ନୂଆଁଖାଇ ଅବସରରେ ନୂଆଦିଲ୍ଲୀସ୍ଥିତ ରାଷ୍ଟ୍ରପତି ଭବନରେ ‘ନୂଆଁଖାଇ ଭେଟ୍‌ଘାଟ’ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ଓଡ଼ିଶାର ଜନଜାତି ସଂସ୍କୃତିର ଝଲକ ଦେଖିବାକୁ ମିଳିଥିଲା।

ରାୟଗଡ଼ା ଜିଲ୍ଲାର ଗୁଣପୁର ବ୍ଲକ ପୁଟାସିଂ ଅଞ୍ଚଳର ଲାଞ୍ଜିଆ ସୌରା ସମ୍ପ୍ରଦାୟର ୧୫ ଜଣିଆ ନୃତ୍ୟ ଦଳ ଏହି କାର୍ଯ୍ୟକ୍ରମରେ ଯୋଗଦେଇଥିଲେ। ଦଳର ସଦସ୍ୟମାନେ ନିଜ ସମ୍ପ୍ରଦାୟର ପାରମ୍ପରିକ ନୃତ୍ୟ ପରିବେଷଣ କରି ଉପସ୍ଥିତ ଦର୍ଶକଙ୍କ ଠାରୁ ପ୍ରଶଂସା ପାଇଥିଲେ।

ଏହି ପ୍ରଦର୍ଶନ ମାଧ୍ୟମରେ ଦିଲ୍ଲୀରେ ଓଡ଼ିଶାର ଜନଜାତି ପରମ୍ପରା, ଲୋକନୃତ୍ୟ ଓ ସାଂସ୍କୃତିକ ବିବିଧତାର ପରିଚୟ ମିଳିଥିଲା।

କାର୍ଯ୍ୟକ୍ରମ ଅବସରରେ ଲାଞ୍ଜିଆ ସୌରା ସମ୍ପ୍ରଦାୟର କଳାକାରମାନଙ୍କ ଦ୍ୱାରା ପ୍ରସ୍ତୁତ ‘ଇଡିତାଲ’ ଚିତ୍ରକଳା ମଧ୍ୟ ରାଷ୍ଟ୍ରପତିଙ୍କୁ ପ୍ରଦାନ କରାଯାଇଥିଲା। ଏହି ପାରମ୍ପରିକ ଚିତ୍ରକଳା ଲାଞ୍ଜିଆ ସୌରା ସମ୍ପ୍ରଦାୟର କଳା ଓ ସାଂସ୍କୃତିକ ପରିଚୟର ଏକ ଗୁରୁତ୍ୱପୂର୍ଣ୍ଣ ଅଂଶ।

ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଗୁଣପୁର ବ୍ଲକ ଅଞ୍ଚଳର ଲାଞ୍ଜିଆ ସୌରା ସମ୍ପ୍ରଦାୟର ନୃତ୍ୟ ଦଳକୁ ରାଷ୍ଟ୍ରପତି ଭବନର ଏହି ସାଂସ୍କୃତିକ କାର୍ଯ୍ୟକ୍ରମରେ ପାରମ୍ପରିକ ନୃତ୍ୟ ପରିବେଷଣ ପାଇଁ ପଠାଯାଇଥିଲା।

ଏହି ଅବସର ଓଡ଼ିଶାର ଜନଜାତି କଳା, ପରମ୍ପରା ଓ ସାଂସ୍କୃତିକ ଐତିହ୍ୟକୁ ଜାତୀୟ ମଞ୍ଚରେ ପ୍ରଦର୍ଶନ କରିବାର ଏକ ବିଶେଷ ସୁଯୋଗ ହୋଇଛି।