ବରଗଡ଼ ଧନୁଯାତ୍ରାକୁ ନେଇ ଆସିଛି ଏକ ବଡ଼ ଖବର। ଆଗାମୀ ୨୦୨୬–୨୭ ଧନୁଯାତ୍ରାରେ ‘ମହାରାଜ କଂସ’ ଭୂମିକାରେ ଅଭିନୟ କରିବେ ନାହିଁ ସୁଶୀଲ ମେହେର। ସେ ବରଗଡ଼ ଜିଲ୍ଲାପାଳ ତଥା ଧନୁଯାତ୍ରା ମହୋତ୍ସବ ସମିତିର ସଭାପତି ଆଦିତ୍ୟ ଗୋୟଲଙ୍କୁ ଚିଠି ଦେଇ ଏହି ଭୂମିକାରୁ ଓହରିବା ନେଇ ଜଣାଇଛନ୍ତି।

ସୁଶୀଲ ମେହେରଙ୍କୁ ୨୦୨୫–୨୬ ଧନୁଯାତ୍ରା ପାଇଁ ‘କଂସ’ ଭୂମିକାରେ ଚୟନ କରାଯାଇଥିଲା। ପ୍ରଚଳିତ ନିୟମ ଅନୁଯାୟୀ, ଏହି ଭୂମିକାରେ ଚୟନ ହୋଇଥିବା କଳାକାରଙ୍କୁ କ୍ରମାଗତ ତିନି ବର୍ଷ ଅଭିନୟ କରିବାର ସୁଯୋଗ ମିଳିଥାଏ। ତେବେ ମେହେରଙ୍କ ଅଭିନୟକୁ ନେଇ ନିକଟରେ ବିବାଦ ଓ ସମାଲୋଚନା ଦେଖାଦେଇଥିଲା।

ଧନୁଯାତ୍ରା ମହୋତ୍ସବ ସମିତିର ଏକ ବୈଠକରେ ବିଭିନ୍ନ କମିଟିର ପ୍ରତିନିଧିମାନେ କଂସ ଭୂମିକାରେ ପରିବର୍ତ୍ତନ ଦାବି କରିଥିବା ଜଣାପଡ଼ିଛି। ଏହା ପରେ ସମିତି ପକ୍ଷରୁ ସୁଶୀଲ ମେହେରଙ୍କୁ ନିଜ ନିଷ୍ପତ୍ତି ଜଣାଇବା ପାଇଁ ୧୫ ଦିନ ସମୟ ଦିଆଯାଇଥିଲା। କିନ୍ତୁ ସମୟସୀମା ପୂର୍ବରୁ ହିଁ ସେ ନିଜେ ଭୂମିକାରୁ ଓହରିବାକୁ ନିଷ୍ପତ୍ତି ନେଇଛନ୍ତି।

ବିବାଦ ଯୋଗୁଁ ମାନସିକ ଚାପ ସୃଷ୍ଟି ହୋଇଥିବାରୁ ସେ ଏହି ନିଷ୍ପତ୍ତି ନେଇଥିବା ରିପୋର୍ଟରେ କୁହାଯାଇଛି। ଭବିଷ୍ୟତରେ ସୁଯୋଗ ମିଳିଲେ ପୁଣି ଧନୁଯାତ୍ରାରେ ‘କଂସ’ ଭୂମିକା କରିବାକୁ ସେ ଇଚ୍ଛୁକ ବୋଲି ମଧ୍ୟ ଜଣାପଡ଼ିଛି।

ସୁଶୀଲ ମେହେରଙ୍କ ଓହରିବା ପରେ ଆଗାମୀ ଧନୁଯାତ୍ରା ପାଇଁ ନୂଆ ‘କଂସ’ ଚୟନ କରିବାକୁ ହେବ। ୨୦୨୬–୨୭ ଧନୁଯାତ୍ରା ଜାନୁଆରୀ ୧୨ରୁ ୨୨, ୨୦୨୭ ପର୍ଯ୍ୟନ୍ତ ହେବାକୁ ଧାର୍ଯ୍ୟ ହୋଇଛି। ଏବେ ପରବର୍ତ୍ତୀ କଂସ ଭୂମିକା ପାଇଁ କାହାକୁ ଚୟନ କରାଯିବ, ତାହା ଉପରେ ନଜର ରହିଛି।