ଦକ୍ଷିଣ-ପଶ୍ଚିମ ମୌସୁମୀ ବାୟୁ ସକ୍ରିୟ ରହିବା ଫଳରେ ଦେଶର ବିଭିନ୍ନ ରାଜ୍ୟରେ ଅବିରତ ବର୍ଷା ଜାରି ରହିଛି। ଦିଲ୍ଲୀରୁ କେରଳ ପର୍ଯ୍ୟନ୍ତ ପ୍ରବଳ ବର୍ଷା ଯୋଗୁଁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ରାସ୍ତାଘାଟ ଜଳମଗ୍ନ ହେବା ସହ ଭୂସ୍ଖଳନ, ଘର ଭୁଶୁଡ଼ିବା, ଗଛ ଉପୁଡ଼ି ପଡ଼ିବା ଓ ଜଳବନ୍ଦୀ ଭଳି ସମସ୍ୟା ବଢ଼ିଛି।

ପ୍ରବଳ ବର୍ଷା ଯୋଗୁଁ ସଡ଼କ ଓ ରେଳ ଯାତାୟାତ ବ୍ୟାପକ ଭାବେ ପ୍ରଭାବିତ ହୋଇଛି। ଭାରତୀୟ ପାଣିପାଗ ବିଭାଗ (IMD) ଦିଲ୍ଲୀର ସମସ୍ତ ଅଞ୍ଚଳ ପାଇଁରେଡ୍ ଆଲର୍ଟଜାରି କରିଥିବାବେଳେ ଗାଜିଆବାଦ, ନୋଏଡା, ମିରଟ ଓ ଗୁରୁଗ୍ରାମ ପାଇଁଅରେଞ୍ଜ ଆଲର୍ଟଜାରି କରିଛି।

ଦିଲ୍ଲୀ-ଏନସିଆରର ଅନେକ ଅଞ୍ଚଳରେ ରାତିସାରା ମୂଷଳଧାରା ବର୍ଷା ହୋଇଥିବାରୁ ଅନେକ ରାସ୍ତା ଜଳମଗ୍ନ ହୋଇପଡ଼ିଛି। ଗୁରୁଗ୍ରାମରେ ଦୀର୍ଘ ସମୟ ଧରି ଟ୍ରାଫିକ୍ ଜାମ୍ ଲାଗି ରହିଥିବାବେଳେ କିଛି କମ୍ପାନୀ କର୍ମଚାରୀଙ୍କୁୱର୍କ ଫ୍ରମ୍ ହୋମ୍କରିବାକୁ ପରାମର୍ଶ ଦେଇଛନ୍ତି।

ମହାରାଷ୍ଟ୍ର ଓ ଗୁଜରାଟରେ ମଧ୍ୟ ବର୍ଷାର ପ୍ରଭାବ ଜାରି ରହିଛି। ଭୋର ଘାଟ ଅଞ୍ଚଳରେ ଭୂସ୍ଖଳନ ଯୋଗୁଁ ମୁମ୍ବାଇ-ପୁଣେ ରେଳ ଚଳାଚଳ ପ୍ରଭାବିତ ହୋଇଛି। ନାସିକରେ ଗୋଦାବରୀ ନଦୀର ଜଳସ୍ତର ବଢ଼ିବାରୁ ଅନେକ ମନ୍ଦିରରେ ବନ୍ୟାଜଳ ପ୍ରବେଶ କରିଛି।

ଗୁଜରାଟର ସୁରତରେ ୩୫୮ ମିଲିମିଟର ବର୍ଷା ରେକର୍ଡ ହୋଇଥିବାବେଳେ ବନ୍ୟା ସ୍ଥିତି ସୃଷ୍ଟି ହୋଇଛି। ପ୍ରଶାସନ ପକ୍ଷରୁ ପ୍ରାୟ୩,୮୦୦ ଲୋକଙ୍କୁସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ବର୍ଷାଜନିତ ଘଟଣାରେ ଜିଲ୍ଲାରେ ଅତି କମରେ୯ ଜଣଙ୍କ ମୃତ୍ୟୁହୋଇଥିବା ସୂଚନା ମିଳିଛି।

ମହାରାଷ୍ଟ୍ରର ପିମ୍ପରି-ଚିଞ୍ଚୱାଡରେ ଏକ ବର୍ଜ୍ୟବସ୍ତୁରୁ ଶକ୍ତି ଉତ୍ପାଦନ କାରଖାନା ପରିସରରେ ତିନି ମହଲା ବିଶିଷ୍ଟ ଏକ କୋଠା ଭୁଶୁଡ଼ି ପଡ଼ିଥିବାବେଳେ ବିପର୍ଯ୍ୟୟ ପରିଚାଳନା ଦଳ ୯ ଜଣଙ୍କୁ ଉଦ୍ଧାର କରିଛନ୍ତି।

ସେହିପରି କେରଳର ୱାୟନାଡରେ ଭୂସ୍ଖଳନ ପରବର୍ତ୍ତୀ ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ଧ୍ୱଂସାବଶେଷ ତଳୁ ଆଉ ଜଣେ ମୃତଦେହ ଉଦ୍ଧାର କରାଯାଇଛି। ଆଗାମୀ କିଛି ଦିନ ଯାଏଁ ବର୍ଷାର ପ୍ରକୋପ ଜାରି ରହିବା ନେଇ ପାଣିପାଗ ବିଭାଗ ସତର୍କ କରିଛି।