ଭୁବନେଶ୍ୱର: ନନ୍ଦନକାନନ ଜୁଲୋଜିକାଲ ପାର୍କରେ ରହୁଥିବା ବାଲେଶ୍ୱରରୁ ଉଦ୍ଧାର ହୋଇଥିବା ୫ଟି ଶିଶୁ ଓରାଙ୍ଗଉଟାନଙ୍କ ସ୍ୱାସ୍ଥ୍ୟ ଓ ଯତ୍ନ ବ୍ୟବସ୍ଥା ସମୀକ୍ଷା କରିଛନ୍ତି ଓଡ଼ିଶାର ମୁଖ୍ୟ ଶାସନ ସଚିବ ଅନୁ ଗର୍ଗ। ନନ୍ଦନକାନନର ହ୍ୟାଣ୍ଡ ରିୟରିଂ ସେଣ୍ଟରରେ ରହୁଥିବା ଏହି ପ୍ରାଣୀମାନଙ୍କର ଚିକିତ୍ସା ଓ ଦୈନିକ ଯତ୍ନ ବ୍ୟବସ୍ଥା ସମ୍ପର୍କରେ ସେ ଅଧିକାରୀଙ୍କଠାରୁ ସୂଚନା ନେଇଥିଲେ।

ଅନୁ ଗର୍ଗ ଓରାଙ୍ଗଉଟାନମାନଙ୍କ ସ୍ୱାସ୍ଥ୍ୟର ନିୟମିତ ନିରୀକ୍ଷଣ ଜାରି ରଖିବା ସହ ଆବଶ୍ୟକ ପଶୁ ଚିକିତ୍ସା ଏବଂ ଅନ୍ୟାନ୍ୟ ସୁବିଧା ଯୋଗାଇବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଉଦ୍ଧାର ହୋଇଥିବା ୫ଟି ଯାକ ଓରାଙ୍ଗଉଟାନଙ୍କୁ ନିୟମିତ ଭାବେ ନଜରରେ ରଖାଯାଉଛି।

ସେମାନଙ୍କୁ ସକ୍ରିୟ ରଖିବା ଓ ଯତ୍ନର ପରିବେଶକୁ ଉନ୍ନତ କରିବା ପାଇଁ ହ୍ୟାଣ୍ଡ ରିୟରିଂ ସେଣ୍ଟରରେ ନୂଆ ଦୋଳି, ଝୁଲିବା ବ୍ୟବସ୍ଥା ଏବଂ ଖେଳ ଉପକରଣ ଯୋଗାଇ ଦିଆଯାଇଛି। ଅଧିକାରୀଙ୍କ ସୂଚନା ଅନୁସାରେ, ଏହା ପରେ ସେମାନଙ୍କ କାର୍ଯ୍ୟକଳାପରେ ଉନ୍ନତି ଦେଖାଯାଇଛି। ବିଶେଷକରି M3 ଓ F2 ନାମରେ ଚିହ୍ନଟ ଦୁଇଟି ଓରାଙ୍ଗଉଟାନର କାର୍ଯ୍ୟକଳାପରେ ଉନ୍ନତି ଲକ୍ଷ୍ୟ କରାଯାଇଛି।

ସୂଚନାଯୋଗ୍ୟ, ସେପ୍ଟେମ୍ବର ୮ ତାରିଖରେ ବାଲେଶ୍ୱର ଜିଲ୍ଲା ଭୋଗରାଇ ଅଞ୍ଚଳର ବିଚିତ୍ରପୁର/କାସୁଆରିନା ଜଙ୍ଗଲ ଅଞ୍ଚଳରୁ ୫ଟି ଶିଶୁ ଓରାଙ୍ଗଉଟାନ ଉଦ୍ଧାର ହୋଇଥିଲେ। ପରେ ସେମାନଙ୍କୁ ନନ୍ଦନକାନନକୁ ଅଣାଯାଇ ତାପମାତ୍ରା ନିୟନ୍ତ୍ରିତ କ୍ୱାରେଣ୍ଟାଇନ୍ ବ୍ୟବସ୍ଥାରେ ରଖାଯାଇଛି।

ଅଧିକାରୀଙ୍କ ଅନୁସାରେ, ୫ଟି ଶିଶୁ ଓରାଙ୍ଗଉଟାନଙ୍କ ସ୍ୱାସ୍ଥ୍ୟରେ ସୁଧାର ହେଉଛି। କ୍ୱାରେଣ୍ଟାଇନ୍ ସମୟ ଶେଷ ହେବା ଏବଂ ସ୍ୱାସ୍ଥ୍ୟ ଅବସ୍ଥା ଆହୁରି ସୁଧାରିଲେ ସେମାନଙ୍କୁ ବଡ଼ ଏନ୍କ୍ଲୋଜରକୁ ସ୍ଥାନାନ୍ତର କରାଯିବା ନେଇ ଅଧିକାରୀମାନେ କହିଛନ୍ତି।

ଏହି ଓରାଙ୍ଗଉଟାନମାନେ ଭାରତର ସ୍ୱାଭାବିକ ପ୍ରଜାତି ନୁହନ୍ତି। ସେମାନେ ବାଲେଶ୍ୱରରେ କିପରି ପହଞ୍ଚିଲେ, ତାହାର ତଦନ୍ତ ଓଡ଼ିଶା ପୋଲିସର STF ଏବଂ Wildlife Crime Control Bureau ପକ୍ଷରୁ ଜାରି ରହିଛି।