ଏଲନ୍ ମସ୍କଙ୍କ ଟେସ୍‌ଲା ଏବେ କାର୍‌କୁ ଆକାଶରେ ଉଡ଼ାଇବାର ଟେକ୍ନୋଲୋଜି ଦେଖାଇ ଚର୍ଚ୍ଚାରେ ଆସିଛି। ଟେସ୍‌ଲା ଏହାର ଦ୍ୱିତୀୟ ପିଢ଼ିର ରୋଡ୍‌ଷ୍ଟରର ପ୍ରୋଟୋଟାଇପ୍‌କୁ ଟେକ୍ସାସ୍‌ର ମ୍ୟାକ୍‌ଗ୍ରେଗର୍‌ରେ ଉପସ୍ଥାପନ କରିଛି। ପ୍ରଦର୍ଶନ ସମୟରେ କାର୍‌ଟି ଥ୍ରଷ୍ଟର ବ୍ୟବହାର କରି ମାଟିରୁ ଉଠିବା ସହ ହାୱାରେ ଘୂର୍ଣ୍ଣନ କରୁଥିବା ଦେଖାଯାଇଥିଲା। 

ଏହି ନୂଆ ରୋଡ୍‌ଷ୍ଟରରେ SpaceX ସହ ଜଡ଼ିତ କୋଲ୍ଡ-ଗ୍ୟାସ୍ ଥ୍ରଷ୍ଟର ଟେକ୍ନୋଲୋଜି ବ୍ୟବହାର କରାଯାଇଛି। ଥ୍ରଷ୍ଟରଗୁଡ଼ିକ ଦହନଶୀଳ ଇନ୍ଧନ ବ୍ୟବହାର ନକରି ଉଚ୍ଚଚାପରେ ସଂରକ୍ଷିତ ବାୟୁ ବାହାର କରି ଥ୍ରଷ୍ଟ ସୃଷ୍ଟି କରେ। ଟେସ୍‌ଲାର ପ୍ରଦର୍ଶନରେ ଏହି ବ୍ୟବସ୍ଥା କାର୍‌କୁ ହାୱାରେ ଉଠାଇବା ଓ ଘୂରାଇବାରେ ସାହାଯ୍ୟ କରିଥିଲା। 

ଡେମୋରେ ରୋଡ୍‌ଷ୍ଟରକୁ ଏକ ରାମ୍ପ ଉପରେ ଚଢ଼ିବା, ଉଲ୍ଟା ଅବସ୍ଥାରେ ରହିବା ଏବଂ ପରେ ଥ୍ରଷ୍ଟର ସହାୟତାରେ ମାଟିକୁ ଫେରିବା ଦେଖାଯାଇଥିଲା। ଅନ୍ୟ ଏକ ପ୍ରଦର୍ଶନରେ କାର୍‌ଟି ଅନ୍ୟ ଟେସ୍‌ଲା ଯାନଗୁଡ଼ିକ ଉପରେ ଲାଫ୍‌ କରି ହାୱାରେ ଷ୍ଟଣ୍ଟ କରିଥିଲା। 

ଟେସ୍‌ଲାର ଦାବି ଅନୁସାରେ, ନୂଆ ରୋଡ୍‌ଷ୍ଟର ୦ରୁ ୬୦ ମାଇଲ୍ ପ୍ରତି ଘଣ୍ଟା ବେଗକୁ ପ୍ରାୟ ୧ ସେକେଣ୍ଡ ମଧ୍ୟରେ ପହଞ୍ଚିପାରିବ। ଥ୍ରଷ୍ଟର ସିଷ୍ଟମ୍‌କୁ ତ୍ୱରଣ, ବ୍ରେକିଂ, କର୍ନରିଂ ଏବଂ ବିଶେଷ ଏୟାର୍ ମାନୁଭର୍‌ରେ ବ୍ୟବହାର କରାଯିବା ଲକ୍ଷ୍ୟ ରହିଛି। 

ରୋଡ୍‌ଷ୍ଟରକୁ ଟେସ୍‌ଲା ପର୍ଫର୍ମାନ୍ସ, ଥ୍ରଷ୍ଟ ଏବଂ ରକେଟ୍ ଭଳି ଭିନ୍ନ ବିକଳ୍ପରେ ଆଣିବାକୁ ଯୋଜନା କରିଛି। ବିଶେଷ ରକେଟ୍ ଭାରିଆଣ୍ଟରେ ହାୱାରେ ଉଠିବା ଓ ଘୂରିବା ପାଇଁ ଅଧିକ ଥ୍ରଷ୍ଟର ବ୍ୟବସ୍ଥା ରହିବ। 

ତେବେ ଏହାକୁ ଏବେଠାରୁ ସାଧାରଣ ରାସ୍ତାରେ ଚଳାଚଳ କରୁଥିବା ‘ଉଡ଼ନ୍ତା କାର୍’ ବୋଲି ଧରିନେବା ଠିକ୍ ହେବ ନାହିଁ। ଦେଖାଯାଇଥିବା ଘଟଣା ଏକ ନିୟନ୍ତ୍ରିତ ପ୍ରୋଟୋଟାଇପ୍ ଡେମୋ। ଏପରି ଯାନକୁ ସାଧାରଣ ଲୋକଙ୍କ ଉପଯୋଗ ପାଇଁ ଆଣିବାରେ ସୁରକ୍ଷା ଓ ବିମାନ ନିୟମ ସମ୍ପର୍କିତ ଅନେକ ପ୍ରଶ୍ନ ରହିଛି। 

ଟେସ୍‌ଲା ରୋଡ୍‌ଷ୍ଟରର ବାଣିଜ୍ୟିକ ଉତ୍ପାଦନ ୨୦୨୮ରୁ ଆରମ୍ଭ କରିବାକୁ ଲକ୍ଷ୍ୟ ରଖିଛି। ୨୦୧୭ରେ ଏହି ନୂଆ ରୋଡ୍‌ଷ୍ଟରର ପ୍ରଥମ ଘୋଷଣା ହୋଇଥିଲା। ବହୁ ବିଳମ୍ବ ପରେ ଏବେ ଏହାର ପ୍ରୋଟୋଟାଇପ୍‌ର ଏହି ଚମତ୍କାର ଡେମୋ ମସ୍କଙ୍କ ‘ଫ୍ଲାଇଂ କାର୍’ ଧାରଣାକୁ ପୁଣି ଚର୍ଚ୍ଚାକୁ ଆଣିଛି।