ଭୁବନେଶ୍ୱର:ବାହାରୁ ଦେଖିବାକୁ ସାଧାରଣ ଚା’ ଦୋକାନ। କିନ୍ତୁ ଭିତରେ ଚାଲିଥିଲା କି ଗଞ୍ଜେଇ କାରବାର? ଏଭଳି ଅଭିଯୋଗକୁ ନେଇ ଗୁରୁବାର ଭୁବନେଶ୍ୱର VSS ନଗର ଅଞ୍ଚଳର ଏକ ଚା’ ଦୋକାନରେ ଅବକାରୀ ବିଭାଗ ଚଢ଼ାଉ କରିଛି।

ଅବକାରୀ ବିଭାଗକୁ ମିଳିଥିବା ସୂଚନା ଆଧାରରେ ଏହି ଚଢ଼ାଉ କରାଯାଇଥିଲା। ଦୋକାନ ଭିତରୁ ଗଞ୍ଜେଇ ସହ ‘GoGo’ ରୋଲିଂ ପେପର ଜବତ କରାଯାଇଛି। ଘଟଣାସ୍ଥଳରୁ ଦୋକାନୀ ତଥା ଗଞ୍ଜେଇ ବିକ୍ରିରେ ସମ୍ପୃକ୍ତ ଥିବା ସନ୍ଦେହ କରାଯାଉଥିବା ବ୍ୟକ୍ତିଙ୍କୁ ଅବକାରୀ ବିଭାଗ ଗିରଫ କରିଛି।

‘GoGo’ କହିଲେ ମିଳୁଥିଲା ଗଞ୍ଜେଇ ଭର୍ତ୍ତି ସିଗାରେଟ୍!

ଚଢ଼ାଉ ବେଳେ ଦୋକାନରୁ ବହୁ ପରିମାଣର ଗଞ୍ଜେଇ ଏବଂ GoGo ରୋଲିଂ ପେପର ମିଳିଥିବା ଜଣାପଡ଼ିଛି। ଅଭିଯୋଗ ଅନୁସାରେ, ଗ୍ରାହକମାନେ ସଙ୍କେତ ଭାଷାରେ ‘GoGo’ ମାଗୁଥିଲେ ଏବଂ ସେମାନଙ୍କୁ ଗଞ୍ଜେଇ ଭର୍ତ୍ତି ସିଗାରେଟ୍ ଦିଆଯାଉଥିଲା।

ଅଭିଯୁକ୍ତ ନିଜେ OTVକୁ କହିଛନ୍ତି ଯେ, ତାଙ୍କ ନିକଟରୁ ପ୍ରାୟ ୩ କିଲୋ ଗଞ୍ଜେଇ ଜବତ ହୋଇଛି। ଗାଡ଼ି ଚାଳକମାନେ ତାଙ୍କୁ ଗଞ୍ଜେଇ ଆଣି ଦେଉଥିଲେ ଏବଂ ପ୍ରତିଥର ୧ରୁ ୧.୫ କିଲୋଗ୍ରାମ ପର୍ଯ୍ୟନ୍ତ ପ୍ୟାକେଟରେ ଯୋଗାଣ କରାଯାଉଥିବା ସେ ଦାବି କରିଛନ୍ତି।

ଟଙ୍କା ଦରକାର ଥିବାରୁ ଏହି ବେଆଇନ କାରବାରରେ ସେ ଜଡ଼ିତ ହୋଇଥିବା ମଧ୍ୟ ଅଭିଯୁକ୍ତ କହିଛନ୍ତି।

ଅଭିଯୁକ୍ତ ପୂର୍ବରୁ ମଧ୍ୟ ଗଞ୍ଜେଇ ମାମଲାରେ ଗିରଫ ହୋଇଥିଲେ

ଏହି ମାମଲାରେ ଅବକାରୀ ବିଭାଗର DSP କହିଛନ୍ତି ଯେ, ଅଭିଯୁକ୍ତ ପୂର୍ବରୁ ମଧ୍ୟ ଗଞ୍ଜେଇ କାରବାର ଅଭିଯୋଗରେ ଗିରଫ ହୋଇଥିଲେ। ତାଙ୍କ ବିରୋଧରେ NDPS ଆଇନ ଅନୁଯାୟୀ ମାମଲା ବିଚାରାଧୀନ ଥିବା ସହ ସେ ଜଣେ history-sheeter ବୋଲି ବିଭାଗ ପକ୍ଷରୁ କୁହାଯାଇଛି।

ଅବକାରୀ ବିଭାଗ ଓ BMCର ମିଳିତ ଟିମ୍ ଏହି ଚଢ଼ାଉ କରିଥିଲା। ଅଭିଯୋଗ ଥିବା ଦୋକାନଟିକୁ ମଧ୍ୟ ଭାଙ୍ଗି ଦିଆଯାଇଥିବା DSP ସୂଚନା ଦେଇଛନ୍ତି।

ସ୍ଥାନୀୟ ସୂଚନା ଅନୁସାରେ, ଏହି ଦୋକାନରେ ଦୀର୍ଘଦିନ ଧରି ଗଞ୍ଜେଇ କାରବାର ଚାଲିଥିବା ଅଭିଯୋଗ ରହିଥିଲା। ତେବେ ଜବତ ଗଞ୍ଜେଇର ସଠିକ୍ ପରିମାଣ, କାରବାର କେତେଦିନ ଧରି ଚାଲିଥିଲା ଏବଂ ଏହା ପଛରେ ଆଉ କେଉଁମାନଙ୍କ ସମ୍ପୃକ୍ତି ରହିଛି, ସେନେଇ ତଦନ୍ତ ଜାରି ରହିଛି।

ରାଜଧାନୀର ବିଭିନ୍ନ ସ୍ଥାନରେ ଛୋଟ ଚା’ ଦୋକାନ କିମ୍ବା କ୍ୟାବିନ୍କୁ ଆଢ଼ୁଆଳ କରି ନିଶାଦ୍ରବ୍ୟ ବିକ୍ରି ହେଉଥିବା ଅଭିଯୋଗ ମଧ୍ୟରେ ଏହି ଚଢ଼ାଉ ପରେ ଅବକାରୀ ବିଭାଗର ନଜରଦାରି ଆହୁରି କଡ଼ା ହେବାର ସମ୍ଭାବନା ରହିଛି।