ୟୁକ୍ରେନ୍‌ ଯୁଦ୍ଧରେ ଯୋଗାଯୋଗ ଓ ଡ୍ରୋନ୍ ଅପରେସନ୍ ପାଇଁ ଗୁରୁତ୍ୱପୂର୍ଣ୍ଣ SpaceXର Starshield ସାଟେଲାଇଟ୍ ସେବାକୁ ଧୀମା କରିବା ନିର୍ଦ୍ଦେଶ ଆମେରିକାର ହ୍ୱାଇଟ୍ ହାଉସ୍‌ ଭିତରୁ ଆସିଥିବା ଦାବି ସାମ୍ନାକୁ ଆସିଛି। ଦୁଇଜଣ ଆମେରିକୀୟ ଅଧିକାରୀ ଓ ଜଣେ ପଶ୍ଚିମୀ ଅଧିକାରୀଙ୍କ ସୂଚନା ଆଧାରରେ ରଏଟର୍ସ ଏହି ରିପୋର୍ଟ ପ୍ରକାଶ କରିଛି। 

ରିପୋର୍ଟ ଅନୁସାରେ, ପେଣ୍ଟାଗନ୍‌ର ଅଧିକାରୀମାନଙ୍କୁ ୟୁକ୍ରେନ୍‌ ସେନା ପାଇଁ ବ୍ୟବହୃତ Starshield ସେବାକୁ ଧୀମା କରିବା ନେଇ ବାର୍ତ୍ତା ମିଳିଥିଲା। ଏହି ନିର୍ଦ୍ଦେଶ ହ୍ୱାଇଟ୍ ହାଉସ୍‌ର କେଉଁ ଅଧିକାରୀ ଦେଇଥିଲେ, ତାହା ସ୍ପଷ୍ଟ ହୋଇନାହିଁ। 

ୟୁକ୍ରେନ୍‌ ଅଧିକାରୀଙ୍କ ଅନୁସାରେ, ଦ୍ରୁତ ଗତିରେ ଚାଲୁଥିବା ଡ୍ରୋନ୍‌ରେ ଲଗାଯାଇଥିବା ସାଟେଲାଇଟ୍ ରିସିଭର୍‌ଗୁଡ଼ିକର କାର୍ଯ୍ୟକ୍ଷମତା ପ୍ରଭାବିତ ହୋଇଥିଲା। ଏହା ଫଳରେ ଡ୍ରୋନ୍‌ ମିଶନ୍ ଓ ରୁଷିଆ ବିରୋଧୀ ଅପରେସନ୍‌ରେ ବାଧା ସୃଷ୍ଟି ହୋଇଥିବା ୟୁକ୍ରେନ୍‌ ପକ୍ଷରୁ କୁହାଯାଇଛି। ପରେ ସେବା ପୁଣି ଚାଲୁ ହୋଇଥିଲେ ମଧ୍ୟ ଗତି ଉପରେ ସୀମା ଥିବା ଦାବି ହୋଇଥିଲା। 

ଏହି ଘଟଣା ଟ୍ରମ୍ପ ପ୍ରଶାସନ ଓ ୟୁକ୍ରେନ୍‌ ମଧ୍ୟରେ ବଢ଼ୁଥିବା ମତଭେଦ ମଧ୍ୟରେ ସାମ୍ନାକୁ ଆସିଛି। ଟ୍ରମ୍ପ ୟୁକ୍ରେନ୍‌କୁ ରୁଷିଆର ତେଲ ରିଫାଇନେରୀ ଉପରେ ଆକ୍ରମଣ ବନ୍ଦ କରିବାକୁ ଚାପ ଦେଉଥିବା ବେଳେ, Starshield ସେବା ସୀମିତ କରିବା ପାଇଁ ରାଷ୍ଟ୍ରପତି ନିଜେ କୌଣସି ଅନୁରୋଧ କରିନଥିବା ଜଣେ ବରିଷ୍ଠ ଆମେରିକୀୟ ଅଧିକାରୀ କହିଛନ୍ତି।