ଜାପାନରେ ଏସିଆନ୍ ଗେମ୍ସ ଆରମ୍ଭ ହେବା ପୂର୍ବରୁ ଖେଳାଳିଙ୍କ ରହିବା ବ୍ୟବସ୍ଥାକୁ ନେଇ ବଡ଼ ପ୍ରଶ୍ନ ଉଠିଛି। ଦକ୍ଷିଣ କୋରିଆର ଅଧିକାରୀ ଓ ଖେଳାଳିମାନେ ଜାପାନରେ ଦିଆଯାଇଥିବା ଆବାସ ବ୍ୟବସ୍ଥାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ବେଡ୍‌ ଅତ୍ୟଧିକ ଛୋଟ ହେବା ସହ କଣ୍ଟେନର ଘରେ ଦୁଇ ମିଟରରୁ ଅଧିକ ଉଚ୍ଚତାର ଖେଳାଳିମାନେ ଠିକ୍‌ ଭାବେ ପାଦ ଲମ୍ବା କରିପାରୁନଥିବା ଅଭିଯୋଗ ହୋଇଛି।

AFP ରିପୋର୍ଟ ଅନୁଯାୟୀ, ଏଥର ଏସିଆନ୍ ଗେମ୍ସ ପାଇଁ ଅଲଗା ଆଥଲେଟ୍‌ ଭିଲେଜ୍‌ ନିର୍ମାଣ କରାଯାଇନାହିଁ। ଖର୍ଚ୍ଚ କମାଇବା ପାଇଁ ଖେଳାଳି ଓ ଅଧିକାରୀମାନଙ୍କୁ ଅସ୍ଥାୟୀ କାଠ କ୍ୟାବିନ୍, ହୋଟେଲ୍ ଏବଂ ଏକ କ୍ରୁଜ୍ ଜାହାଜରେ ରଖିବାର ବ୍ୟବସ୍ଥା କରାଯାଇଛି।

ଦକ୍ଷିଣ କୋରିଆର ପୁରୁଷ ବାସ୍କେଟବଲ୍ ଦଳ ଏହି ବ୍ୟବସ୍ଥାରେ ବିଶେଷ ଭାବେ ଅସନ୍ତୁଷ୍ଟ। Korea Basketball Associationର ଉପାଧ୍ୟକ୍ଷ ଜଙ୍ଗ୍ ଜା-ୟୋଙ୍ଗ୍ କହିଛନ୍ତି ଯେ ଦଳକୁ ଦିଆଯାଇଥିବା ଅସ୍ଥାୟୀ କ୍ୟାବିନ୍ କିଛି ଖେଳାଳିଙ୍କ ପାଇଁ ଉପଯୁକ୍ତ ନୁହେଁ।

ତାଙ୍କ କହିବା ଅନୁଯାୟୀ, ଦୁଇ ମିଟରରୁ ଅଧିକ ଉଚ୍ଚତାର ଖେଳାଳିମାନେ ବେଡ୍‌ରେ ପାଦ ଲମ୍ବା କରି ଶୋଇପାରୁନାହାନ୍ତି। ନିଜ ଅଭିଜ୍ଞତାରେ ଏହା ସବୁଠାରୁ ଖରାପ ଆବାସ ବ୍ୟବସ୍ଥା ବୋଲି ସେ କହିଛନ୍ତି।

ବାସ୍କେଟବଲ୍ ଖେଳାଳି ବ୍ୟୋନ୍ ଜୁନ୍-ହ୍ୟୁଙ୍ଗ୍ ମଧ୍ୟ ସୋସିଆଲ୍ ମିଡିଆରେ ଏକ ଭିଡିଓ ଶେୟାର କରି ଅଭିଯୋଗ ଦେଖାଇଛନ୍ତି। ଭିଡିଓରେ ତାଙ୍କ କଣ୍ଟେନର ଘରର ସିଙ୍କ୍‌ରୁ ପାଣି ଲିକ୍‌ ହୋଇ ମାଟି ଓଦା ହୋଇଥିବା ଦେଖାଯାଇଥିଲା। ସେ ଏହା ସହ “Please help us” ବୋଲି ଲେଖିଥିଲେ।

ଏହି କଣ୍ଟେନର ଘରଗୁଡ଼ିକରେ ଦୁଇ ସପ୍ତାହରୁ ଅଧିକ ସମୟ ଧରି ପ୍ରାୟ ୨,୦୦୦ ଖେଳାଳି ଓ ଅଧିକାରୀ ରହିବେ ବୋଲି ଆଶା କରାଯାଉଛି। ଭାରତରେ ମଧ୍ୟ ଏହି ଆବାସ ବ୍ୟବସ୍ଥାକୁ ନେଇ ପ୍ରସ୍ତୁତି ହୋଇଥିବା ରିପୋର୍ଟ ରହିଛି। ଜାପାନରେ ଯେଉଁ ପରିସ୍ଥିତି ଖେଳାଳିମାନେ ସାମ୍ନା କରିବେ, ସେଥିପାଇଁ ଭାରତୀୟ ଅଧିକାରୀମାନେ କଣ୍ଟେନର କ୍ୟାବିନ୍‌ର ପ୍ରତିରୂପ ତିଆରି କରି ଖେଳାଳିଙ୍କୁ ପ୍ରସ୍ତୁତ କରିଥିବା କୁହାଯାଇଛି।

