ନିର୍ବାଚନ ଆୟୋଗକୁ ନେଇ ଚାଲିଥିବା ବିବାଦ ମଧ୍ୟରେ କେନ୍ଦ୍ରମନ୍ତ୍ରୀ ଚିରାଗ ପାସୱାନ ନିର୍ବାଚନ ଆୟୋଗକୁ ଲୋକଙ୍କ ବିଶ୍ୱାସ ବଜାୟ ରଖିବା ସହ ଉଠୁଥିବା ପ୍ରଶ୍ନ ଉପରେ ନିଜ ପକ୍ଷ ସ୍ପଷ୍ଟ ଭାବେ ରଖିବାକୁ ଆହ୍ୱାନ ଦେଇଛନ୍ତି।

ପାସୱାନ କହିଛନ୍ତି ଯେ, ନିର୍ବାଚନ ଆୟୋଗକୁ ନେଇ ଯଦି ପ୍ରଶ୍ନ ଉଠୁଛି, ତେବେ ବିଶେଷକରି ମୁଖ୍ୟ ନିର୍ବାଚନ କମିଶନର ନିଜ ପକ୍ଷକୁ ଦୃଢ଼ ଭାବେ ଜନସାଧାରଣଙ୍କ ସମ୍ମୁଖରେ ରଖିବା ଦାୟିତ୍ୱ ନେବା ଉଚିତ। ତାଙ୍କ ମତରେ, ନିର୍ବାଚନ ପ୍ରକ୍ରିୟା ନେଇ ଲୋକଙ୍କ ମନରେ ସନ୍ଦେହ ରହିବା ଉଚିତ ନୁହେଁ।

ଏହି ବୟାନ ନିର୍ବାଚନ ଆୟୋଗର ତିନି ସଦସ୍ୟଙ୍କ ମଧ୍ୟରେ ରିପୋର୍ଟ ହୋଇଥିବା ମତଭେଦକୁ ନେଇ ଚର୍ଚ୍ଚା ବଢ଼ିଥିବା ସମୟରେ ଆସିଛି। ଦ ଇଣ୍ଡିଆନ ଏକ୍ସପ୍ରେସର ଏକ ରିପୋର୍ଟ ଅନୁଯାୟୀ, ନିର୍ବାଚନ କମିଶନର ସୁଖବୀର ସିଂହ ସାନ୍ଧୁ ଏବଂ ବିବେକ ଯୋଶୀ ଗତ ୧୦ ମାସ ମଧ୍ୟରେ ଭୋଟର ତାଲିକା, ନୂଆ ଭୋଟର ପଞ୍ଜୀକରଣ ଏବଂ ନିର୍ବାଚନୀ ତଥ୍ୟ ପରିଚାଳନା ସମ୍ପର୍କିତ ନିଷ୍ପତ୍ତି ଉପରେ ଅତିକମରେ ୧୪ ଥର ଆନୁଷ୍ଠାନିକ ଆପତ୍ତି ରଖିଥିଲେ।

ରିପୋର୍ଟରେ ଫର୍ମ-୬ରେ ପରିବର୍ତ୍ତନ, ଭୋଟର ତାଲିକାର ଡାଟାବେସ୍‌କୁ କିଏ ଏବଂ କିପରି ଆକ୍ସେସ୍ କରିବ, ଏବଂ ଭୋଟର ତାଲିକା ସମ୍ପର୍କିତ ଡିଜିଟାଲ୍ ବ୍ୟବସ୍ଥା ନେଇ ଦୁଇ ନିର୍ବାଚନ କମିଶନରଙ୍କ ଚିନ୍ତାର କଥା ଉଲ୍ଲେଖ ହୋଇଛି।

ତେବେ ନିର୍ବାଚନ ଆୟୋଗ ପକ୍ଷରୁ ଏହି ରିପୋର୍ଟ ଉପରେ ସ୍ପଷ୍ଟୀକରଣ ଦିଆଯାଇଛି। ଆୟୋଗ କହିଛି ଯେ ଲିଖିତ ଟିପ୍ପଣୀ, ପ୍ରଶ୍ନ, ବୈଷୟିକ ପରାମର୍ଶ ଓ ଆଭ୍ୟନ୍ତରୀଣ ଯାଞ୍ଚ ନିୟମିତ ପ୍ରକ୍ରିୟାର ଅଂଶ। SIR ସମେତ ଆୟୋଗର ଚୂଡ଼ାନ୍ତ ନିଷ୍ପତ୍ତିଗୁଡ଼ିକ ସର୍ବସମ୍ମତିରେ ନିଆଯାଇଥିବା ବୋଲି ଇସି ପକ୍ଷରୁ କୁହାଯାଇଛି।

ଏହି ବିବାଦ ମଧ୍ୟରେ ବିରୋଧୀ ଦଳଗୁଡ଼ିକ CEC ଜ୍ଞାନେଶ କୁମାରଙ୍କ ଉପରେ ପ୍ରଶ୍ନ ଉଠାଇବା ସହ ତାଙ୍କ ଇସ୍ତଫା ଦାବି କରୁଛନ୍ତି। ଅନ୍ୟପକ୍ଷରେ, ଚିରାଗ ପାସୱାନ କହିଛନ୍ତି ଯେ ବିରୋଧୀ ଦଳ କଣ କହୁଛନ୍ତି ତାହା ଅଲଗା ବିଷୟ, କିନ୍ତୁ ଲୋକଙ୍କ ମନରେ ନିର୍ବାଚନ ପ୍ରକ୍ରିୟାକୁ ନେଇ ସନ୍ଦେହ ନ ରହିବା ନିର୍ବାଚନ ଆୟୋଗର ଦାୟିତ୍ୱ।