WhatsAppରେ ଆସିଲା ସନ୍ଦେହଜନକ ମେସେଜ୍

ଲକ୍ଷ୍ନୌରୁ ସାମ୍ନାକୁ ଆସିଥିବା ଏହି ଘଟଣାରେ ପୀଡ଼ିତ ଚାର୍ଟର୍ଡ ଆକାଉଣ୍ଟାଣ୍ଟଙ୍କ WhatsAppକୁ ପ୍ରଥମେ ଏକ ମେସେଜ୍ ଆସିଥିଲା। ତାଙ୍କ ଆକାଉଣ୍ଟରୁ ୯୦ ହଜାର ଟଙ୍କା କଟିଯାଇଥିବା ବାର୍ତ୍ତାରେ ଦର୍ଶାଯାଇଥିଲା।

ଏହାର କିଛି ସମୟ ପରେ ଆଉ ଏକ ମେସେଜ୍ ଆସିଥିଲା। ଏଥିରେ ଯଦି ସେ ଏହି ଟ୍ରାଞ୍ଜାକ୍ସନ୍ କରିନାହାନ୍ତି, ତେବେ ‘No’ ଲେଖି ଉତ୍ତର ଦେବାକୁ କୁହାଯାଇଥିଲା। ମେସେଜ୍‌ଟିକୁ ବ୍ୟାଙ୍କର ସୁରକ୍ଷା ସୂଚନା ବୋଲି ଭାବି CA ଜଣକ ‘No’ ଲେଖି ରିପ୍ଲାଇ କରିଥିଲେ।

ଦୁଇଟି ଆକାଉଣ୍ଟରୁ ୧.୭୦ ଲକ୍ଷ ଟଙ୍କା ଗାଏବ

ରିପୋର୍ଟ ଅନୁଯାୟୀ, ଏହା ପରେ ତାଙ୍କ ICICI Bank ଓ IndusInd Bank ଆକାଉଣ୍ଟରୁ ଦୁଇଟି ଅଲଗା କାରବାର ମାଧ୍ୟମରେ ମୋଟ ୧.୭୦ ଲକ୍ଷ ଟଙ୍କା କଟିଯାଇଥିଲା।

ଏହି ଘଟଣାର ବିଶେଷତା ହେଉଛି, ପୀଡ଼ିତ ଲିଙ୍କ୍‌ରେ କ୍ଲିକ୍ କରିନଥିବା କିମ୍ବା କାହା ସହ OTP ସେୟାର କରିନଥିବା କହିଛନ୍ତି।

ଠକେଇର ଉପାୟ ନେଇ ତଦନ୍ତ

ସାଧାରଣତଃ ସାଇବର ଠକେଇରେ ଫିଶିଂ ଲିଙ୍କ୍, OTP, ନକଲି ଆପ୍ କିମ୍ବା ରିମୋଟ୍ ଆକ୍ସେସ୍ ଭଳି ଉପାୟ ବ୍ୟବହାର ହୋଇଥାଏ। ଏହି ମାମଲାରେ ଠକେଇର ପ୍ରକୃତ ଉପାୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ମେସେଜ୍ କିମ୍ବା ଫୋନ୍‌ରେ କୌଣସି ମାଲୱେୟାର ସକ୍ରିୟ ହୋଇଥିଲା କି ନାହିଁ, ସେ ନେଇ ମଧ୍ୟ ତଦନ୍ତ ଚାଲିଛି। ପୋଲିସ ପକ୍ଷରୁ ଫୋନର ଫୋରେନ୍ସିକ୍ ପରୀକ୍ଷା ଏବଂ ବ୍ୟାଙ୍କିଂ ଟ୍ରାଞ୍ଜାକ୍ସନ୍‌ର ଯାଞ୍ଚ କରାଯାଉଛି। ତଦନ୍ତ ଶେଷ ହେବା ପରେ ଟଙ୍କା କିପରି ଟ୍ରାନ୍ସଫର ହେଲା, ତାହା ସ୍ପଷ୍ଟ ହେବ।

ସାଇବର ଠକେଇରୁ କିପରି ରକ୍ଷା ପାଇବେ?

ବ୍ୟାଙ୍କ ନାମରେ WhatsApp, SMS କିମ୍ବା ଅନ୍ୟ କୌଣସି ମାଧ୍ୟମରେ ଆସୁଥିବା ସନ୍ଦେହଜନକ ମେସେଜ୍‌ରେ Reply, Link କିମ୍ବା Call କରିବା ପୂର୍ବରୁ ସତର୍କ ରୁହନ୍ତୁ। ବ୍ୟାଙ୍କ ସମ୍ବନ୍ଧୀୟ କୌଣସି ଅସାମାନ୍ୟ ଟ୍ରାଞ୍ଜାକ୍ସନ୍ ଦେଖାଗଲେ ସିଧାସଳଖ ବ୍ୟାଙ୍କର ଅଧିକୃତ ନମ୍ବରରେ ଯୋଗାଯୋଗ କରନ୍ତୁ।