ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ଘାଟ ପାଇକ ସାହିରେ ଜଣେ ବୃଦ୍ଧାଙ୍କ ସନ୍ଦେହଜନକ ମୃତ୍ୟୁ ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ଲୁଟ୍ ସମୟରେ ବୃଦ୍ଧାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି।

ମୃତ ବୃଦ୍ଧାଙ୍କୁ ପ୍ରତିମା ଜେନା ବୋଲି ଚିହ୍ନଟ କରାଯାଇଛି। ବୁଧବାର ସକାଳେ ତାଙ୍କ ଘର ଭିତରୁ ସନ୍ଦେହଜନକ ଅବସ୍ଥାରେ ମୃତଦେହ ମିଳିଥିଲା।

ସୂଚନା ଅନୁସାରେ, ପ୍ରତିମା ଜେନା ଏକୁଟିଆ ରହୁଥିଲେ। ତାଙ୍କର କୌଣସି ପୁଅ କିମ୍ବା ଝିଅ ନଥିଲେ। ମଙ୍ଗଳବାର ରାତି ପ୍ରାୟ ୧୧ଟା ପର୍ଯ୍ୟନ୍ତ ସେ ଘର ବାରଣ୍ଡାରେ ବସି ପଡ଼ୋଶୀଙ୍କ ସହ କଥା ହେଉଥିବା ଦେଖାଯାଇଥିଲା। ପରେ ସେ ଶୋଇବାକୁ ଯାଇଥିଲେ।

ବୁଧବାର ସକାଳେ ପଡ଼ୋଶୀମାନେ ତାଙ୍କ ଘରର କବାଟ ଖୋଲା ଥିବା ଦେଖି ସନ୍ଦେହ କରିଥିଲେ। ଘର ଭିତରକୁ ଯାଇ ଦେଖିବା ପରେ ଖଟ ତଳେ ପ୍ରତିମାଙ୍କ ମୃତଦେହ ପଡ଼ିଥିବା ଦେଖିଥିଲେ।

ଘର ଯାଞ୍ଚ କରିବା ପରେ ତାଙ୍କ ପିନ୍ଧିଥିବା ସୁନା ହାର, କାନଫୁଲ ଓ ଚୁଡ଼ି ଗାଏବ ଥିବା ଜଣାପଡ଼ିଥିଲା। ଏହା ସହ ଘର ଭିତରେ ଥିବା ଆଲମାରି ମଧ୍ୟ ଖୋଲା ଥିଲା।

ଏହି ପରିସ୍ଥିତିକୁ ଦେଖି ପରିବାର ଲୋକେ ଲୁଟ୍ ଉଦ୍ଦେଶ୍ୟରେ ବୃଦ୍ଧାଙ୍କୁ ହତ୍ୟା କରାଯାଇଥିବା ଅଭିଯୋଗ କରି ପୋଲିସକୁ ଖବର ଦେଇଥିଲେ।

ଖବର ପାଇ କବିସୂର୍ଯ୍ୟନଗର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି।

ତେବେ ଘଟଣାର ପ୍ରକୃତ କାରଣ, ହତ୍ୟାର ପଛରେ ଥିବା ଉଦ୍ଦେଶ୍ୟ ଓ ଅଭିଯୁକ୍ତଙ୍କ ସମ୍ପର୍କରେ ପୋଲିସ ପକ୍ଷରୁ ଏପର୍ଯ୍ୟନ୍ତ ସ୍ପଷ୍ଟ ସୂଚନା ମିଳିନାହିଁ।