ନୂଆଦିଲ୍ଲୀ: ନୀମ କରୋଲି ବାବାଙ୍କ ଜୀବନ ଓ ଆଧ୍ୟାତ୍ମିକ ଯାତ୍ରାକୁ ନେଇ ନିର୍ମିତ ଫିଲ୍ମ‘ହନୁମାନ ଅଂଶ’ଦର୍ଶକଙ୍କ ମଧ୍ୟରେ ଚର୍ଚ୍ଚାରେ ରହିଛି। ଏବେ ଫିଲ୍ମ ସହ ଜଡ଼ିତ ଏକ ଭାବପ୍ରବଣ ଘଟଣା ସାମ୍ନାକୁ ଆସିଛି।

ନୀମ କରୋଲି ବାବାଙ୍କ ଝିଅଗିରିଜା ଜୀ, ଯିଏ ‘ଆମ୍ମା ଜୀ’ ଭାବେ ପରିଚିତ, ଏହି ଫିଲ୍ମକୁ ପ୍ରାୟ୧୫ ଥର ଦେଖିଛନ୍ତିବୋଲି ପ୍ରଯୋଜକ ରାଗିନୀ ସୋନା କହିଛନ୍ତି। ରାଗିନୀଙ୍କ କହିବା ଅନୁସାରେ, ଆମ୍ମା ଜୀ ପ୍ରତିଥର ଫିଲ୍ମ ଦେଖିବା ସମୟରେ ଭାବବିହ୍ୱଳ ହୋଇ କାନ୍ଦିଥିଲେ।

Screenକୁ ଦେଇଥିବା ଏକ ସାକ୍ଷାତକାରରେ ରାଗିନୀ କହିଛନ୍ତି ଯେ, ଫିଲ୍ମ ରିଲିଜ୍ ପୂର୍ବରୁ ସେ ଓ ନିର୍ଦ୍ଦେଶକ ବିଶାଲ ଚତୁର୍ବେଦୀ ଗିରିଜା ଜୀଙ୍କ ସହ ଯୋଗାଯୋଗ କରିବାକୁ ଚାହୁଁଥିଲେ। ବିଶାଲ ତାଙ୍କ ଆଶୀର୍ବାଦ ନେବାକୁ ଚାହୁଁଥିଲେ। ପରେ ଦୁହେଁ ତାଙ୍କ ସହ ଫୋନରେ କଥା ହୋଇଥିଲେ।

ରାଗିନୀ ଆମ୍ମା ଜୀଙ୍କୁ ଫିଲ୍ମ ଦେଖିବାକୁ ଅନୁରୋଧ କରିଥିଲେ। ଏହାର ଉତ୍ତରରେ ସେ କହିଥିଲେ ଯେ,ସମୟ ଠିକ୍ ଲାଗିଲେ ସେ ଫିଲ୍ମ ଦେଖିବେ।ପରେ ସେ ଫିଲ୍ମ ଦେଖିଥିଲେ ଏବଂ ଏପର୍ଯ୍ୟନ୍ତ ପ୍ରାୟ ୧୫ ଥର ଦେଖିସାରିଛନ୍ତି ବୋଲି ରାଗିନୀ କହିଛନ୍ତି।

ଆମ୍ମା ଜୀଙ୍କ ସହ କଥାବାର୍ତ୍ତାକୁ ଜୀବନ ବଦଳାଇଦେଇଥିବା ଅନୁଭୂତି କହିଲେ ରାଗିନୀ

ରାଗିନୀ କହିଛନ୍ତି ଯେ, ଆମ୍ମା ଜୀଙ୍କ ସହ ତାଙ୍କର ଏକ କଥାବାର୍ତ୍ତା ତାଙ୍କ ପାଇଁ ଅତ୍ୟନ୍ତ ଭାବପ୍ରବଣ ଅନୁଭୂତି ଥିଲା। ଫିଲ୍ମ ନିର୍ମାଣ ପଛରେ କ’ଣ ପ୍ରେରଣା ଥିଲା ବୋଲି ପଚରାଯିବାରେ ରାଗିନୀ ନୀମ କରୋଲି ବାବାଙ୍କୁ ନିଜେ ୬ ବର୍ଷ ବୟସରେ ଭେଟିଥିବା କଥା କହିଥିଲେ।

