ବାତ୍ୟା ‘ଆର୍ଣ୍ଣବ’ର ପ୍ରଭାବକୁ ନେଇ ଓଡ଼ିଶାରେ ପ୍ରଶାସନିକ ପ୍ରସ୍ତୁତି ଜୋରଦାର ହୋଇଥିବା ବେଳେ ନନ୍ଦନକାନନ ଜୁଲୋଜିକାଲ୍ ପାର୍କ ଓ ଷ୍ଟେଟ୍ ବଟାନିକାଲ୍ ଗାର୍ଡେନ୍ ମଧ୍ୟ ସୁରକ୍ଷା ବ୍ୟବସ୍ଥାକୁ ମଜବୁତ କରିଛି। ଅଧିକାରୀଙ୍କ ସୂଚନା ଅନୁସାରେ, ବାତ୍ୟା ସମୟରେ ପଶୁପକ୍ଷୀଙ୍କ ସୁରକ୍ଷା ସହ କର୍ମଚାରୀ, ପର୍ଯ୍ୟଟକ ଓ ଭିତ୍ତିଭୂମିର ସୁରକ୍ଷାକୁ ପ୍ରାଥମିକତା ଦିଆଯାଇଛି। 

ବାତ୍ୟା ପରିସ୍ଥିତିର ନିରନ୍ତର ନଜରଦାରି ପାଇଁ ୨୪ ଘଣ୍ଟିଆ କଣ୍ଟ୍ରୋଲ୍ ରୁମ୍ ସ୍ଥାପନ କରାଯାଇଛି। ରେଞ୍ଜ୍‌ୱାରୀ ମକ୍ ଡ୍ରିଲ୍ ମଧ୍ୟ କରାଯାଇଛି, ଯାହାଦ୍ୱାରା ଜରୁରୀ ସମୟରେ କର୍ମଚାରୀମାନେ ଶୀଘ୍ର ପଦକ୍ଷେପ ନେଇପାରିବେ। ପୁଲିସ, ଅଗ୍ନିଶମ ବିଭାଗ, ବିଦ୍ୟୁତ୍ ବିଭାଗ ଓ ଅନ୍ୟ ଜରୁରୀକାଳୀନ ସଂସ୍ଥା ସହ ସମନ୍ୱୟ ମଧ୍ୟ କରାଯାଇଛି। 

ସମ୍ଭାବ୍ୟ ବିପଦକୁ ଆଖିଆଗରେ ରଖି ପଶୁ ଏନ୍‌କ୍ଲୋଜର୍, ଦୁର୍ବଳ ନିର୍ମାଣ, ବିଦ୍ୟୁତ୍ ବ୍ୟବସ୍ଥା, ରାସ୍ତା ଓ ଡ୍ରେନେଜ୍‌ର ଯାଞ୍ଚ କରାଯାଇଛି। ଆବଶ୍ୟକ ପ୍ରତିରୋଧକ ବ୍ୟବସ୍ଥା ନିଆଯାଇଛି। 

ପଶୁପକ୍ଷୀଙ୍କ ପାଇଁ ପଶୁ ଚିକିତ୍ସା ବ୍ୟବସ୍ଥା ସୁଦୃଢ଼, ଆବଶ୍ୟକ ଔଷଧ, ଖାଦ୍ୟ ଓ ପାନୀୟ ଜଳ ମହଜୁଦ ରଖାଯାଇଛି। ପାଣିପାଗ ଅନୁକୂଳ ନଥିଲେ ଆବଶ୍ୟକତା ଅନୁସାରେ କିଛି ପଶୁଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ contingency plan ମଧ୍ୟ ପ୍ରସ୍ତୁତ ରହିଛି। ଜରୁରୀ ଉପକରଣ, ଉଦ୍ଧାରକାରୀ ଟିମ୍ ଓ ଯୋଗାଯୋଗ ବ୍ୟବସ୍ଥାକୁ ପ୍ରସ୍ତୁତ ରଖାଯାଇଛି। 

ଏହାସହ ନନ୍ଦନକାନନର Boat Ghatରେ ୩ଟି ଡଙ୍ଗାକୁ standby ରଖାଯାଇଛି। ବାତ୍ୟା ପରେ ପରିସର ଯାଞ୍ଚ, ଭାଙ୍ଗିପଡ଼ିଥିବା ଗଛ ଓ ଅନ୍ୟାନ୍ୟ ଆବର୍ଜନା ସଫା କରିବା ସହ ଆବଶ୍ୟକ ପୁନରୁଦ୍ଧାର କାମ କରାଯିବ। 

ନନ୍ଦନକାନନ ଓ ଷ୍ଟେଟ୍ ବଟାନିକାଲ୍ ଗାର୍ଡେନ୍‌ରେ ପର୍ଯ୍ୟଟକଙ୍କ ପ୍ରବେଶ, ସାମୟିକ ବନ୍ଦ କିମ୍ବା ପୁନଃ ଖୋଲିବା ନେଇ ନିଷ୍ପତ୍ତି ପାଣିପାଗ ଓ ସକ୍ଷମ କର୍ତ୍ତୃପକ୍ଷଙ୍କ ନିର୍ଦ୍ଦେଶ ଆଧାରରେ ନିଆଯିବ।