ନୂଆଦିଲ୍ଲୀ: ଭାରତୀୟ ଚେସ୍ ଜଗତ ପାଇଁ ଆସିଛି ଏକ ବଡ଼ ଖୁସି ଖବର। ଦେଶକୁ ମିଳିଛନ୍ତି ୧୦୦ତମ ଚେସ୍ ଗ୍ରାଣ୍ଡମାଷ୍ଟର । ମଧ୍ୟପ୍ରଦେଶର ଯୁବ ଚେସ୍ ଖେଳାଳି ଅନୁଜ ଶ୍ରୀବାସ୍ତବ ଏହି ଐତିହାସିକ ସଫଳତା ହାସଲ କରିଛନ୍ତି। ତାଙ୍କ ଏହି ଉପଲବ୍ଧି ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଭିନନ୍ଦନ ଜଣାଇଛନ୍ତି।

ମଙ୍ଗଳବାର ସୋସିଆଲ ମିଡିଆ ପ୍ଲାଟଫର୍ମ Xରେ ଏକ ପୋଷ୍ଟ କରି ମୋଦୀ ଅନୁଜଙ୍କ ସଫଳତାକୁ ପ୍ରଶଂସା କରିଛନ୍ତି। ଭାରତୀୟ ଚେସ୍ ଇତିହାସରେ ୧୦୦ ଗ୍ରାଣ୍ଡମାଷ୍ଟର ହେବା ଏକ ଅସାଧାରଣ ଉପଲବ୍ଧି ବୋଲି ସେ କହିଛନ୍ତି।

ମୋଦୀ ଲେଖିଛନ୍ତି, ଭାରତ ଚେସ୍ରେ ଶତକ ହାସଲ କରିଛି। ଏବେ ଦେଶରେ ୧୦୦ ଜଣ ଚେସ୍ ଗ୍ରାଣ୍ଡମାଷ୍ଟର ଅଛନ୍ତି। ଭାରତର ୧୦୦ତମ ଚେସ୍ ଗ୍ରାଣ୍ଡମାଷ୍ଟର ହେବା ପାଇଁ ଅନୁଜ ଶ୍ରୀବାସ୍ତବଙ୍କୁ ଅନେକ ଅଭିନନ୍ଦନ। ଏହା ଏକ ଚମତ୍କାର ସଫଳତା ।

ସେ ଆହୁରି କହିଛନ୍ତି ଯେ, ଭାରତରେ ଚେସ୍ର ଲୋକପ୍ରିୟତା ବଢ଼ିବା ସହ ଯୁବପିଢ଼ିଙ୍କ ମଧ୍ୟରେ ଏହି ଖେଳ ପ୍ରତି ଆଗ୍ରହ ବୃଦ୍ଧି ପାଉଛି। ଦେଶର ବିଭିନ୍ନ ଅଞ୍ଚଳରୁ ନୂଆ ନୂଆ ପ୍ରତିଭା ସାମ୍ନାକୁ ଆସି ବିଶ୍ୱସ୍ତରରେ ନିଜର ପରିଚୟ ସୃଷ୍ଟି କରୁଥିବା ଅତ୍ୟନ୍ତ ଖୁସିର ବିଷୟ । ଅନୁଜଙ୍କ ଏହି ସଫଳତା ଆଗାମୀ ପିଢ଼ିର ଖେଳାଳିଙ୍କୁ ଚେସ୍ ଖେଳିବା ଏବଂ ଉଚ୍ଚ ସଫଳତା ହାସଲ କରିବାକୁ ପ୍ରେରଣା ଦେବ ବୋଲି ମୋଦୀ ଆଶା ପ୍ରକାଶ କରିଛନ୍ତି।