ସେହି ସମୟରେ ରାଗିନୀଙ୍କ ବାପା ନୈନିତାଲରେ ନିଯୁକ୍ତ ଥିବା କଥା ମଧ୍ୟ ସେ କହିଥିଲେ। ରାଗିନୀଙ୍କ ଅନୁସାରେ, ଆମ୍ମା ଜୀ ତାଙ୍କ ବାପାଙ୍କ ନାମ ଏବଂ ଆଗ୍ରାରେ ତାଙ୍କ ଘରର ସ୍ଥାନ ବିଷୟରେ ମଧ୍ୟ କହିଥିଲେ। ରାଗିନୀ କହିଛନ୍ତି ଯେ ଏହି ଘଟଣା ପ୍ରାୟ ୫୦ ବର୍ଷ ପୁରୁଣା ସ୍ମୃତି ସହ ଜଡ଼ିତ ଥିଲା।

ଏହା ସହ ଆମ୍ମା ଜୀ ରାଗିନୀଙ୍କ ବଡ଼ ଭାଇଙ୍କ ନାମ ମଧ୍ୟ କହିଥିବା ରାଗିନୀ ଦାବି କରିଛନ୍ତି। ଏହି ଅନୁଭୂତି ତାଙ୍କୁ ଗଭୀର ଭାବେ ପ୍ରଭାବିତ କରିଥିବା ସେ କହିଛନ୍ତି।

‘ତାଙ୍କ ଭିତରେ ବାବାଙ୍କୁ ଅନୁଭବ କରିଥିଲି’

ପରେ ରାଗିନୀ ଗିରିଜା ଜୀଙ୍କୁ ସାକ୍ଷାତ ଭେଟିଥିଲେ। ତାଙ୍କ କହିବା ଅନୁସାରେ, ଫିଲ୍ମ ତିଆରି କରିବା ପୂର୍ବରୁ ବାବାଙ୍କ ଝିଅ ଏବେ ବି ଜୀବିତ ଥିବା କଥା ଟିମ୍କୁ ଜଣା ନଥିଲା।

ଗିରିଜା ଜୀଙ୍କୁ ଭେଟିବା ପରେ ରାଗିନୀ ତାଙ୍କ ମଧ୍ୟରେ ନୀମ କରୋଲି ବାବାଙ୍କ ଛବି ଅନୁଭବ କରିଥିବା କହିଛନ୍ତି। ସେ ବାବାଙ୍କ“ସମସ୍ତଙ୍କୁ ଭଲ ପାଅ, ସମସ୍ତଙ୍କୁ ଖାଇବାକୁ ଦିଅ”ବାର୍ତ୍ତାକୁ ଅନୁସରଣ କରୁଥିବା କଥା ମଧ୍ୟ ରାଗିନୀ କହିଛନ୍ତି।

ଫିଲ୍ମ ଟିମ୍ ନୀମ କରୋଲି ବାବାଙ୍କ ନାତି ଧନଞ୍ଜନ ଜୀଙ୍କୁ ମଧ୍ୟ ଭେଟିଛି। ବାବାଙ୍କ ପରିବାରଠାରୁ ମିଳିଥିବା ଆଶୀର୍ବାଦକୁ ଟିମ୍ ଗୁରୁତ୍ୱପୂର୍ଣ୍ଣ ବୋଲି ମନେ କରୁଛି।

୩୪୭ କୋଟିରୁ ଅଧିକ ବିଶ୍ୱବ୍ୟାପୀ ଆୟ

ଫିଲ୍ମର ବକ୍ସ ଅଫିସ୍ ପ୍ରଦର୍ଶନ ମଧ୍ୟ ଚର୍ଚ୍ଚାରେ ରହିଛି। ଟ୍ରେଡ୍ ୱେବସାଇଟ୍ Sacnilk ଅନୁସାରେ,‘ହନୁମାନ ଅଂଶ’ ବିଶ୍ୱବ୍ୟାପୀ ଭାବେ ୩୪୭.୦୫ କୋଟି ଟଙ୍କାରୁ ଅଧିକ ଆୟ କରିଛିବୋଲି ରିପୋର୍ଟ ହୋଇଛି।

ରାଗିନୀଙ୍କ ମତରେ, ନୀମ କରୋଲି ବାବାଙ୍କ ଆଶୀର୍ବାଦ ଫିଲ୍ମର ଯାତ୍ରାରେ ଗୁରୁତ୍ୱପୂର୍ଣ୍ଣ ରହିଛି। ତେବେ ତାଙ୍କ ପାଇଁ ସବୁଠାରୁ ଅର୍ଥପୂର୍ଣ୍ଣ ପ୍ରତିକ୍ରିୟା ବକ୍ସ ଅଫିସ୍ ଆୟ ନୁହେଁ, ବରଂ ବାବାଙ୍କ ନିଜ ପରିବାରରୁ ମିଳିଥିବା ପ୍ରତିକ୍ରିୟା।