ଭାରତୀୟ କ୍ରିକେଟ୍‌ରେ ଚୟନକର୍ତ୍ତା ଭାବେ ଅଜିତ ଅଗରକରଙ୍କ ଅଧ୍ୟାୟ ଶେଷ ହୋଇଛି। ୨୦୨୩ ଜୁଲାଇରୁ BCCIର ସିନିୟର ପୁରୁଷ ଚୟନ କମିଟିର ଅଧ୍ୟକ୍ଷ ଥିବା ଅଗରକରଙ୍କ କାର୍ଯ୍ୟକାଳ ଅକ୍ଟୋବର ୪ରେ ଶେଷ ହୋଇଥିଲା। ସେ ଆଉ କାର୍ଯ୍ୟକାଳ ବଢ଼ାଇବାକୁ ଆଗ୍ରହୀ ନଥିବାରୁ BCCI ଏବେ ତାଙ୍କ ସ୍ଥାନରେ ନୂଆ ଚୟନକର୍ତ୍ତା ଖୋଜିବା ପ୍ରକ୍ରିୟା ଆରମ୍ଭ କରିଛି। 

ଅଗରକରଙ୍କ ବିଦାୟ ପରେ ଟିମ୍‌ ଇଣ୍ଡିଆର ମୁଖ୍ୟ କୋଚ୍‌ ଗୌତମ ଗମ୍ଭୀର ତାଙ୍କୁ ସୋସିଆଲ ମିଡିଆରେ ଭାବପୂର୍ଣ୍ଣ ବିଦାୟ ବାର୍ତ୍ତା ଦେଇଛନ୍ତି। ଗମ୍ଭୀର ଅଗରକରଙ୍କ ଦୃଢ଼ ବିଶ୍ୱାସ ଓ ‘Team First & Team Ahead’ ମନୋଭାବକୁ ପ୍ରଶଂସା କରି କହିଛନ୍ତି ଯେ ଭବିଷ୍ୟତରେ ଇତିହାସ ତାଙ୍କୁ ଅଧିକ ଭଲ ଭାବେ ମନେ ରଖିବ।

ଅଗରକରଙ୍କ କାର୍ଯ୍ୟକାଳ ଭାରତୀୟ କ୍ରିକେଟ୍‌ ପାଇଁ ସଫଳ ରହିଛି। ତାଙ୍କ ଅଧ୍ୟକ୍ଷତା ସମୟରେ ଭାରତ ୨୦୨୪ T20 ବିଶ୍ୱକପ୍‌, ୨୦୨୫ ଚାମ୍ପିୟନ୍ସ ଟ୍ରଫି ଏବଂ ୨୦୨୬ T20 ବିଶ୍ୱକପ୍‌ ଜିତିଛି। ଏହାଛଡ଼ା ୨୦୨୩ ODI ବିଶ୍ୱକପ୍‌ର ଫାଇନାଲ୍‌ରେ ମଧ୍ୟ ଭାରତ ପହଞ୍ଚିଥିଲା। 

ଚୟନକର୍ତ୍ତା ଭାବେ ଅଗରକରଙ୍କୁ ଅନେକ କଠିନ ଓ ବିବାଦୀୟ ନିଷ୍ପତ୍ତି ନେବାକୁ ପଡ଼ିଥିଲା। ଭାରତୀୟ ଦଳରେ ଅନୁଭବୀ ଖେଳାଳିଙ୍କ ସ୍ଥାନରେ ଯୁବ ପ୍ରତିଭାଙ୍କୁ ସୁଯୋଗ ଦେବା, ଟେଷ୍ଟ କ୍ରିକେଟ୍‌ରେ ବିରାଟ କୋହଲି ଓ ରୋହିତ ଶର୍ମାଙ୍କ ଯୁଗରୁ ଆଗକୁ ବଢ଼ିବା ଏବଂ ଟିମ୍‌ର ଭବିଷ୍ୟତ ପାଇଁ ନୂଆ ଖେଳାଳିଙ୍କୁ ପ୍ରସ୍ତୁତ କରିବା ତାଙ୍କ ଚୟନ ନୀତିର ଅଂଶ ଥିଲା।

ଅଗରକରଙ୍କ ସ୍ଥାନରେ ବର୍ତ୍ତମାନ ପ୍ରଜ୍ଞାନ ଓଝା ଅନ୍ତରୀଣ ମୁଖ୍ୟ ଚୟନକର୍ତ୍ତା ଭାବେ ଦାୟିତ୍ୱ ତୁଲାଉଛନ୍ତି। ଶିବସୁନ୍ଦର ଦାସ, ଆର୍‌ପି ସିଂହ ଏବଂ ଅଜୟ ରାତ୍ରା ମଧ୍ୟ ଚୟନ କମିଟିର ସଦସ୍ୟ ଅଛନ୍ତି। BCCI ନୂଆ ସଦସ୍ୟ ପାଇଁ ଆବେଦନ ଆହ୍ୱାନ କରିଛି ଏବଂ ଅକ୍ଟୋବର ୧୪ ସନ୍ଧ୍ୟା ୫ଟା ପର୍ଯ୍ୟନ୍ତ ଆବେଦନ କରିହେବ। 

ଏହି ସମୟରେ ଭାରତୀୟ ଦଳର ଆଗାମୀ ନ୍ୟୁଜିଲାଣ୍ଡ ଗସ୍ତ ପାଇଁ ଚୟନ ପ୍ରକ୍ରିୟା ମଧ୍ୟ ଆରମ୍ଭ ହୋଇସାରିଛି। ପ୍ରଜ୍ଞାନ ଓଝାଙ୍କ ଅଧ୍ୟକ୍ଷତାରେ ହୋଇଥିବା ଚୟନ ବୈଠକରେ ଭୁବନେଶ୍ୱର କୁମାରଙ୍କୁ ପ୍ରାୟ ୪ ବର୍ଷ ପରେ T20I ଦଳକୁ ଫେରାଇ ଅଣାଯାଇଛି।