ଭାରତୀୟ ଘୋଡ଼ାଚାଳନା କ୍ରୀଡ଼ା ପାଇଁ ଆସିଛି ବଡ଼ ଝଟକା। ଦୀର୍ଘଦିନ ଧରି ଚାଲିଥିବା ପ୍ରଶାସନିକ ଓ ନିର୍ବାଚନୀ ସଙ୍କଟକୁ ନେଇ International Equestrian Federation (FEI) ଭାରତର Equestrian Federation of India (EFI)କୁ ଡିସେମ୍ବର ୧, ୨୦୨୬ରୁ ସସ୍ପେଣ୍ଡ କରିବାକୁ ନିଷ୍ପତ୍ତି ନେଇଛି। ଅକ୍ଟୋବର ୧୩ରେ ହୋଇଥିବା FEI ବୋର୍ଡର ଅନଲାଇନ୍ ବୈଠକରେ ଏହି ନିଷ୍ପତ୍ତି ନିଆଯାଇଥିବା ବେଳେ ଅକ୍ଟୋବର ୧୫ରେ EFIର ଆଡ୍‌ହକ୍ କମିଟିକୁ ଏନେଇ ଚିଠି ଦିଆଯାଇଛି। 

FEI ଅନୁସାରେ, EFIର ନିର୍ବାଚିତ Executive Committeeର କାର୍ଯ୍ୟକାଳ ସେପ୍ଟେମ୍ବର ୨୦୨୩ରେ ଶେଷ ହୋଇଥିଲା। ଏହାପରେ ଦିଲ୍ଲୀ ହାଇକୋର୍ଟ ୨୦୨୬ ଫେବ୍ରୁଆରୀରେ ଏହି କମିଟିକୁ ଭଙ୍ଗ କରିଥିଲେ। ନୂଆ Executive Committee ପାଇଁ ନିର୍ବାଚନ ହୋଇନଥିବାରୁ ଦୀର୍ଘସ୍ଥାୟୀ governance crisis ସୃଷ୍ଟି ହୋଇଥିବା ଦର୍ଶାଇ FEI ସସ୍ପେନ୍ସନ୍ ନିଷ୍ପତ୍ତି ନେଇଛି। 

ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦେଶ ପରେ Indian Olympic Association (IOA) ମାର୍ଚ୍ଚ ୨୭ରେ EFI ପରିଚାଳନା ପାଇଁ ଏକ ଆଡ୍‌ହକ୍ କମିଟି ଗଠନ କରିଥିଲା। ଏହି କମିଟିର ଦାୟିତ୍ୱ ଥିଲା ଫେଡେରେସନ୍‌ର ପ୍ରଶାସନ ଚଳାଇବା, ସଂସ୍କାର ଆଣିବା ଏବଂ ନୂଆ ନିର୍ବାଚନ କରାଇବା। ତେବେ ନିର୍ବାଚନ ପ୍ରକ୍ରିୟା ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇନାହିଁ। 

ସସ୍ପେନ୍ସନ୍ ଲାଗୁ ହେବା ପରେ କେବଳ EFI ନୁହେଁ, ଏହାର ସଦସ୍ୟ ଭାରତୀୟ ରାଇଡର୍‌, ଅଧିକାରୀ, ଟ୍ରେନର୍‌ ଏବଂ ଘୋଡ଼ାମାନଙ୍କ ଉପରେ ମଧ୍ୟ ପ୍ରଭାବ ପଡ଼ିବ। ସେମାନେ FEI କିମ୍ବା ଅନ୍ୟ National Federation ଦ୍ୱାରା ଆୟୋଜିତ ଅନ୍ତର୍ଜାତୀୟ ପ୍ରତିଯୋଗିତାରେ ଭାରତୀୟ କିମ୍ବା FEI ଫ୍ଲାଗ୍‌ ତଳେ ଭାଗ ନେଇପାରିବେ ନାହିଁ। EFI କୌଣସି FEI ବୈଠକରେ ପ୍ରତିନିଧିତ୍ୱ କରିବା କିମ୍ବା ଅନ୍ତର୍ଜାତୀୟ ଇଭେଣ୍ଟ ଆୟୋଜନ କରିବାରୁ ମଧ୍ୟ ବଞ୍ଚିତ ହେବ। 

FEI କହିଛି, EFIର Executive Committee ନିର୍ବାଚନ ୨୦୨୭ ଜାନୁଆରୀ ୩୧ ସୁଦ୍ଧା ହେବା ଆଶା କରାଯାଉଛି। ତେବେ ନିର୍ବାଚନ ସରିବା ପରେ ଏହାର ପ୍ରକ୍ରିୟା ଓ ଫଳାଫଳକୁ FEI ମୂଲ୍ୟାଙ୍କନ କରିବା ପରେ ହିଁ ସସ୍ପେନ୍ସନ୍‌ର ପୁନର୍ବିଚାର କରାଯିବ। ଅର୍ଥାତ୍‌, ନିର୍ବାଚନ ସମ୍ପନ୍ନ ହେବା ମାତ୍ରେ ସ୍ୱତଃସ୍ଫୂର୍ତ୍ତ ଭାବେ ସସ୍ପେନ୍ସନ୍ ହଟିବ ନାହିଁ।

ଏହି ନିଷ୍ପତ୍ତି ଫଳରେ ଭାରତୀୟ ଘୋଡ଼ାଚାଳନା କ୍ରୀଡ଼ାବିତ୍‌ଙ୍କ ଅନ୍ତର୍ଜାତୀୟ ଅଂଶଗ୍ରହଣ ପ୍ରଭାବିତ ହେବ। ତେଣୁ ଏବେ ସମସ୍ତଙ୍କ ନଜର EFIର ଆଗାମୀ ନିର୍ବାଚନ ଏବଂ FEIର ପରବର୍ତ୍ତୀ ସମୀକ୍ଷା ଉପରେ ରହିଛି।