଟଗୁଡ଼ିକ ପାଇଁ ଗୁରୁତର ପରିଣାମ ଆଣିପାରେ । ୨୦୨୫ ମସିହାରେ ଏହି ପ୍ରସଙ୍ଗରେ ଟ୍ରଷ୍ଟର ନିଷ୍ପତ୍ତିକୁ ସମର୍ଥନ କରିଥିବା କଥା ମଧ୍ୟ ସେ ଚିଠିରେ ଉଲ୍ଲେଖ କରିଛନ୍ତି ।

ଟ୍ରଷ୍ଟର ବୋର୍ଡରେ କ’ଣ ପ୍ରଭାବ ପଡ଼ିବ?

ଖମ୍ବାଟାଙ୍କ ଓହରିବା ପରେ ସାର୍ ଦୋରାବଜୀ ଟାଟା ଟ୍ରଷ୍ଟରେ ପାଞ୍ଚ ଜଣ ଏବଂ ସାର୍ ରତନ ଟାଟା ଟ୍ରଷ୍ଟରେ ଚାରି ଜଣ ଟ୍ରଷ୍ଟି ରହିବେ। ସାର୍ ରତନ ଟାଟା ଟ୍ରଷ୍ଟରେ ନୂଆ ଟ୍ରଷ୍ଟି ନିଯୁକ୍ତି କିମ୍ବା କାର୍ଯ୍ୟକାଳ ବୃଦ୍ଧି ଉପରେ ମହାରାଷ୍ଟ୍ରର ଚାରିଟି କମିଶନର ଅସ୍ଥାୟୀ ପ୍ରତିବନ୍ଧକ ଲଗାଇଛନ୍ତି। ଟ୍ରଷ୍ଟରେ ସମ୍ଭାବ୍ୟ ଆଇନ ଉଲ୍ଲଂଘନ ଅଭିଯୋଗର ତଦନ୍ତ ଚାଲିଥିବାରୁ ଏହି ପ୍ରତିବନ୍ଧକ ଲାଗିଛି ।

ଖମ୍ବାଟାଙ୍କ ଓହରିବା ଏପରି ଏକ ସମୟରେ ହେଉଛି, ଯେତେବେଳେ ଟାଟା ଟ୍ରଷ୍ଟ ଏବଂ ଟାଟା ସନ୍ସ ମଧ୍ୟରେ ସମ୍ପର୍କ ଓ ପରିଚାଳନାକୁ ନେଇ ଆଲୋଚନା ଜାରି ରହିଛି ।