ଜଙ୍ଗ୍ କହିଛନ୍ତି ଯେ ଦକ୍ଷିଣ କୋରିଆ ପକ୍ଷରୁ ଆୟୋଜକଙ୍କ ନିକଟରେ ସମସ୍ୟା ଉଠାଯାଇଛି, କିନ୍ତୁ ଏପର୍ଯ୍ୟନ୍ତ ସ୍ପଷ୍ଟ ଉତ୍ତର ମିଳିନାହିଁ। କୋରିଆ ଅଧିକାରୀମାନେ ଦେଶର ଅଲିମ୍ପିକ୍ କମିଟି ସହ ଏନେଇ ଆଲୋଚନା କରୁଛନ୍ତି।

ବର୍ଷା ମଧ୍ୟ ବଢ଼ାଇଲା ଚିନ୍ତା

ଆବାସ ସମସ୍ୟା ମଧ୍ୟରେ ନାଗୋୟାରେ ଖରାପ ପାଗ ମଧ୍ୟ ଚିନ୍ତା ବଢ଼ାଇଛି। ରେକର୍ଡ ବର୍ଷା ଯୋଗୁଁ ଗତ ସପ୍ତାହରେ ଶତାଧିକ ଖେଳାଳିଙ୍କୁ ସାମୟିକ ଭାବେ ସେମାନଙ୍କ ରହଣିସ୍ଥଳରୁ ସ୍ଥାନାନ୍ତର କରାଯାଇଥିଲା। ଆଗାମୀ ଦିନରେ ମଧ୍ୟ ବର୍ଷାର ପୂର୍ବାନୁମାନ ରହିଛି।

ଏଥର ଏସିଆନ୍ ଗେମ୍ସରେ ୧୭,୦୦୦ରୁ ଅଧିକ ଖେଳାଳି ଓ ଅଧିକାରୀ ଯୋଗଦେବେ ବୋଲି ଆଶା କରାଯାଉଛି। ଏହି ସଂଖ୍ୟା ଅଲିମ୍ପିକ୍ ଗେମ୍ସଠାରୁ ମଧ୍ୟ ଅଧିକ। ଆୟୋଜକମାନେ ପ୍ରଥମେ ପ୍ରାୟ ୧୫,୦୦୦ ଅଂଶଗ୍ରହଣକାରୀଙ୍କୁ ଧ୍ୟାନରେ ରଖି ଯୋଜନା କରିଥିଲେ। ପରେ ସଂଖ୍ୟା ବଢ଼ିଯିବାରୁ ଲଜିଷ୍ଟିକ୍ସ ଉପରେ ଅଧିକ ଚାପ ପଡ଼ିଛି।

ଆୟୋଜକମାନେ ମାନବ ସମ୍ବଳ ଓ ବଜେଟ୍‌ର ଅଭାବ ଥିବା କହିଥିବା ବେଳେ Olympic Council of Asia ପରେ ସମସ୍ତ ଅଂଶଗ୍ରହଣକାରୀଙ୍କ ପାଇଁ ଆବାସ ବ୍ୟବସ୍ଥା କରାଯିବ ବୋଲି ନିଶ୍ଚିତ କରିଥିଲା।

ଫିଲିପାଇନ୍ସ ମଧ୍ୟ ନିଜ ଦଳର କିଛି ସପୋର୍ଟ ଷ୍ଟାଫ୍‌ଙ୍କୁ ଅନ୍ୟ ହୋଟେଲ୍ ଓ Airbnbରେ ରଖିବାକୁ ବାଧ୍ୟ ହୋଇଛି। ତେବେ ଦେଶର ଖେଳାଳିମାନଙ୍କ ପାଇଁ କୋଠରୀ ବ୍ୟବସ୍ଥା ହୋଇଥିବା ଫିଲିପାଇନ୍ ଅଲିମ୍ପିକ୍ କମିଟି ମୁଖ୍ୟ ଆବ୍ରାହାମ୍ ଟୋଲେଣ୍ଟିନୋ କହିଛନ୍ତି।

ଏହି ସମୟରେ ଇଟାଲୀର କ୍ରୁଜ୍ ଜାହାଜ Costa Serena ନାଗୋୟାରେ ପହଞ୍ଚିବାକୁ ଥିବା ବେଳେ ଏଥିରେ ପ୍ରାୟ ୪,୦୦୦ରୁ ୫,୦୦୦ ଖେଳାଳି ରହିବେ। ଅନ୍ୟ ଅଂଶଗ୍ରହଣକାରୀଙ୍କୁ ହୋଟେଲ୍‌ରେ ରଖାଯିବ। ସନ୍ତରଣ, ଡାଇଭିଂ ଓ ଅଶ୍ୱଚାଳନା ପ୍ରତିଯୋଗିତା ପାଇଁ କିଛି ଅଂଶଗ୍ରହଣକାରୀଙ୍କୁ ଟୋକିଓରେ ମଧ୍ୟ ରଖାଯିବ।