ଓଡ଼ିଶାର ପଛୁଆ ଓ ସୀମାବର୍ତ୍ତୀ ଜିଲ୍ଲାଗୁଡ଼ିକରେ ଶିଳ୍ପ ବିକାଶକୁ ନୂଆ ଦିଗ ଦେବା ପାଇଁ ରାଜ୍ୟ ସରକାର ‘GO-EAST’ (Government of Odisha: Eastern Investment Accelerator & Special Task Force) ପ୍ଲାଟଫର୍ମର ଶୁଭାରମ୍ଭ କରିଛନ୍ତି।

ସିଆଇଆଇ ପୂର୍ବାଞ୍ଚଳ ପରିଷଦ ବୈଠକରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ପ୍ଲାଟଫର୍ମକୁ ଉନ୍ମୋଚନ କରି କହିଥିଲେ ଯେ ଏହା ମାଧ୍ୟମରେ ପୂର୍ବ ଓ ପୂର୍ବୋତ୍ତର ଭାରତରୁ ଅଧିକ ନିବେଶ ଆସିବ ଏବଂ ଓଡ଼ିଶାର ଅବିକଶିତ ଅଞ୍ଚଳଗୁଡ଼ିକରେ ଶିଳ୍ପାୟନର ନୂଆ ଯୁଗ ଆରମ୍ଭ ହେବ।

ଏହି ପ୍ଲାଟଫର୍ମ ଅଧୀନରେ ଏକ ଉଚ୍ଚସ୍ତରୀୟ ଟାସ୍କଫୋର୍ସ ଗଠନ କରାଯିବ, ଯାହା ନିବେଶ ପ୍ରକଳ୍ପଗୁଡ଼ିକର ଦ୍ରୁତ ଅନୁମୋଦନ ଓ କାର୍ଯ୍ୟାନ୍ୱୟନ ଉପରେ ନଜର ରଖିବ। ସେହିପରି ଇପିକଲ୍ରେ ଏକ ସ୍ୱତନ୍ତ୍ର ‘GO-EAST Cell’ ଏବଂ ନିବେଶ ଟ୍ରାକିଂ ପାଇଁ ‘GO-SWIFT’ ମଡ୍ୟୁଲ୍ ସୃଷ୍ଟି କରାଯିବ।

ମୁଖ୍ୟମନ୍ତ୍ରୀ କହିଥିଲେ ଯେ ବଲାଙ୍ଗୀର, କଳାହାଣ୍ଡି, ନୂଆପଡ଼ା, କନ୍ଧମାଳ, ବୌଦ୍ଧ, ଗଜପତି ସହ ୧୫ଟି ଜିଲ୍ଲାକୁ ଥ୍ରଷ୍ଟ ସେକ୍ଟର ଭାବେ ଚିହ୍ନଟ କରାଯାଇଛି। ଏହି ଜିଲ୍ଲାଗୁଡ଼ିକରେ ଅଣ-ଖଣିଜ ଭିତ୍ତିକ ଶିଳ୍ପ ପ୍ରତିଷ୍ଠାକୁ ବିଶେଷ ପ୍ରୋତ୍ସାହନ ଦିଆଯିବ।

ସେ କହିଥିଲେ ଯେ ପୂର୍ବରୁ ଶିଳ୍ପ ପ୍ରତିଷ୍ଠା ପାଇଁ ପ୍ରାୟ ୪୦୦ ଦିନ ସମୟ ଲାଗୁଥିଲା, ଯାହାକୁ ବର୍ତ୍ତମାନ ୧୬୦ ଦିନକୁ କମାଇ ଦିଆଯାଇଛି। ଆଗାମୀ ଦିନରେ ଏହାକୁ ୧୦୦ ଦିନ ମଧ୍ୟରେ ସୀମିତ କରିବା ଲକ୍ଷ୍ୟ ରଖାଯାଇଛି।

୨୦୨୪ ଜୁନ୍ ପରଠାରୁ ରାଜ୍ୟ ସରକାର ୯.୫ ଲକ୍ଷ କୋଟି ଟଙ୍କାର ୪୭୭ଟି ପ୍ରକଳ୍ପକୁ ଅନୁମୋଦନ କରିଥିବାବେଳେ ଏହା ମାଧ୍ୟମରେ ପ୍ରାୟ ୬ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ। ସେଥିମଧ୍ୟରୁ ୩.୧୧ ଲକ୍ଷ କୋଟି ଟଙ୍କାର ୧୨ଟି ପ୍ରକଳ୍ପ କାର୍ଯ୍ୟକାରୀ ପର୍ଯ୍ୟାୟରେ ପହଞ୍ଚିଛି।

ମୁଖ୍ୟମନ୍ତ୍ରୀ କହିଥିଲେ ଯେ ଓଡ଼ିଶା ଏବେ କେବଳ ଖଣିଜ ଭିତ୍ତିକ ଅର୍ଥନୀତିରେ ସୀମିତ ନ ରହି ଷ୍ଟିଲ୍, ଆଲୁମିନିୟମ, କେମିକାଲ୍ସ, ପେଟ୍ରୋକେମିକାଲ୍ସ, ସେମିକଣ୍ଡକ୍ଟର ଏବଂ ଇଲେକ୍ଟ୍ରୋନିକ୍ସ ଭଳି ଭବିଷ୍ୟତମୁଖୀ କ୍ଷେତ୍ରରେ ଅଗ୍ରସର ହେଉଛି।

କାର୍ଯ୍ୟକ୍ରମରେ ଶିଳ୍ପମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ ଯୁବଶକ୍ତିଙ୍କ ଦକ୍ଷତା ବିକାଶ ଓ ଶିଳ୍ପ ଜଗତର ଆବଶ୍ୟକତା ଅନୁଯାୟୀ ଆଧୁନିକ ପ୍ରଶିକ୍ଷଣ ପ୍ରଦାନ ଉପରେ ଗୁରୁତ୍ୱ ଦେଇଥିଲେ।