ନବରଙ୍ଗପୁର ଜିଲ୍ଲାରଉମରକୋଟସହରରେ ଦିନ ଦ୍ୱିପ୍ରହରରେ ଘଟିଥିବା ଏକ ଚୋରି ଘଟଣା ସ୍ଥାନୀୟ ଅଞ୍ଚଳରେ ଭୟ ଓ ଅସୁରକ୍ଷାର ପରିବେଶ ସୃଷ୍ଟି କରିଛି। ଉମରକୋଟରଡିଏନକେ କଲୋନୀରେ ଜଣେ ସ୍କୁଲ ଶିକ୍ଷୟିତ୍ରୀଙ୍କ ଘରେ ଦିନବେଳେ ଚୋରମାନେ ପଶି ମୂଲ୍ୟବାନ ସାମଗ୍ରୀ ଲୁଟି ନେଇଛନ୍ତି।

ସୂଚନା ଅନୁସାରେ, ଶିକ୍ଷୟିତ୍ରୀସ୍ୱର୍ଣ୍ଣକାନ୍ତି ମହାପାତ୍ରସ୍କୁଲକୁ ଯାଇଥିବା ବେଳେ ଘର ତାଲା ପଡ଼ିଥିଲା। ଏହାର ସୁଯୋଗ ନେଇ ଦୁର୍ବୃତ୍ତମାନେ ମୁଖ୍ୟ ଦ୍ୱାରର ତାଲା ଭାଙ୍ଗି ଘର ଭିତରକୁ ପ୍ରବେଶ କରିଥିଲେ। ପରେ ଆଲମିରା ଭାଙ୍ଗି ଏକ ଟାବଲେଟ୍, ଦୁଇଟି ମୋବାଇଲ ଫୋନ୍ ଏବଂ ସୁନା ଅଳଙ୍କାର ନେଇ ଫେରାର ହୋଇଯାଇଥିଲେ।

ସ୍କୁଲରୁ ଫେରିବା ପରେ ସ୍ୱର୍ଣ୍ଣକାନ୍ତି ମହାପାତ୍ର ଘରର ଅବସ୍ଥା ଦେଖି ସନ୍ଦେହ କରିଥିଲେ। ସେ ତୁରନ୍ତ ସ୍ଥାନୀୟ ପୋଲିସକୁ ଖବର ଦେଇଥିଲେ। ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ସ୍ୱର୍ଣ୍ଣକାନ୍ତି ମହାପାତ୍ର କହିଛନ୍ତି, ସ୍କୁଲରୁ ଘରକୁ ଫେରିବା ବେଳେ ମୁଖ୍ୟ ଦ୍ୱାରରେ ଅସ୍ୱାଭାବିକ ପରିସ୍ଥିତି ଦେଖିଥିଲେ। ପଛପଟକୁ ଯିବା ପରେ କିଛି ଚପଲ ଦେଖି ସନ୍ଦେହ ହୋଇଥିଲା ଏବଂ ସଙ୍ଗେ ସଙ୍ଗେ ପୋଲିସକୁ ଖବର ଦେଇଥିଲେ।

ସ୍ଥାନୀୟ ବାସିନ୍ଦା ରାମପ୍ରସାଦ ତୁରୁକ କହିଛନ୍ତି, ଉମରକୋଟରେ ଚୋରି ଘଟଣା ଦିନକୁ ଦିନ ବଢ଼ିବାରେ ଲାଗିଛି। ପୂର୍ବରୁ ରାତିରେ ଅଧିକାଂଶ ଚୋରି ହେଉଥିବା ବେଳେ, ବର୍ତ୍ତମାନ ଦିନବେଳେ ମଧ୍ୟ ଦୁର୍ବୃତ୍ତମାନେ ସକ୍ରିୟ ହୋଇପଡ଼ିଛନ୍ତି। ଏଥିପାଇଁ ଅଞ୍ଚଳବାସୀ ପୋଲିସ ପାଟ୍ରୋଲିଂ ବଢ଼ାଇବା ଓ କଡ଼ା ନଜରଦାରୀ କରିବାକୁ ଦାବି କରିଛନ୍ତି।

ପୋଲିସ ଘଟଣାର ତଦନ୍ତ ଜାରି ରଖିଥିବା ବେଳେ ଚୋରମାନଙ୍କୁ ଚିହ୍ନଟ କରିବା ଏବଂ ଲୁଟ୍ ସାମଗ୍ରୀ ଉଦ୍ଧାର ପାଇଁ ପଦକ୍ଷେପ ନେଉଛି।