ସମାଜବାଦୀ ପାର୍ଟିର ଜାତୀୟ ଅଧ୍ୟକ୍ଷ ଏବଂ ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ବୁଧବାର ତାଙ୍କର ୫୩ତମ ଜନ୍ମଦିନ ପାଳନ କରୁଛନ୍ତି। ଏହି ଅବସରରେ ତାଙ୍କୁ ଦେଶର ବିଭିନ୍ନ ପ୍ରାନ୍ତରୁ ଶୁଭେଚ୍ଛାର ସୁଅ ଛୁଟିଥିବା ବେଳେ, ସୁହେଲଦେବ ଭାରତୀୟ ସମାଜ ପାର୍ଟି (SBSP)ର ଜାତୀୟ ଅଧ୍ୟକ୍ଷ ତଥା ଉତ୍ତର ପ୍ରଦେଶ ସରକାରଙ୍କ ମନ୍ତ୍ରୀ ଓମ୍ ପ୍ରକାଶ ରାଜଭର ଏକ ଭିନ୍ନ ଢଙ୍ଗରେ ଶୁଭେଚ୍ଛା ଜଣାଇଛନ୍ତି।

ରାଜଭର ତାଙ୍କର ଶୁଭେଚ୍ଛା ବାର୍ତ୍ତାକୁ ‘ଜନ୍ମଦିନର ଉପହାର’ ବୋଲି ବର୍ଣ୍ଣନା କରି ଅଖିଳେଶ ଯାଦବଙ୍କୁ ଏସି-ପିସି ରାଜନୀତିରୁ ଦୂରେଇ ଗାଁ, ଗରିବ, ଚାଷୀ ଏବଂ ପଛୁଆ ବର୍ଗଙ୍କ ମଧ୍ୟରେ ଅଧିକ ସମୟ ବିତାଇବାକୁ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ, ତୃଣମୂଳ ସ୍ତରରେ ଲୋକଙ୍କ ସହ ସଂଯୋଗ ସ୍ଥାପନ କରିବାର କୌଣସି ସର୍ଟକଟ୍ ନାହିଁ। ଏଥିପାଇଁ ଗାଁକୁ ଯିବା, ଲୋକଙ୍କ ସମସ୍ୟା ବୁଝିବା ଓ ସେମାନଙ୍କ ସହ ନିୟମିତ ସମ୍ପର୍କ ରଖିବା ଆବଶ୍ୟକ।

ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ପୋଷ୍ଟ କରି ଓମ୍ ପ୍ରକାଶ ରାଜଭର ଲେଖିଛନ୍ତି ଯେ, ଅଖିଳେଶ ଯାଦବଙ୍କ ସୁସ୍ଥ ଓ ଦୀର୍ଘାୟୁ ଜୀବନ ପାଇଁ ସେ ଭଗବାନଙ୍କ ନିକଟରେ ପ୍ରାର୍ଥନା କରୁଛନ୍ତି। ସେ ଆହୁରି କହିଛନ୍ତି, ଅଖିଳେଶ ଏକ ସମୃଦ୍ଧ ରାଜନୈତିକ ପରିବାରରୁ ଆସିଛନ୍ତି ଏବଂ ତାଙ୍କୁ ବସ୍ତୁଗତ ଉପହାର ଦେବା ପରିବର୍ତ୍ତେ ଅଭିଜ୍ଞତା ଆଧାରିତ ପରାମର୍ଶ ହିଁ ସବୁଠାରୁ ମୂଲ୍ୟବାନ ଉପହାର ବୋଲି ସେ ମନେ କରନ୍ତି।

ରାଜଭରଙ୍କ ଏହି ଶୁଭେଚ୍ଛା ବାର୍ତ୍ତା ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଏହାକୁ ନେଇ ବିଭିନ୍ନ ମହଲରେ ମିଶ୍ର ପ୍ରତିକ୍ରିୟା ମଧ୍ୟ ଦେଖାଯାଉଛି।