ଭିରେନ୍ଦ୍ର ସେହୱାଗ୍‌ଙ୍କ ହୋଷ୍ଟିଂରେ ଚାଲିଥିବା ରିଆଲିଟି ଶୋ’ ‘Rise & Fall Season 2’ ଆରମ୍ଭ ହେବାର ମାତ୍ର ଦୁଇ ସପ୍ତାହ ମଧ୍ୟରେ ଚାରିଜଣ ପ୍ରତିଯୋଗୀଙ୍କୁ ହରାଇଛି। ଏବେ ଅଭିନେତା କରଣ ପଟେଲ ଓ ତେଜ ପ୍ରତାପ ଯାଦବ ଶୋ’ ଛାଡ଼ିବା ପରେ ପ୍ରତିଯୋଗିତାରେ ନୂଆ ମୋଡ଼ ଆସିଛି। 

କରଣ ପଟେଲଙ୍କ ବିଦାୟ:
ରିପୋର୍ଟ ଅନୁସାରେ, କରଣ ପଟେଲ ସ୍ୱାସ୍ଥ୍ୟଗତ କାରଣରୁ ଶୋ’ରୁ ବାହାରିଛନ୍ତି। ସେ ନିୟମିତ ଇନ୍ସୁଲିନ୍‌ ନେବା ସହ କିଛି ଔଷଧ ମଧ୍ୟ ସେବନ କରନ୍ତି। ଶୋ’ର ବ୍ୟସ୍ତ ଓ କଠିନ ସୂଚୀ ତାଙ୍କ ସ୍ୱାସ୍ଥ୍ୟ ଉପରେ ପ୍ରଭାବ ପକାଉଥିବା ସୂଚନା ମିଳିଥିଲା। ତାଙ୍କ ରକ୍ତ ପରୀକ୍ଷା ଓ ଅନ୍ୟାନ୍ୟ ମେଡିକାଲ୍‌ ଯାଞ୍ଚ ପରେ ସେ ଶୋ’ ଜାରି ରଖିବା ପାଇଁ ଫିଟ୍‌ ନଥିବା ଜଣାପଡ଼ିଥିଲା। 

ସାଧାରଣତଃ ଏହି ଶୋ’ରେ ନିଜ ଇଚ୍ଛାରେ ବାହାରିଲେ ପ୍ରତିଯୋଗୀଙ୍କୁ ୨ କୋଟି ଟଙ୍କା ପେନାଲ୍ଟି ଦେବାକୁ ପଡ଼ିପାରେ। କିନ୍ତୁ କରଣଙ୍କ ବିଦାୟ ସ୍ୱାସ୍ଥ୍ୟଗତ କାରଣରୁ ହୋଇଥିବାରୁ ଏହି ନିୟମ ତାଙ୍କ କ୍ଷେତ୍ରରେ ଲାଗୁ ହୋଇନଥିବା ସୂଚନା ରହିଛି।

ତେଜ ପ୍ରତାପ ଯାଦବ କାହିଁକି ବାହାରିଲେ?
ଅନ୍ୟପଟେ, ତେଜ ପ୍ରତାପ ଯାଦବ ମଧ୍ୟ ଶୋ’ରୁ ବାହାରିଛନ୍ତି। ସୂଚନା ଅନୁସାରେ, ତାଙ୍କର ରାଜନୈତିକ ଓ ଆଇନଗତ ବ୍ୟସ୍ତତା ଯୋଗୁଁ ସେ ଶୋ’ ଛାଡ଼ିଛନ୍ତି। ଶୋ’ରେ ସେ ପ୍ରଥମ ‘Ultimate Ruler’ ହୋଇଥିଲେ ଏବଂ ତାଙ୍କର ଭିନ୍ନ ଅନ୍ଦାଜ ଦର୍ଶକଙ୍କ ମଧ୍ୟରେ ଚର୍ଚ୍ଚାରେ ଥିଲା। 

ତେଜ ପ୍ରତାପଙ୍କ ବିଦାୟକୁ ମଧ୍ୟ ସାଧାରଣ ୨ କୋଟି ଟଙ୍କାର ପେନାଲ୍ଟିରୁ ମୁକ୍ତ ରଖାଯାଇଥିବା ରିପୋର୍ଟରେ କୁହାଯାଇଛି। 

ଏହା ପୂର୍ବରୁ ସିୱେଟ୍‌ ତୋମର ଶେହଜାଦ ପୁନାୱାଲାଙ୍କ ସହ ଶାରୀରିକ ବିବାଦ ପରେ ଶୋ’ରୁ ବାହାରିଥିଲେ। ଏହାପରେ ଅନିଶ ଭଗତ କମ୍‌ ଭୋଟ୍‌ ପାଇବା ପରେ ଏଲିମିନେଟ୍‌ ହୋଇଥିଲେ। ଏବେ ଚାରିଜଣ ପ୍ରତିଯୋଗୀ ବାହାରିଯାଇଥିବାରୁ ଶୋ’ରେ ଶୀଘ୍ର ଦୁଇଜଣ ୱାଇଲ୍ଡ କାର୍ଡ ପ୍ରତିଯୋଗୀ ପ୍ରବେଶ କରିବେ ବୋଲି ଜଣାପଡ଼ିଛି।