ମୁମ୍ବାଇ: ଧମକପୂର୍ଣ୍ଣ ଚିଠିରେ ନାଁ ଆସିବା ପରେ ମଧ୍ୟ ନିଜ ପ୍ରଶଂସକଙ୍କୁ ଭେଟିବାର ପରମ୍ପରା ଜାରି ରଖିଛନ୍ତି ବଲିଉଡ୍‌ର ମହାନାୟକ ଅମିତାଭ ବଚ୍ଚନ। ଦୀପାବଳି ଅବସରରେ ନଭେମ୍ବର ୮ ତାରିଖ ରବିବାର ମୁମ୍ବାଇସ୍ଥିତ ନିଜ ବାସଭବନ ଜଲ୍‌ସା ବାହାରେ ପ୍ରଶଂସକଙ୍କୁ ଦର୍ଶନ ଦେଇଛନ୍ତି। ତେବେ ଏଥର ତାଙ୍କର ଏହି ରବିବାର ଦର୍ଶନରେ ଏକ ବିଶେଷ କଥା ଦେଖିବାକୁ ମିଳିଛି। ପୂର୍ବଥର ଭଳି ଏଥର ସେ ବୁଲେଟ୍‌ପ୍ରୁଫ୍‌ କାଚର ସୁରକ୍ଷା ମଧ୍ୟରେ ନଥିଲେ ।

୮୪ ବର୍ଷୀୟ ଅମିତାଭ ନିଜ ପ୍ରଶଂସକଙ୍କୁ ହାତ ହଲାଇ ଦୀପାବଳିର ଶୁଭେଚ୍ଛା ଜଣାଇଥିଲେ। ଏହି ସମୟରେ ତାଙ୍କ ପୁଅ ଅଭିଷେକ ବଚ୍ଚନ ଏବଂ ଫିଲ୍ମ ପ୍ରଯୋଜକ ବଣ୍ଟି ୱାଲିଆ ମଧ୍ୟ ଉପସ୍ଥିତ ଥିଲେ। ସୁରକ୍ଷା ବ୍ୟବସ୍ଥା ଉପରେ ସେମାନେ ନଜର ରଖିଥିଲେ ।

ଧମକପୂର୍ଣ୍ଣ ଚିଠି ପରେ ଦ୍ୱିତୀୟ ରବିବାର ଦର୍ଶନ

ସୂଚନା ଅନୁଯାୟୀ, ମୁମ୍ବାଇ ମେୟରଙ୍କୁ ପଠାଯାଇଥିବା ଏକ ଧମକପୂର୍ଣ୍ଣ ଚିଠିରେ ଅମିତାଭ ବଚ୍ଚନଙ୍କ ସମେତ ସହରର ଅନେକ ସେଲିବ୍ରିଟିଙ୍କ ନାଁ ଉଲ୍ଲେଖ ରହିଥିଲା। ଏହାପରେ ପୂର୍ବ ରବିବାର ଦର୍ଶନ ସମୟରେ ଅମିତାଭଙ୍କ ଚାରିପାଖରେ ବୁଲେଟ୍‌ପ୍ରୁଫ୍‌ କାଚ ଲଗାଯାଇଥିଲା।

ତେବେ ଏଥର ସେ ବିନା ବୁଲେଟ୍‌ପ୍ରୁଫ୍‌ କାଚରେ ପ୍ରଶଂସକଙ୍କୁ ଭେଟିବା ଘଟଣା ଚର୍ଚ୍ଚାକୁ ଆସିଛି। ଏହାକୁ ନେଇ କଂଗ୍ରେସ ମୁଖପାତ୍ର ସଚିନ ସାୱନ୍ତ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ, ସୁରକ୍ଷା ବ୍ୟବସ୍ଥା ହଟାଇବା ପଛରେ ସରକାରଙ୍କ ଛବିର ପ୍ରଶ୍ନ ରହିଛି ନା ଧମକ ଆଉ ନାହିଁ, ତାହା କେବଳ ଅମିତାଭ ହିଁ କହିପାରିବେ ।

ସେ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇଙ୍କ ଗ୍ୟାଙ୍ଗର ଧମକକୁ ନେଇ ମଧ୍ୟ ମନ୍ତବ୍ୟ ଦେଇଥିଲେ ।

