ବୃଦ୍ଧିଶୀଳ ଇନ୍ଧନ ଦର ଭାରତୀୟ ବିମାନ ଶିଳ୍ପ ପାଇଁ ଗଭୀର ସଙ୍କଟ ସୃଷ୍ଟି କରୁଛି। ଦେଶର ପ୍ରମୁଖ ବିମାନ ସେବା ସଂସ୍ଥା ଏୟାର ଇଣ୍ଡିଆ, ଇଣ୍ଡିଗୋ ଓ ସ୍ପାଇସଜେଟ୍ ସରକାରଙ୍କୁ ଚିଠି ଲେଖି ଏଭିଏସନ ଖାତ ଅତ୍ୟଧିକ ଚାପରେ ଥିବା ଏବଂ ପରିସ୍ଥିତି ନିୟନ୍ତ୍ରଣରେ ନ ଆସିଲେ ସେବା ବନ୍ଦ ହେବା ପର୍ଯ୍ୟନ୍ତ ସମସ୍ୟା ଦେଖାଦେଇପାରେ ବୋଲି ସତର୍କ କରିଛନ୍ତି।

ଫେଡେରେସନ ଅଫ୍ ଇଣ୍ଡିଆନ ଏୟାରଲାଇନ୍ସ (FIA) ପକ୍ଷରୁ ସିଭିଲ ଏଭିଏସନ ମନ୍ତ୍ରଣାଳୟକୁ ପଠାଯାଇଥିବା ପତ୍ରରେ କୁହାଯାଇଛି ଯେ ପଶ୍ଚିମ ଏସିଆର ତଣ୍ଟା-ତଣ୍ଟି ଓ ବିଶ୍ୱ କ୍ରୁଡ଼ ତେଲ ଦର ବୃଦ୍ଧିର ପ୍ରଭାବରେ ଏଭିଏସନ ଟର୍ବାଇନ ଫ୍ୟୁଏଲ (ATF) ଦର ହଠାତ ବଢ଼ିଛି। ଏହା ବିମାନ ସେବା କମ୍ପାନୀମାନଙ୍କ ଚାଳନା ଖର୍ଚ୍ଚର ପ୍ରାୟ ୪୦ ପ୍ରତିଶତ ଅଂଶ ହେବାରୁ ଲାଭକାରିତା ଉପରେ ବଡ଼ ପ୍ରଭାବ ପଡ଼ୁଛି।

ଏୟାରଲାଇନ୍ସଗୁଡ଼ିକ ସତର୍କ କରିଛନ୍ତି ଯେ ଦେଶୀୟ ଓ ଆନ୍ତର୍ଜାତୀୟ ଉଡାଣ ପାଇଁ ଇନ୍ଧନ ମୂଲ୍ୟର ଅସମତା ଯଦି ଜାରି ରହେ, ତେବେ ଭାରି କ୍ଷତି ସମ୍ମୁଖୀନ ହୋଇ ବିମାନ ଗ୍ରାଉଣ୍ଡ କରିବା ଓ ଫ୍ଲାଇଟ୍ ବାତିଲ୍ କରିବା ପରି ପଦକ୍ଷେପ ନେବାକୁ ପଡ଼ିପାରେ। ବିଶେଷକରି ଆନ୍ତର୍ଜାତୀୟ ରୁଟରେ ଇନ୍ଧନ ମୂଲ୍ୟ ବଢ଼ିବାରୁ ଦୀର୍ଘପଥ ଉଡାଣରେ ଅଧିକ ଚାପ ସୃଷ୍ଟି ହେଉଛି।

ରୁପିଆ ମୂଲ୍ୟହ୍ରାସ ମଧ୍ୟ ସମସ୍ୟାକୁ ଆଉ ଗମ୍ଭୀର କରିଛି। ବଢୁଥିବା ଇନ୍ଧନ ଖର୍ଚ୍ଚ ସହ ଅନ୍ୟାନ୍ୟ ପରିଚାଳନା ଖର୍ଚ୍ଚ ବୃଦ୍ଧି ମିଶି ବିମାନ ଶିଳ୍ପକୁ ଅସୁବିଧାରେ ପକାଇଛି।

ଏହି ପରିସ୍ଥିତିରେ ବିମାନ ସଂସ୍ଥାଗୁଡ଼ିକ ସରକାରଙ୍କୁ ଏକ ସମାନ ଇନ୍ଧନ ମୂଲ୍ୟ ବ୍ୟବସ୍ଥା ଆଣିବାକୁ ଓ ATF ଉପରେ ୧୧ ପ୍ରତିଶତ ଏକ୍ସାଇଜ ଶୁଳ୍କ ଅସ୍ଥାୟୀ ଭାବେ ଛାଡ଼ ଦେବାକୁ ଅନୁରୋଧ କରିଛନ୍ତି। ପାରଦର୍ଶିତା ଓ ଶିଳ୍ପକୁ ସହାୟତା ଦେବା ପାଇଁ ପୂର୍ବରୁ ଚାଲୁଥିବା ମୂଲ୍ୟ ନିୟନ୍ତ୍ରଣ ବ୍ୟବସ୍ଥା ପୁନଃ ଚାଲୁ କରିବାକୁ ମଧ୍ୟ ଦାବି ହୋଇଛି।

ବଢୁଥିବା ଇନ୍ଧନ ମୂଲ୍ୟ ମଧ୍ୟରେ ଏଭିଏସନ ଶିଳ୍ପର ଏହି ଚେତାବନୀ ସରକାର ପାଇଁ ଚିନ୍ତା ବଢ଼ାଇଛି।