ଏସିଆନ୍ ଗେମ୍ସରେ ସ୍ୱର୍ଣ୍ଣ ପଦକ ହାସଲ କରିଥିବା ଭାରତୀୟ ହକି ଦଳ ଭୁବନେଶ୍ୱରରେ ପହଞ୍ଚିଛି। ଭୁବନେଶ୍ୱର ବିମାନବନ୍ଦରରେ ଖେଳାଳିମାନେ ପହଞ୍ଚିବା ପରେ ସେମାନଙ୍କୁ ଭବ୍ୟ ସ୍ୱାଗତ ଓ ସମ୍ବର୍ଦ୍ଧନା ଦିଆଯାଇଛି। ଢୋଲ ଓ ବାଜାରେ ଉତ୍ସବମୁଖର ହୋଇଉଠିଥିଲା ବିମାନବନ୍ଦର ପରିସର।

ପ୍ରଥମେ ଭାରତୀୟ ମହିଳା ହକି ଦଳ ଭୁବନେଶ୍ୱରରେ ପହଞ୍ଚିଥିବା ବେଳେ ପରେ ପୁରୁଷ ଦଳ ମଧ୍ୟ ଏଠାରେ ପହଞ୍ଚିଛି। ଉଭୟ ଦଳର ଗୌରବମୟ ସଫଳତାକୁ ନେଇ ଓଡ଼ିଶାର ହକିପ୍ରେମୀଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି।

ସୂଚନା ଅନୁସାରେ, ଭାରତୀୟ ପୁରୁଷ ହକି ଦଳ ମାଲେସିଆ ବିପକ୍ଷରେ ୫-୧ ଗୋଲରେ ବିଜୟୀ ହୋଇଥିଲା। ସେହିପରି ମହିଳା ଦଳ ଚୀନ୍ ବିପକ୍ଷରେ ୧-୦ ଗୋଲରେ ବିଜୟ ହାସଲ କରିଥିଲା। ଭାରତ ପକ୍ଷରୁ ଲାଲରେମସିଆମି ବିଜୟସୂଚକ ଗୋଲ୍ ସ୍କୋର କରିଥିବା ବେଳେ ଗୋଲକିପର ସବିତା ଏକ ଗୁରୁତ୍ୱପୂର୍ଣ୍ଣ ପେନାଲ୍ଟି ଷ୍ଟ୍ରୋକ୍ ଅଟକାଇ ଦଳକୁ ବିଜୟୀ କରିବାରେ ମହତ୍ତ୍ୱପୂର୍ଣ୍ଣ ଭୂମିକା ନେଇଥିଲେ।

ଏହି ସଫଳତା ଭାରତୀୟ ମହିଳା ହକି ପାଇଁ ମଧ୍ୟ ଐତିହାସିକ। ୪୪ ବର୍ଷ ପରେ ଭାରତୀୟ ମହିଳା ହକି ଦଳ ଏସିଆନ୍ ଗେମ୍ସରେ ସ୍ୱର୍ଣ୍ଣ ପଦକ ଜିତିଥିବାରୁ ଦଳକୁ ନେଇ ସାରା ଦେଶରେ ଉତ୍ସାହ ପ୍ରକାଶ ପାଇଛି।

ଏହି ଅବସରରେ ଆଜି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭାରତୀୟ ପୁରୁଷ ଓ ମହିଳା ହକି ଦଳକୁ ସମ୍ବର୍ଦ୍ଧିତ କରିବେ।