ଭୁବନେଶ୍ୱର: ସବସିଡିପ୍ରାପ୍ତ LPG ସିଲିଣ୍ଡରର ଅବୈଧ ବ୍ୟବସାୟ, ଡାଇଭର୍ସନ୍ ଓ କଳାବଜାରୀକୁ ନିୟନ୍ତ୍ରଣ କରିବା ଲକ୍ଷ୍ୟରେ ସିଭିଲ ସପ୍ଲାଇଜ୍ ଏନଫୋର୍ସମେଣ୍ଟ ସ୍କ୍ୱାଡ୍ ଶୁକ୍ରବାର ଏକ ବଡ଼ ଧରଣର ଚଢ଼ାଉ କରିଛି।

ଭାରତପୁର ଥାନା ଅଧୀନସ୍ଥ ସାମ୍ପୁର ଅଞ୍ଚଳର ୱାର୍ଡ ନମ୍ବର ୨୩ରେ ଚାଲୁଥିବା ଏକ ଉଚ୍ଛେଦ ସ୍ଥଳରେ ଅଚାନକ ଯାଞ୍ଚ ସମୟରେ ଅଧିକାରୀମାନେ ମୋଟ ୬୨ଟି LPG ସିଲିଣ୍ଡର ଉଦ୍ଧାର କରିଛନ୍ତି।

ଜବତ ସିଲିଣ୍ଡର ମଧ୍ୟରେ ୫୧ଟି ୧୪.୨ କିଲୋଗ୍ରାମ ଘରୋଇ ସିଲିଣ୍ଡର,୬ଟି ୨ କିଲୋ ସିଲିଣ୍ଡରଏବଂ୫ଟି ୫ କିଲୋ ସିଲିଣ୍ଡର ଥିବା ସୂଚନା ମିଳିଛି। ତେବେ ସମସ୍ତ ସିଲିଣ୍ଡର ସମ୍ପୂର୍ଣ୍ଣ ଖାଲି ଥିଲା ଏବଂ ଘଟଣାସ୍ଥଳରେ କୌଣସି ଦାବିଦାର କିମ୍ବା ମାଲିକ ଉପସ୍ଥିତ ନଥିଲେ।

ଏପରି ସନ୍ଦେହଜନକ ପରିସ୍ଥିତି ଦେଖି ପ୍ରଶାସନ ଅନୁମାନ କରୁଛି ଯେ, ଏହି ସିଲିଣ୍ଡରଗୁଡ଼ିକୁ ଅବୈଧ ଭାବେ ମଜୁତ କରାଯାଇ ଘରୋଇ ସବସିଡି ଗ୍ୟାସକୁ ବ୍ୟାପାରିକ କାର୍ଯ୍ୟରେ ବ୍ୟବହାର କିମ୍ବା କଳାବଜାରୀ କରାଯାଉଥିଲା। ଏହା Liquefied Petroleum Gas (Regulation of Supply and Distribution) Order ଅନୁଯାୟୀ ସଂପୂର୍ଣ୍ଣ ଅବୈଧ ବୋଲି କୁହାଯାଇଛି।

ଏହି ଜବତି କାର୍ଯ୍ୟ କମିଶନରେଟ୍ ପୋଲିସ କର୍ମଚାରୀ ଓ ଭୁବନେଶ୍ୱର ଡିଭେଲପମେଣ୍ଟ ଅଥରିଟି (BDA) ଅଧିକାରୀଙ୍କ ଉପସ୍ଥିତିରେ ସମ୍ପନ୍ନ ହୋଇଛି। ଘଟଣାକୁ ନେଇ ଆବଶ୍ୟକ ଆଇନଗତ ପଦକ୍ଷେପ ଆରମ୍ଭ ହୋଇଥିବା ବେଳେ ଅବୈଧ ଚକ୍ରର ମୂଳ ଅପରାଧୀଙ୍କୁ ଚିହ୍ନଟ କରିବାକୁ ତଦନ୍ତ ଜୋରଦାର କରାଯାଇଛି।