ବଙ୍ଗୋପସାଗରରେ ପୁଣି ଏକ ଘୂର୍ଣ୍ଣିବଳୟ ସୃଷ୍ଟି ହେବାକୁ ଯାଉଛି। ଆଜି ଦକ୍ଷିଣ-ପୂର୍ବ ବଙ୍ଗୋପସାଗରରେ ଏକ ନୂଆ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି। ଏନେଇ ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ସୂଚନା ଦିଆଯାଇଛି। ପାଣିପାଗ ଆକଳନ ଅନୁସାରେ, ଏହି ଲଘୁଚାପ ଉତ୍ତର-ପଶ୍ଚିମ ଦିଗକୁ ଗତି କରିବା ସହ ଶୁକ୍ରବାର ସୁଦ୍ଧା ଅଧିକ ଘନୀଭୂତ ହୋଇପାରେ । ଏହା ନଭେମ୍ବର ୧୫ ତାରିଖ ଆଖପାଖରେ ଅବପାତର ରୂପ ନେବା ସମ୍ଭାବନା ରହିଛି।

ଏହି ପାଣିପାଗ ପରିବର୍ତ୍ତନକୁ ନେଇ ଓଡ଼ିଶାର ପାଣିପାଗ ଉପରେ ମଧ୍ୟ ନଜର ରହିଛି। ନଭେମ୍ବର ୧୭ରୁ ରାଜ୍ୟରେ ବର୍ଷା ସମ୍ଭାବନା ନେଇ ପୂର୍ବାନୁମାନ ପ୍ରକାଶ ପାଇଛି। ତେବେ ଆଞ୍ଚଳିକ ପାଣିପାଗ କେନ୍ଦ୍ରର ଆକଳନ ଅନୁସାରେ, ନଭେମ୍ବର ୧୯ ତାରିଖ ସକାଳ ପର୍ଯ୍ୟନ୍ତ ରାଜ୍ୟରେ ପ୍ରାୟତଃ ଶୁଖିଲା ପାଗ ରହିପାରେ । ଏହି ସମୟରେ ବଡ଼ ଧରଣର ବର୍ଷା ସମ୍ଭାବନା କମ୍ ରହିଛି। ତେଣୁ ପାଣିପାଗ ବିଭାଗର ପରବର୍ତ୍ତୀ ଆକଳନ ଉପରେ ନଜର ରହିବ ।

ଅନ୍ୟପଟେ ଏହି ପାଣିପାଗ ପରିବର୍ତ୍ତନକୁ ନେଇ ଚାଷୀଙ୍କ ଚିନ୍ତା ବଢ଼ିଛି। ଏବେ ଧାନ ଅମଳର ସମୟ ହୋଇଥିବାରୁ ବର୍ଷା ହେଲେ ଫସଲ ନଷ୍ଟ ହେବାର ଆଶଙ୍କା ରହିଛି। ବିଶେଷ କରି ଖଳାରେ ଥିବା ଧାନ ଓ ଅମଳ ପାଇଁ ପ୍ରସ୍ତୁତ ଫସଲ ଉପରେ ବର୍ଷାର ପ୍ରଭାବ ପଡ଼ିପାରେ ।

ଏହି ସମୟରେ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜରେ ଅଧିକ ବର୍ଷା ହେବାର ଆକଳନ ରହିଛି। ସେହିପରି ନଭେମ୍ବର ୧୭ ତାରିଖ ପର୍ଯ୍ୟନ୍ତ ଆଣ୍ଡାମାନ ସାଗର, ଦକ୍ଷିଣ-ପୂର୍ବ ବଙ୍ଗୋପସାଗର ଏବଂ ଏହାର ଆଖପାଖ ସମୁଦ୍ର ଅଞ୍ଚଳକୁ ମାଛ ଧରିବାକୁ ନଯିବା ପାଇଁ ମତ୍ସ୍ୟଜୀବୀଙ୍କୁ ପାଣିପାଗ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।

ସେପଟେ ରାଜ୍ୟରେ ଶୀତର ପ୍ରକୋପ ମଧ୍ୟ ଅନୁଭୂତ ହେବାରେ ଲାଗିଛି। ସେମିଳିଗୁଡ଼ାରେ ସର୍ବନିମ୍ନ ତାପମାତ୍ରା ୧୧.୧ ଡିଗ୍ରୀ ସେଲସିୟସ୍ ରେକର୍ଡ ହୋଇଛି। ଏହା ପରେ ଜି. ଉଦୟଗିରିରେ ୧୨.୫ ଡିଗ୍ରୀ ଏବଂ ନବରଙ୍ଗପୁରରେ ୧୩.୫ ଡିଗ୍ରୀ ସେଲସିୟସ୍ ତାପମାତ୍ରା ରହିଛି।

ତେବେ ବର୍ତ୍ତମାନ ପାଇଁ ଓଡ଼ିଶା ପ୍ରତି କୌଣସି ବଡ଼ ବିପଦର ଆଶଙ୍କା କରାଯାଇନାହିଁ । ଆଗାମୀ ୪୮ରୁ ୭୨ ଘଣ୍ଟା ମଧ୍ୟରେ ଲଘୁଚାପର ଗତିବିଧି ଓ ତୀବ୍ରତା ଉପରେ ପାଣିପାଗ ବିଭାଗ ନଜର ରଖିବ ।