ବ୍ରହ୍ମପୁର: ଓଡ଼ିଶାର ଜଣେ ଯୁବ ଇଞ୍ଜିନିୟରଙ୍କ ଅନନ୍ୟ କଳାକୃତି ଏବେ ଅନ୍ତର୍ଜାତୀୟ ସ୍ତରରେ ପ୍ରଶଂସା ସାଉଁଟିଛି। ବ୍ରହ୍ମପୁରର ଦୁରା ଗାଁର କେ. ବିଜୟ କୁମାର ରେଡ୍ଡୀ ଅତି କ୍ଷୁଦ୍ର ଆକାରର ଚକ୍‌ ମୂର୍ତ୍ତି ତିଆରି କରି BRICS ସମ୍ମିଳନୀକୁ ନେଇ ନିଜ ପ୍ରତିଭାର ପରିଚୟ ଦେଇଛନ୍ତି।

ଭାରତ ଚଳିତ ବର୍ଷ BRICS ଶିଖର ସମ୍ମିଳନୀ ଆୟୋଜନ କରୁଥିବାରୁ ବିଶ୍ୱର ବିଭିନ୍ନ ଦେଶରୁ ଆସୁଥିବା ପ୍ରତିନିଧିଙ୍କୁ ସ୍ୱାଗତ ଜଣାଇବା ଉଦ୍ଦେଶ୍ୟରେ ବିଜୟ ଏହି କଳାକୃତି ତିଆରି କରିଥିଲେ। ସେ ଚକ୍‌ରେ ବ୍ରାଜିଲ, ରୁଷିଆ, ଭାରତ, ଚୀନ୍ ଓ ଦକ୍ଷିଣ ଆଫ୍ରିକାର ନେତାଙ୍କ କ୍ଷୁଦ୍ର ପ୍ରତିମୂର୍ତ୍ତି ତିଆରି କରିଛନ୍ତି।

ଏହି ପ୍ରତିମୂର୍ତ୍ତିଗୁଡ଼ିକର ଉଚ୍ଚତା ମାତ୍ର ପ୍ରାୟ ୧ ସେଣ୍ଟିମିଟର। ଏହା ସହ ସେ ୨୦୨୬ BRICS ଲୋଗୋ ମଧ୍ୟ ତିଆରି କରିଛନ୍ତି, ଯାହାର ଆକାର ମାତ୍ର ୫ ମିଲିମିଟର। ଏତେ କ୍ଷୁଦ୍ର ଆକାରରେ ଏଭଳି ସୂକ୍ଷ୍ମ କାମ କରିବା ପାଇଁ ତାଙ୍କୁ ପ୍ରାୟ ଏକ ମାସ ସମୟ ଲାଗିଥିଲା।

ବିଜୟଙ୍କ କହିବା ଅନୁସାରେ, ଗୋଟିଏ ଚକ୍‌ କଳାକୃତି ତିଆରି କରିବାକୁ ପ୍ରାୟ ଦୁଇ ଦିନ ସମୟ ଲାଗିଥାଏ। ପାଞ୍ଚଜଣ ନେତାଙ୍କ ପ୍ରତିମୂର୍ତ୍ତି ସମେତ ଲୋଗୋ ତିଆରି କରିବା ପାଇଁ ସେ ପ୍ରାୟ ଏକ ମାସ ଧରି ଅତ୍ୟନ୍ତ ସୂକ୍ଷ୍ମ କାରିଗରୀ କରିଥିଲେ।

ଦକ୍ଷିଣ ଆଫ୍ରିକାରୁ ମିଳିଲା ପ୍ରଶଂସା

ବିଜୟ ନିଜ କଳାକୃତିର ଫଟୋ BRICSରେ ସାମିଲ ଥିବା ବିଭିନ୍ନ ଦେଶର ଦୂତାବାସକୁ ପଠାଇଥିଲେ। ଏହାପରେ ଦକ୍ଷିଣ ଆଫ୍ରିକା ହାଇ କମିଶନ ପକ୍ଷରୁ ତାଙ୍କୁ ଇମେଲ୍ ମାଧ୍ୟମରେ ପ୍ରଶଂସା କରାଯାଇଥିଲା। ଏହା ସହ କଳାକୃତିଗୁଡ଼ିକୁ ଦକ୍ଷିଣ ଆଫ୍ରିକା ନେଇଯିବାକୁ ମଧ୍ୟ ହାଇ କମିଶନ ପକ୍ଷରୁ ଅନୁରୋଧ କରାଯାଇଛି।

ଭବିଷ୍ୟତରେ ମଧ୍ୟ ଏଭଳି କଳାକୃତି ପାଇଁ ବିଜୟଙ୍କ ସହ ଯୋଗାଯୋଗ କରାଯିବ ବୋଲି ଦକ୍ଷିଣ ଆଫ୍ରିକା ହାଇ କମିଶନ ପକ୍ଷରୁ ଜଣାଯାଇଛି। ଫଳରେ ବ୍ରହ୍ମପୁରରୁ ତିଆରି ହୋଇଥିବା ଏହି କ୍ଷୁଦ୍ର କଳାକୃତି ଏବେ ଦକ୍ଷିଣ ଆଫ୍ରିକାରେ ପହଞ୍ଚିବାକୁ ଯାଉଛି।

ଏହି କଳାକୃତି ଓଡ଼ିଶାର କଳା ପ୍ରତିଭାକୁ ଅନ୍ତର୍ଜାତୀୟ ମଞ୍ଚରେ ନୂଆ ପରିଚୟ ଦେବା ସହ ଭାରତର BRICS ଆୟୋଜନକୁ ଏକ ନିଆରା କଳାତ୍ମକ ରୂପ ଦେଇଛି।