ସ୍ୱାସ୍ଥ୍ୟକୁ ନେଇ ଅମିତାଭଙ୍କ ବଡ଼ ଅପଡେଟ୍‌

ଅନ୍ୟପଟେ ଅମିତାଭ ବଚ୍ଚନ ନିଜ ସ୍ୱାସ୍ଥ୍ୟକୁ ନେଇ ମଧ୍ୟ ବ୍ୟକ୍ତିଗତ ବ୍ଲଗ୍‌ରେ ସୂଚନା ଦେଇଛନ୍ତି। ଗତ କିଛି ଦିନ ଧରି ସେ ଲୋକପ୍ରିୟ ଟେଲିଭିଜନ୍‌ କାର୍ଯ୍ୟକ୍ରମ Kaun Banega Crorepatiର ସୁଟିଂ କରୁନାହାନ୍ତି। ଏହାକୁ ନେଇ ଚର୍ଚ୍ଚା ମଧ୍ୟରେ ସେ ନିଜ ଲେଖାରେ ହାତରେ ଯନ୍ତ୍ରଣା ଥିବା କଥା କହିଛନ୍ତି।

ପ୍ରଶଂସକମାନେ ପଠାଉଥିବା ଅନେକ ଶୁଭେଚ୍ଛା ଓ ଉପହାର ପାଇଁ ସେ କୃତଜ୍ଞତା ଜଣାଇଛନ୍ତି। ତେବେ ସେଗୁଡ଼ିକର ଉତ୍ତର ନିଜ ହାତରେ ଲେଖିବାକୁ ଚାହୁଁଥିଲେ ମଧ୍ୟ ଲେଖୁଥିବା ହାତରେ ଅସୁବିଧା ହେଉଥିବାରୁ ବିଳମ୍ବ ହେଉଥିବା କହିଛନ୍ତି।

ଅମିତାଭ ଲେଖିଛନ୍ତି ଯେ, ତାଙ୍କୁ ମିଳୁଥିବା ଉପହାରଗୁଡ଼ିକୁ ଠିକ୍‌ ଭାବରେ ରଖିବା ମଧ୍ୟ ତାଙ୍କ ପାଇଁ ଏକ ଦାୟିତ୍ୱ। ଏହାସହ ପ୍ରତ୍ୟେକ ପ୍ରଶଂସକଙ୍କୁ ବ୍ୟକ୍ତିଗତ ଭାବେ ଚିଠି ଲେଖି ଉତ୍ତର ଦେବାକୁ ସେ ଚେଷ୍ଟା କରୁଛନ୍ତି।

ପ୍ରଶଂସକଙ୍କ ସହ ସମ୍ପର୍କକୁ ଗୁରୁତ୍ୱ

ଦୀର୍ଘ ବର୍ଷ ଧରି ପ୍ରତି ରବିବାର ଜଲ୍‌ସା ବାହାରେ ଅମିତାଭଙ୍କୁ ଦେଖିବା ପାଇଁ ହଜାର ହଜାର ପ୍ରଶଂସକ ଏକାଠି ହୋଇଥାନ୍ତି। ଏହି ପରମ୍ପରା ଜରିଆରେ ସେ ନିଜ ପ୍ରଶଂସକଙ୍କ ସହ ସମ୍ପର୍କକୁ ଅତୁଟ ରଖିଛନ୍ତି। ଧମକ ଓ ସ୍ୱାସ୍ଥ୍ୟ ସମସ୍ୟା ସମ୍ପର୍କିତ ଚର୍ଚ୍ଚା ମଧ୍ୟରେ ତାଙ୍କର ଏହି ରବିବାର ଦର୍ଶନ ଏବେ ଚର୍ଚ୍ଚାର ବିଷୟ ପାଲଟିଛି।

ଆହୁରି ପଢନ୍ତୁ: ଅଭିନେତାଙ୍କ ଘରେ ନିଶା ନିବାରଣ ବିଭାଗର ଚଢ଼ାଉ! CM ବିଜୟଙ୍କୁ ଜବାବ ମାଗିଲେ ବାଲାଜୀ