ମାଆ ଆସୁଛନ୍ତି... ମହାଷଷ୍ଠୀରେ ଧରାପୃଷ୍ଠକୁ ମାଆ ଦୁର୍ଗାଙ୍କ ଆଗମନକୁ ନେଇ ଚଳଚଞ୍ଚଳ ହୋଇଉଠିଛି ପୂଜାମଣ୍ଡପ। ଶଙ୍ଖଧ୍ୱନି, ଘଣ୍ଟଘଣ୍ଟା ଓ ମନ୍ତ୍ରୋଚ୍ଚାରଣରେ ମୁଖରିତ ହେଉଛି ପରିବେଶ। ଭକ୍ତି, ଆସ୍ଥା ଓ ପରମ୍ପରାର ମିଳନରେ ଆରମ୍ଭ ହୋଇଛି ଶାରଦୀୟ ଦୁର୍ଗାପୂଜାର ମହାପର୍ବ।

ଦୁର୍ଗାପୂଜାର ଅନ୍ୟତମ ପ୍ରମୁଖ ତିଥି ହେଉଛି ମହାଷଷ୍ଠୀ। ଏହି ଦିନ ପାରମ୍ପରିକ ବିଧିବିଧାନ ଅନୁସାରେ ମାଆଙ୍କ ବୋଧନ, ଆମନ୍ତ୍ରଣ ଓ ଅଧିବାସ ଭଳି ରୀତିନୀତି ସମ୍ପନ୍ନ ହୋଇଥାଏ। ଦେବୀଙ୍କୁ ଆବାହନ କରାଯାଇ ପୂଜାର୍ଚ୍ଚନାର ଶୁଭାରମ୍ଭ ହୋଇଥାଏ।

ମାଆଙ୍କ ଆଗମନକୁ ନେଇ ବିଭିନ୍ନ ପୂଜାମଣ୍ଡପରେ ବ୍ୟାପକ ପ୍ରସ୍ତୁତି ଦେଖିବାକୁ ମିଳୁଛି। କେଉଁଠି ଆକର୍ଷଣୀୟ ତୋରଣ, ତ ଆଉ କେଉଁଠି ଭବ୍ୟ ସାଜସଜ୍ଜା। ରଙ୍ଗବେରଙ୍ଗ ଆଲୋକମାଳାରେ ଝଲସୁଛି ପୂଜାମଣ୍ଡପ। ମୃଣ୍ମୟୀ ପ୍ରତିମାର ମନମୋହକ ରୂପ ଭକ୍ତଙ୍କୁ ଆକର୍ଷିତ କରୁଛି।

ଧୂପଦୀପର ମହକ ସାଙ୍ଗକୁ ଶଙ୍ଖଧ୍ୱନି ଓ ଭଜନ-କୀର୍ତ୍ତନରେ ପୂଜାମଣ୍ଡପରେ ସୃଷ୍ଟି ହୋଇଛି ଆଧ୍ୟାତ୍ମିକ ପରିବେଶ। ମାଆଙ୍କ ଦର୍ଶନ ଓ ପୂଜାର୍ଚ୍ଚନା ପାଇଁ ଭକ୍ତଙ୍କ ମଧ୍ୟରେ ମଧ୍ୟ ବେଶ୍ ଉତ୍ସାହ ଦେଖାଯାଉଛି।

ଧାର୍ମିକ ବିଶ୍ୱାସ ଅନୁସାରେ, ମାଆ ଦୁର୍ଗା ଶକ୍ତି ଓ ସାହସର ପ୍ରତୀକ। ଦୁର୍ଗାପୂଜା ଅନ୍ୟାୟ ଉପରେ ନ୍ୟାୟ ଏବଂ ଅଶୁଭ ଶକ୍ତି ଉପରେ ଶୁଭ ଶକ୍ତିର ବିଜୟର ବାର୍ତ୍ତା ଦେଇଥାଏ। ମହାଷଷ୍ଠୀରୁ ଆରମ୍ଭ ହୋଇଥିବା ଏହି ପୂଜା ପର୍ବକୁ ନେଇ ଚାରିଆଡ଼େ ଉତ୍ସବର ମାହୋଲ୍ ଦେଖିବାକୁ ମିଳୁଛି।