ସ୍ୱିଜରଲ୍ୟାଣ୍ଡର ଗ୍ରାଉବୁଣ୍ଡେନ୍ କାଣ୍ଟନ୍ର ଥୁସିସ୍ ସହରରେ ଭୟାବହ ଅଗ୍ନିକାଣ୍ଡ ଘଟିଛି। ଏକ ରେଷ୍ଟୁରାଣ୍ଟ ସହ ଆବାସିକ କୋଠାରେ ନିଆଁ ଲାଗିବା ପରେ ଏହା ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଅଗ୍ନିକାଣ୍ଡ ପରେ ୫ ଜଣ ନିଖୋଜ ଥିବା ବେଳେ ୮ ଜଣ ଆହତ ହୋଇଛନ୍ତି।
ଗ୍ରାଉବୁଣ୍ଡେନ୍ କାଣ୍ଟନ୍ ପୋଲିସର ପ୍ରାଥମିକ ତଦନ୍ତ ଅନୁସାରେ, କୋଠାର ଦ୍ୱିତୀୟ ମହଲାରୁ ନିଆଁ ଆରମ୍ଭ ହୋଇଥିବା ସନ୍ଦେହ କରାଯାଉଛି। ତେବେ ନିଆଁ ଲାଗିବାର ପ୍ରକୃତ କାରଣ ଏପର୍ଯ୍ୟନ୍ତ ଜଣାପଡ଼ିନାହିଁ।
ଗୁରୁବାର ରାତି ୧୨ଟା ପରେ ପୋଲିସ ଓ ଜରୁରୀକାଳୀନ ସେବାକୁ ଘଟଣା ସମ୍ପର୍କରେ ଖବର ମିଳିଥିଲା। ପ୍ରାୟ ୧୦୦ ଜଣ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଉଦ୍ଧାର ଓ ନିଆଁ ନିୟନ୍ତ୍ରଣ କାର୍ଯ୍ୟ ଆରମ୍ଭ କରିଥିଲେ।
ନିଆଁର ତୀବ୍ରତା ଯୋଗୁଁ କୋଠାର ସିଡ଼ି ଭୁଶୁଡ଼ି ପଡ଼ିଥିଲା। ଫଳରେ ଉଦ୍ଧାରକାରୀମାନଙ୍କୁ ଭିତରକୁ ପ୍ରବେଶ କରିବା କଷ୍ଟକର ହୋଇଥିଲା। ପରେ କ୍ରେନ୍ ସାହାଯ୍ୟରେ କୋଠାର ଛାତ ଖୋଲାଯାଇ ଭୁଶୁଡ଼ିଥିବା ସିଡ଼ି ନିକଟରେ ଖୋଜାଖୋଜି ଆରମ୍ଭ ହୋଇଛି।
ପୋଲିସ କହିଛି, କୋଠାରେ ଥିବା ୧୪ ଜଣ ଲୋକ ନିଆଁରୁ ବାହାରି ଆସିବାରେ ସଫଳ ହୋଇଥିଲେ। ସେମାନଙ୍କ ମଧ୍ୟରୁ ୨ ଜଣ ଗୁରୁତର ଆହତ, ୨ ଜଣ ମଧ୍ୟମ ଧରଣର ଆହତ ଏବଂ ୪ ଜଣ ସାମାନ୍ୟ ଆହତ ହୋଇଛନ୍ତି।
ଆହତମାନଙ୍କୁ ଥୁସିସ୍, ଚୁର୍, ଇଲାଞ୍ଜ୍ ଓ ଜ୍ୟୁରିଖ୍ର ବିଭିନ୍ନ ହସ୍ପିଟାଲକୁ ନିଆଯାଇଛି। ଘଟଣା ସମୟରେ କୋଠାରେ ଅନେକ ବିଦେଶୀ ନାଗରିକ ମଧ୍ୟ ରହୁଥିଲେ ବୋଲି କାଣ୍ଟନ୍ ପୋଲିସର ଜଣେ ମୁଖପାତ୍ର କହିଛନ୍ତି।
ବର୍ତ୍ତମାନ ଅଗ୍ନିଶମ କର୍ମଚାରୀ ଓ ଉଦ୍ଧାରକାରୀ ଦଳ ଛାତକୁ ପର୍ଯ୍ୟାୟକ୍ରମେ ହଟାଇ ଭୁଶୁଡ଼ିଥିବା ସିଡ଼ି ନିକଟରେ ନିଖୋଜ ଲୋକଙ୍କୁ ଖୋଜୁଛନ୍ତି। ଯଦି ମାନବ ଅବଶେଷ ମିଳେ, ତେବେ ପରିଚୟ ନିଶ୍ଚିତ କରିବା ପାଇଁ DNA ନମୁନା ସଂଗ୍ରହ କରାଯିବ।
ନିଖୋଜ ଲୋକଙ୍କ ସନ୍ଧାନ ଅଭିଯାନ ଆହୁରି କିଛି ଦିନ ଚାଲିପାରେ ବୋଲି ଅଧିକାରୀମାନେ କହିଛନ୍ତି। ପୋଲିସ ଓ ସରକାରୀ ଓକିଲଙ୍କ କାର୍ଯ୍ୟାଳୟ ମିଳିତ ଭାବେ ଅଗ୍ନିକାଣ୍ଡର କାରଣ ଓ ପରିସ୍ଥିତିର ତଦନ୍ତ କରୁଛନ୍ତି।
ଥୁସିସ୍ ସ୍ୱିଜରଲ୍ୟାଣ୍ଡର ପୂର୍ବ ଭାଗର ଗ୍ରାଉବୁଣ୍ଡେନ୍ ଆଲ୍ପାଇନ୍ ଅଞ୍ଚଳରେ ଅବସ୍ଥିତ। ଏହି ଅଞ୍ଚଳ ଶୀତକାଳୀନ କ୍ରୀଡ଼ା ସହ ଗ୍ରୀଷ୍ମକାଳୀନ ପ୍ରାକୃତିକ ପର୍ଯ୍ୟଟନ ପାଇଁ ମଧ୍ୟ ଲୋକପ୍ରିୟ।
ଭୁବନେଶ୍ୱରରେ ଟ୍ରାଫିକ୍ ସମସ୍ୟା ହ୍ରାସ କରିବା ଏବଂ ସହରର ଉ...
ଓଡ଼ିଶା ସରକାର ବରିଷ୍ଠ ଆଇପିଏସ୍‌ ଅଧିକାରୀସ୍ତରରେ ଏକ...
ଅନୁଗୁଳ ଜିଲ୍ଲାରେ ହାତୀ-ମଣିଷ ସଂଘର୍ଷ ଏବେ ଚାଷୀଙ୍କ ପାଇଁ...
ଗୁଜରାଟର ସାବରକାଣ୍ଠା ଜିଲ୍ଲାରେ ଏକ ମାସର ଶିଶୁ କନ୍ୟାକୁ ୧...
ଓଡ଼ିଶାରେ ବନ୍ୟା ପରିସ୍ଥିତି ଧୀରେ ଧୀରେ ସୁଧୁରୁଥିଲେ ମଧ୍ୟ...