୭ମ ASEAN ଚେସ୍ ଚାମ୍ପିୟନସିପ୍ ଜିତି ହାସଲ କଲେ ଗୌରବ

ମଧ୍ୟପ୍ରଦେଶର ଅନୁଜ ଶ୍ରୀବାସ୍ତବ ରବିବାର ଅନୁଷ୍ଠିତ ୭ମ ASEAN Plus Individual Open Chess Championship ଜିତି ଗ୍ରାଣ୍ଡମାଷ୍ଟର ଟାଇଟଲ୍ ହାସଲ କରିଛନ୍ତି। ଏହା ସହ ସେ ଭାରତର ୧୦୦ତମ ଗ୍ରାଣ୍ଡମାଷ୍ଟର ହେବା ସହ ମଧ୍ୟପ୍ରଦେଶର ପ୍ରଥମ ଗ୍ରାଣ୍ଡମାଷ୍ଟର ହେବାର ଗୌରବ ଅର୍ଜନ କରିଛନ୍ତି।

ତେବେ ଏହି ସଫଳତାର ଯାତ୍ରା ତାଙ୍କ ପାଇଁ ଏତେ ସହଜ ନଥିଲା। ଟୁର୍ଣ୍ଣାମେଣ୍ଟର ପ୍ରଥମ ରାଉଣ୍ଡରେ ପରାଜୟର ସାମ୍ନା କରିଥିଲେ ଅନୁଜ। କିନ୍ତୁ ହାର ନମାନି ପରବର୍ତ୍ତୀ ମ୍ୟାଚ୍ଗୁଡ଼ିକରେ ଜବରଦସ୍ତ ପ୍ରତ୍ୟାବର୍ତ୍ତନ କରିଥିଲେ । ଶେଷ ୮ଟି ମ୍ୟାଚ୍ରୁ ୭ ପଏଣ୍ଟ ହାସଲ କରି ଶେଷରେ ଚାମ୍ପିୟନ ହୋଇଥିଲେ ।

 ଆହୁରି ପଢନ୍ତୁ: IPL ୨୦୨୭ରେ ବଡ଼ ହଲଚଲ! ପଞ୍ଜାବ କିଙ୍ଗ୍ସକୁ ଗଲେ ହାର୍ଦ୍ଦିକ, ମୁମ୍ବାଇ ଇଣ୍ଡିଆନ୍ସକୁ ଆସିଲେ ଅର୍ଶଦୀପ

ଭାରତୀୟ ଚେସ୍ରେ ନୂଆ ଅଧ୍ୟାୟ

ଗତ କିଛି ବର୍ଷ ମଧ୍ୟରେ ଭାରତୀୟ ଚେସ୍ ଖେଳାଳିମାନେ ଅନ୍ତର୍ଜାତୀୟ ସ୍ତରରେ ନିଜର ପ୍ରଭାବ ବଢ଼ାଇଛନ୍ତି। ଦେଶର ବିଭିନ୍ନ ରାଜ୍ୟରୁ ପ୍ରତିଭାବାନ ଖେଳାଳି ସାମ୍ନାକୁ ଆସି ବିଶ୍ୱ ଚେସ୍ ମଞ୍ଚରେ ଭାରତର ନାମ ଉଜ୍ଜ୍ୱଳ କରୁଛନ୍ତି।

ଭାରତର ୧୦୦ତମ ଗ୍ରାଣ୍ଡମାଷ୍ଟର ହେବା ଦେଶର ଚେସ୍ ଇତିହାସରେ ଏକ ମାଇଲଖୁଣ୍ଟ। ଅନ୍ୟପଟେ ମଧ୍ୟପ୍ରଦେଶ ପାଇଁ ମଧ୍ୟ ଏହା ଏକ ଐତିହାସିକ ମୁହୂର୍ତ୍ତ । ଅନୁଜଙ୍କ ଏହି ସଫଳତା ଆଗାମୀ ଦିନରେ ଅନେକ ଯୁବ ଖେଳାଳିଙ୍କୁ ଚେସ୍ ପ୍ରତି ଆକର୍ଷିତ କରିବ ବୋଲି ଆଶା କରାଯାଉଛି।