ଗୁଜରାଟର ଜାମନଗରସ୍ଥିତ ଇଣ୍ଡିଆନ୍ ବ୍ୟାଙ୍କର ରଣଜିତସାଗର ରୋଡ୍ ଶାଖାରେ ସୁନା ଚୋରିକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ଗ୍ରାହକମାନେ ଗୋଲ୍ଡ ଲୋନ୍ ପାଇଁ ବ୍ୟାଙ୍କରେ ବନ୍ଧକ ରଖିଥିବା ପ୍ରାୟ ୩୪୨.୧ ଗ୍ରାମ ଅସଲି ସୁନା ଅଳଙ୍କାର ଚୋରି ହୋଇଥିବା ଅଭିଯୋଗ ହୋଇଛି। ଚୋରି ହୋଇଥିବା ସୁନାର ଆନୁମାନିକ ମୂଲ୍ୟ ୩୯.୪୮ ଲକ୍ଷ ଟଙ୍କା ବୋଲି କୁହାଯାଇଛି।

ଅସଲି ସୁନା ବଦଳରେ ନକଲି ଗହଣା

ପୋଲିସ ଅନୁସାରେ, ଅଗଷ୍ଟ ୨୭ ତାରିଖରେ ଏହି ଚୋରି ଘଟିଥିବା ଅଭିଯୋଗ ହୋଇଛି। ବ୍ୟାଙ୍କର ପିଅନ୍-କମ୍-କ୍ଲର୍କ ଭାବେ କାମ କରୁଥିବା ହସମୁଖ ଦିନେଶଭାଇ ପାରିଆ ଏହି ଘଟଣାର ମୁଖ୍ୟ ଅଭିଯୁକ୍ତ ବୋଲି ପୋଲିସ କହିଛି।

ଶାଖା ପରିଚାଳକ କ୍ୟାବିନରୁ ବାହାରେ ଥିବା ସମୟରେ ହସମୁଖ ଷ୍ଟ୍ରଙ୍ଗ୍ ରୁମ୍‌ର ଚାବି ହାତେଇ ଲକର ଖୋଲିଥିବା ଅଭିଯୋଗ ହୋଇଛି। ସେଠାରୁ ସୁନା ହାର, ମଙ୍ଗଳସୂତ୍ର, ମୁଦି ଓ କାନଫୁଲ ଭଳି ଅଳଙ୍କାର ବାହାର କରି ନିଆଯାଇଥିଲା। ଚୋରି ତୁରନ୍ତ ଧରାନପଡ଼ିବା ପାଇଁ ସେହି ପ୍ୟାକେଟ୍‌ରେ ସମାନ ଆକାରର ନକଲି ଗହଣା ରଖାଯାଇଥିବା ଅଭିଯୋଗ ରହିଛି।

ଗୁପ୍ତ ସୂଚନାରୁ ମିଳିଲା ସୁରାକ୍

ଘଟଣାର ତଦନ୍ତ କରୁଥିବା ଜାମନଗର ସିଟି 'ଏ' ଡିଭିଜନ୍ ପୋଲିସ ଗୁପ୍ତ ସୂଚନା ଆଧାରରେ ବିଜୟ ଆଳାଭାଇ ଭଗୋରାଙ୍କୁ ଧରିଥିଲା। ସେ ବିନା ଆବଶ୍ୟକ କାଗଜପତ୍ରରେ ସୁନା ବିକ୍ରି କରିବାକୁ ଚେଷ୍ଟା କରୁଥିବା ପୋଲିସ ଦାବି କରିଛି।

ପଚରାଉଚରା ସମୟରେ ବିଜୟ ବ୍ୟାଙ୍କ କର୍ମଚାରୀ ହସମୁଖଙ୍କ ସହ ନିଜର ସମ୍ପୃକ୍ତି ବିଷୟରେ ସୂଚନା ଦେଇଥିବା ପୋଲିସ କହିଛି। ଏହାପରେ ବ୍ୟାଙ୍କ ଲକର ଯାଞ୍ଚ କରାଯିବାରୁ ନକଲି ଗହଣା ମିଳିଥିଲା।

୨ ଅଭିଯୁକ୍ତ ଗିରଫ

ବ୍ୟାଙ୍କ ମ୍ୟାନେଜର ହେମରାଜ ଗଜରାଙ୍କ ଅଭିଯୋଗ ଆଧାରରେ ପୋଲିସ ହସମୁଖ ପାରିଆ ଏବଂ ତାଙ୍କ ସହଯୋଗୀ ବିଜୟ ଭଗୋରାଙ୍କୁ ଗିରଫ କରିଛି। ପୋଲିସ ଚୋରି ହୋଇଥିବା ସୁନା ଅଳଙ୍କାର ସହ କିଛି ନଗଦ ଟଙ୍କା ମଧ୍ୟ ଜବତ କରିଥିବା ସୂଚନା ମିଳିଛି।