ହର୍ମୁଜ ପ୍ରଣାଳୀରେ ଘଟିଥିବା କ୍ଷେପଣାସ୍ତ୍ର ଆକ୍ରମଣରେ ପ୍ରାଣ ହରାଇଥିବା ଭାରତୀୟ ନାବିକ ହେରମ୍ବ କରମରକରଙ୍କ ଶେଷ ବାର୍ତ୍ତା ଏବେ ତାଙ୍କ ପରିବାର ପାଇଁ ସ୍ମୃତି ପାଲଟିଛି। ପୁଣେର ୩୦ ବର୍ଷୀୟ ମେରାଇନ୍ ଇଞ୍ଜିନିୟର ଆକ୍ରମଣର କିଛି ସମୟ ପୂର୍ବରୁ ପରିବାରକୁ ମେସେଜ୍ କରି ଜଣାଇଥିଲେ ଯେ ଜାହାଜ ସୁରକ୍ଷିତ ଭାବେ ଗଲ୍ଫ୍ ଅଞ୍ଚଳ ପାର୍ କରିଛି ଏବଂ ସେମାନେ ବିପଦମୁକ୍ତ ଅଛନ୍ତି।

କିନ୍ତୁ ଏହାର କିଛି ସମୟ ପରେ ସାଇପ୍ରସ ପତାକାଧାରୀ ବାଣିଜ୍ୟିକ ଜାହାଜ ‘GFX Galaxy’ ଉପରେ ଓମାନ ଉପକୂଳ ନିକଟ ହର୍ମୁଜ ପ୍ରଣାଳୀରେ କ୍ଷେପଣାସ୍ତ୍ର ଆକ୍ରମଣ ହୋଇଥିଲା। ଆକ୍ରମଣ ପରେ ଜାହାଜରେ ଥିବା ୧୦ ଜଣ ଭାରତୀୟ ନାଗରିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲେ ମଧ୍ୟ ହେରମ୍ବ କରମରକର ନିଖୋଜ ଥିଲେ। ପରେ ତାଙ୍କ ମୃତ୍ୟୁ ହୋଇଥିବା ନେଇ ପରିବାର ପକ୍ଷରୁ ସୂଚନା ଦିଆଯାଇଛି।

ପୁଅକୁ ହରାଇ ଶୋକାକୁଳ ପରିବାର ଭାରତ ସରକାରଙ୍କୁ ତାଙ୍କ ମରଶରୀରକୁ ଶୀଘ୍ର ସ୍ୱଦେଶ ଫେରାଇ ଆଣିବାକୁ ଅନୁରୋଧ କରିଛନ୍ତି। ସେହିପରି ବିଦେଶ ମନ୍ତ୍ରଣାଳୟ ବାଣିଜ୍ୟିକ ଜାହାଜ ଉପରେ ଏଭଳି ଆକ୍ରମଣକୁ ତୀବ୍ର ନିନ୍ଦା କରିବା ସହ ଏହାକୁ ବିଶ୍ୱ ସାମୁଦ୍ରିକ ସୁରକ୍ଷା ପାଇଁ ଗୁରୁତର ଚିନ୍ତାର ବିଷୟ ବୋଲି କହିଛି।

ଓମାନରେ ଥିବା ଭାରତୀୟ ଦୂତାବାସ ସ୍ଥାନୀୟ ପ୍ରଶାସନ ଓ ଜାହାଜ କର୍ତ୍ତୃପକ୍ଷଙ୍କ ସହ ନିରନ୍ତର ସମ୍ପର୍କରେ ରହି ଉଦ୍ଧାର ଓ ଆବଶ୍ୟକ ସହାୟତା କାର୍ଯ୍ୟର ତଦାରଖ କରୁଛି। ହର୍ମୁଜ ପ୍ରଣାଳୀରେ ବଢ଼ୁଥିବା ଉତ୍ତେଜନା ବିଶ୍ୱ ତୈଳ ପରିବହନ ଓ ସାମୁଦ୍ରିକ ସୁରକ୍ଷାକୁ ନେଇ ନୂଆ ଚିନ୍ତା ସୃଷ୍ଟି କରିଛି।