ବ୍ରହ୍ମପୁର ଉପକଣ୍ଠ କୁକୁଡ଼ାଖଣ୍ଡିରେ ବୋମାମାଡ଼କୁ ନେଇ ତୀବ୍ର ଉତ୍ତେଜନା ସୃଷ୍ଟି ହୋଇଛି। ପାଞ୍ଚଟି ବାଇକ୍ରେ ଆସିଥିବା କିଛି ଦୁର୍ବୃତ୍ତ ଅଞ୍ଚଳରେ ବୋମା ଫିଙ୍ଗିଥିବା ଅଭିଯୋଗ ହୋଇଛି। ପୂର୍ବରୁ ଜଣେ ଯୁବକଙ୍କୁ ଖଣ୍ଡାରେ ଆକ୍ରମଣ ଘଟଣାକୁ ନେଇ ଅଞ୍ଚଳରେ ଉତ୍ତେଜନା ରହିଥିବା ବେଳେ ଏହି ବୋମାମାଡ଼ ପରିସ୍ଥିତିକୁ ଆହୁରି ଗମ୍ଭୀର କରିଛି।

ସୂଚନା ଅନୁସାରେ, ବୋମାମାଡ଼ ପରେ ଅଭିଯୁକ୍ତମାନେ ବାଇକ୍ରେ ଘଟଣାସ୍ଥଳରୁ ଖସିଯିବାକୁ ଚେଷ୍ଟା କରିଥିଲେ। ଏହି ସମୟରେ ସ୍ଥାନୀୟ ଲୋକେ ସେମାନଙ୍କ ଉପରେ ପଥରମାଡ଼ କରିଥିଲେ। ପଥରମାଡ଼ରେ ଦୁଇଜଣ ବାଇକ୍ରୁ ତଳେ ପଡ଼ିଯିବା ପରେ ଗାଁଲୋକେ ସେମାନଙ୍କୁ ଧରି ରଖିଥିଲେ।

ଖବର ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଦୁଇଜଣଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲା। ତେବେ ଗାଁଲୋକେ ପୋଲିସ ଗାଡ଼ିକୁ ମଧ୍ୟ ଅଟକାଇଥିଲେ। ଘଟଣାରେ ସମ୍ପୃକ୍ତ ସମସ୍ତ ଅଭିଯୁକ୍ତ ଗିରଫ ନହେବା ପର୍ଯ୍ୟନ୍ତ ପୋଲିସ ଗାଡ଼ିକୁ ଛାଡ଼ିବେ ନାହିଁ ବୋଲି ସ୍ଥାନୀୟ ଲୋକେ କହିଥିବା ସୂଚନା ମିଳିଛି।

ଏହି ସମୟରେ ଲୋକଙ୍କ ପଥରମାଡ଼ରେ ପୋଲିସ ଗାଡ଼ି ମଧ୍ୟ କ୍ଷତିଗ୍ରସ୍ତ ହୋଇଛି। ପୋଲିସ ପରିସ୍ଥିତିକୁ ନିୟନ୍ତ୍ରଣକୁ ଆଣିବାକୁ ଉଦ୍ୟମ ଜାରି ରଖିଛି।

ପୂର୍ବରୁ କୁକୁଡ଼ାଖଣ୍ଡି ମୁଖ୍ୟ ରାସ୍ତାରେ ବାଉରୀ ସାହିର ଜଣେ ଯୁବକଙ୍କୁ କିଛି ଦୁର୍ବୃତ୍ତ ଖଣ୍ଡାରେ ଆକ୍ରମଣ କରିଥିବା ଅଭିଯୋଗ ହୋଇଥିଲା। ଏଥିରେ ଯୁବକ ଜଣକ ସାମାନ୍ୟ ଆହତ ହୋଇଥିଲେ। ସେହି ଘଟଣା ପରଠାରୁ ଅଞ୍ଚଳରେ ଉତ୍ତେଜନା ରହିଥିବା ବେଳେ ପୁଣି ବୋମାମାଡ଼ ଘଟଣା ଘଟିଛି।